৫. ওপৱয্হত্থেৰঅপদানং

৩৩. ‘‘পদুমুত্তৰবুদ্ধস্স, আজানীযমদাসহং;

নিয্যাদেত্ৱান সম্বুদ্ধে [সম্বুদ্ধং (সী. ক.)], অগমাসিং সকং ঘৰং.

৩৪. ‘‘দেৱলো নাম নামেন, সত্থুনো অগ্গসাৱকো;

ৱৰধম্মস্স দাযাদো, আগচ্ছি মম সন্তিকং.

৩৫. ‘‘সপত্তভাৰো ভগৱা, আজানেয্যো ন কপ্পতি;

তৱ সঙ্কপ্পমঞ্ঞায, অধিৱাসেসি চক্খুমা.

৩৬. ‘‘অগ্ঘাপেত্ৱা ৱাতজৱং, সিন্ধৱং সীঘৱাহনং;

পদুমুত্তৰবুদ্ধস্স, খমনীযমদাসহং.

৩৭. ‘‘যং যং যোনুপপজ্জামি, দেৱত্তং অথ মানুসং [দেৱে চ মানুসে ভৱে (সী. ক.)];

খমনীযং ৱাতজৱং, চিত্তং নিব্বত্ততে [আজানীযা ৱাতজৱা, ৱিত্তি নিব্বত্তৰে (স্যা.), খমনীযা ৱাতজৱা, চিত্তা নিব্বত্তৰে (সী.)] মম.

৩৮. ‘‘লাভং তেসং সুলদ্ধংৱ, যে লভন্তুপসম্পদং;

পুনপি পযিৰুপাসেয্যং, বুদ্ধো লোকে সচে ভৱে.

৩৯. ‘‘অট্ঠৱীসতিক্খত্তুংহং, ৰাজা আসিং মহব্বলো;

চাতুৰন্তো ৱিজিতাৱী, জম্বুসণ্ডস্স [জম্বুদীপস্স (স্যা.), জম্বুমণ্ডস্স (ক.)] জম্বুইস্সৰো.

৪০. ‘‘ইদং পচ্ছিমকং ময্হং, চৰিমো ৱত্ততে ভৱো;

পত্তোস্মি অচলং ঠানং, হিত্ৱা জযপৰাজযং.

৪১. ‘‘চতুতিংসসহস্সম্হি, মহাতেজোসি খত্তিযো;

সতৰতনসম্পন্নো, চক্কৱত্তী মহব্বলো.

৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ওপৱয্হো থেৰো ইমা গাথাযো অভাসিত্থাতি.

ওপৱয্হত্থেৰস্সাপদানং পঞ্চমং.