৬. উত্তৰত্থেৰঅপদানং

৫৫. ‘‘সুমেধো নাম সম্বুদ্ধো, বাত্তিংসৱৰলক্খণো;

ৱিৱেককামো ভগৱা, হিমৱন্তমুপাগমি.

৫৬. ‘‘অজ্ঝোগাহেত্ৱা হিমৱন্তং, অগ্গো কাৰুণিকো মুনি;

পল্লঙ্কং আভুজিত্ৱান, নিসীদি পুৰিসুত্তমো.

৫৭. ‘‘ৱিজ্জধৰো তদা আসিং, অন্তলিক্খচৰো অহং;

তিসূলং সুগতং গয্হ, গচ্ছামি অম্বৰে তদা.

৫৮. ‘‘পব্বতগ্গে যথা অগ্গি, পুণ্ণমাযেৱ চন্দিমা;

ৱনং ওভাসতে বুদ্ধো, সালৰাজাৱ ফুল্লিতো.

৫৯. ‘‘ৱনগ্গা নিক্খমিত্ৱান, বুদ্ধৰংসীভিধাৱৰে [বুদ্ধৰংসী ৱিধাৱৰে (সী. ক.)];

নড়গ্গিৱণ্ণসঙ্কাসা [নড়গ্গিৱ নসঙ্কাসং (সী.)], দিস্ৱা চিত্তং পসাদযিং.

৬০. ‘‘ৱিচিনং অদ্দসং পুপ্ফং, কণিকাৰং দেৱগন্ধিকং;

তীণি পুপ্ফানি আদায, বুদ্ধসেট্ঠমপূজযিং.

৬১. ‘‘বুদ্ধস্স আনুভাৱেন, তীণি পুপ্ফানি মে তদা;

উদ্ধং ৱণ্টা অধোপত্তা, ছাযং কুব্বন্তি সত্থুনো.

৬২. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং তাৱতিংসমগচ্ছহং.

৬৩. ‘‘তত্থ মে সুকতং ব্যম্হং, কণিকাৰীতি [কণিকাৰোতি (সী.)] ঞাযতি;

সট্ঠিযোজনমুব্বেধং, তিংসযোজনৱিত্থতং.

৬৪. ‘‘সহস্সকণ্ডং সতভেণ্ডু, ধজালু হৰিতামযং;

সতসহস্সনিয্যূহা [সতসহস্সানি ব্যূহানি (সী.)], ব্যম্হে পাতুভৱিংসু [পাতুৰহংসু (সী.), পাতুৰহিংসু (ক.)] মে.

৬৫. ‘‘সোণ্ণমযা মণিমযা, লোহিতঙ্কমযাপি চ;

ফলিকাপি চ পল্লঙ্কা, যেনিচ্ছকা যদিচ্ছকা.

৬৬. ‘‘মহাৰহঞ্চ সযনং, তূলিকা ৱিকতীযুতং;

উদ্ধলোমিঞ্চ একন্তং, বিম্বোহনসমাযুতং.

৬৭. ‘‘ভৱনা নিক্খমিত্ৱান, চৰন্তো দেৱচাৰিকং;

যথা ইচ্ছামি [যথা গচ্ছামি (সী.)] গমনং, দেৱসঙ্ঘপুৰক্খতো.

৬৮. ‘‘পুপ্ফস্স হেট্ঠা তিট্ঠামি, উপৰিচ্ছদনং মম;

সমন্তা যোজনসতং, কণিকাৰেহি ছাদিতং.

৬৯. ‘‘সট্ঠিতুৰিযসহস্সানি, সাযপাতং উপট্ঠহুং;

পৰিৱাৰেন্তি মং নিচ্চং, ৰত্তিন্দিৱমতন্দিতা.

৭০. ‘‘তত্থ নচ্চেহি গীতেহি, তালেহি ৱাদিতেহি চ;

ৰমামি খিড্ডা ৰতিযা, মোদামি কামকামহং.

৭১. ‘‘তত্থ ভুত্ৱা পিৱিত্ৱা চ, মোদামি তিদসে তদা;

নাৰীগণেহি সহিতো, মোদামি ব্যম্হমুত্তমে.

৭২. ‘‘সতানং পঞ্চক্খত্তুঞ্চ, দেৱৰজ্জমকাৰযিং;

সতানং তীণিক্খত্তুঞ্চ, চক্কৱত্তী অহোসহং;

পদেসৰজ্জং ৱিপুলং, গণনাতো অসঙ্খিযং.

৭৩. ‘‘ভৱে ভৱে সংসৰন্তো, মহাভোগং লভামহং;

ভোগে মে ঊনতা নত্থি, বুদ্ধপূজাযিদং ফলং.

৭৪. ‘‘দুৱে ভৱে সংসৰামি, দেৱত্তে অথ মানুসে;

অঞ্ঞং গতিং ন জানামি, বুদ্ধপূজাযিদং ফলং.

৭৫. ‘‘দুৱে কুলে পজাযামি [যত্থ পচ্ছা পজাযামি (সী.)], খত্তিযে চাপি ব্ৰাহ্মণে;

নীচে কুলে ন জাযামি, বুদ্ধপূজাযিদং ফলং.

৭৬. ‘‘হত্থিযানং অস্সযানং, সিৱিকং সন্দমানিকং;