১০. পিযালফলদাযকত্থেৰঅপদানং

১০৪. ‘‘মিগলুদ্দো পুৰে আসিং, ৱিপিনে ৱিচৰং তদা;

অদ্দসং ৱিৰজং বুদ্ধং, সব্বধম্মান পাৰগুং.

১০৫. ‘‘পিযালফলমাদায, বুদ্ধসেট্ঠস্সদাসহং;

পুঞ্ঞক্খেত্তস্স ৱীৰস্স, পসন্নো সেহি পাণিভি.

১০৬. ‘‘একতিংসে ইতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

১০৭. ‘‘কিলেসা ঝাপিতা ময্হং…পে… ৱিহৰামি অনাসৱো.

১০৮. ‘‘স্ৱাগতং ৱত মে আসি…পে… কতং বুদ্ধস্স সাসনং.

১০৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পিযালফলদাযকো থেৰো ইমা

গাথাযো অভাসিত্থাতি.

পিযালফলদাযকত্থেৰস্সাপদানং দসমং.

কিঙ্কণিপুপ্ফৱগ্গো পঞ্ঞাসমো.

তস্সুদ্দানং –

কিঙ্কণী পংসুকূলঞ্চ, কোৰণ্ডমথ কিংসুকং;

উপড্ঢদুস্সী ঘতদো, উদকং থূপকাৰকো.

নড়কাৰী চ নৱমো, পিযালফলদাযকো;

সতমেকঞ্চ গাথানং, নৱকঞ্চ তদুত্তৰি.

অথ ৱগ্গুদ্দানং –

মেত্তেয্যৱগ্গো ভদ্দালি, সকিংসম্মজ্জকোপি চ;

একৱিহাৰী ৱিভীতকী, জগতী সালপুপ্ফিযো.

নড়াগাৰং পংসুকূলং, কিঙ্কণিপুপ্ফিযো তথা;

অসীতি দ্ৱে চ গাথাযো, চতুদ্দসসতানি চ.

মেত্তেয্যৱগ্গদসকং.