৫০. কিঙ্কণিপুপ্ফৱগ্গো

১. তিকিঙ্কণিপুপ্ফিযত্থেৰঅপদানং

১. ‘‘কণিকাৰংৱ জোতন্তং, নিসিন্নং পব্বতন্তৰে;

অদ্দসং ৱিৰজং বুদ্ধং, ৱিপস্সিং লোকনাযকং.

২. ‘‘তীণি কিঙ্কণিপুপ্ফানি, পগ্গয্হ অভিৰোপযিং;

সম্বুদ্ধমভিপূজেত্ৱা, গচ্ছামি দক্খিণামুখো.

৩. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৪. ‘‘একনৱুতিতো কপ্পে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৫. ‘‘কিলেসা ঝাপিতা ময্হং, ভৱা সব্বে সমূহতা;

নাগোৱ বন্ধনং ছেত্ৱা, ৱিহৰামি অনাসৱো.

৬. ‘‘স্ৱাগতং ৱত মে আসি, মম বুদ্ধস্স সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

৭. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা তিকিঙ্কণিপুপ্ফিযো থেৰো ইমা

গাথাযো অভাসিত্থাতি.

তিকিঙ্কণিপুপ্ফিযত্থেৰস্সাপদানং পঠমং.

২. পংসুকূলপূজকত্থেৰঅপদানং

৮. ‘‘হিমৱন্তস্সাৱিদূৰে, উদঙ্গণো নাম পব্বতো;

তত্থদ্দসং পংসুকূলং, দুমগ্গম্হি ৱিলম্বিতং.

৯. ‘‘তীণি কিঙ্কণিপুপ্ফানি, ওচিনিত্ৱানহং তদা;

হট্ঠো হট্ঠেন চিত্তেন, পংসুকূলমপূজযিং.

১০. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

১১. ‘‘একনৱুতিতো কপ্পে, যং কম্মমকৰিং তদা;

দুগ্গতিং নাভিজানামি, পূজিত্ৱা অৰহদ্ধজং.

১২. ‘‘কিলেসা ঝাপিতা ময্হং…পে… ৱিহৰামি অনাসৱো.

১৩. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পংসুকূলপূজকো থেৰো ইমা গাথাযো

অভাসিত্থাতি.

পংসুকূলপূজকত্থেৰস্সাপদানং দুতিযং.

৩. কোৰণ্ডপুপ্ফিযত্থেৰঅপদানং

১৫. ‘‘ৱনকম্মিকো পুৰে আসিং, পিতুমাতুমতেনহং [পিতুপেতামহেনহং (সী. স্যা. পী.)];

পসুমাৰেন জীৱামি, কুসলং মে ন ৱিজ্জতি.

১৬. ‘‘মম আসযসামন্তা, তিস্সো লোকগ্গনাযকো;

পদানি তীণি দস্সেসি, অনুকম্পায চক্খুমা.

১৭. ‘‘অক্কন্তে চ পদে দিস্ৱা, তিস্সনামস্স সত্থুনো;

হট্ঠো হট্ঠেন চিত্তেন, পদে চিত্তং পসাদযিং.

১৮. ‘‘কোৰণ্ডং পুপ্ফিতং দিস্ৱা, পাদপং ধৰণীৰুহং;

সকোসকং গহেত্ৱান, পদসেট্ঠমপূজযিং [পদসেট্ঠে অপূজযিং (সী. পী.)].

১৯. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

২০. ‘‘যং যং যোনুপপজ্জামি, দেৱত্তং অথ মানুসং;

কোৰণ্ডকছৱি হোমি, সুপ্পভাসো [সপভাসো (সী. স্যা. পী. ক.)] ভৱামহং.

২১. ‘‘দ্ৱেনৱুতে ইতো কপ্পে, যং কম্মমকৰিং তদা;

দুগ্গতিং নাভিজানামি, পদপূজাযিদং ফলং.

২২. ‘‘কিলেসা ঝাপিতা ময্হং…পে… ৱিহৰামি অনাসৱো.

২৩. ‘‘স্ৱাগতং ৱত মে আসি…পে… কতং বুদ্ধস্স সাসনং.

২৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কোৰণ্ডপুপ্ফিযো থেৰো ইমা গাথাযো

অভাসিত্থাতি.

কোৰণ্ডপুপ্ফিযত্থেৰস্সাপদানং ততিযং.

৪. কিংসুকপুপ্ফিযত্থেৰঅপদানং

২৫. ‘‘কিংসুকং পুপ্ফিতং দিস্ৱা, পগ্গহেত্ৱান অঞ্জলিং;

বুদ্ধসেট্ঠং সৰিত্ৱান, আকাসে অভিপূজযিং.

২৬. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

২৭. ‘‘একতিংসে ইতো কপ্পে, যং কম্মমকৰিং তদা;

দুগ্গতিং নাভিজানামি, বুদ্ধপূজাযিদং ফলং.

২৮. ‘‘কিলেসা ঝাপিতা ময্হং…পে… ৱিহৰামি অনাসৱো.

২৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কিংসুকপুপ্ফিযো থেৰো ইমা গাথাযো

অভাসিত্থাতি.

কিংসুকপুপ্ফিযত্থেৰস্সাপদানং চতুত্থং.

৫. উপড্ঢদুস্সদাযকত্থেৰঅপদানং

৩১. ‘‘পদুমুত্তৰভগৱতো, সুজাতো নাম সাৱকো;

পংসুকূলং গৱেসন্তো, সঙ্কাৰে চৰতে [চৰতী (সী. ক.)] তদা.

৩২. ‘‘নগৰে হংসৱতিযা, পৰেসং ভতকো অহং;

উপড্ঢদুস্সং দত্ৱান, সিৰসা অভিৱাদযিং.

৩৩. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৩৪. ‘‘তেত্তিংসক্খত্তুং দেৱিন্দো, দেৱৰজ্জমকাৰযিং;

সত্তসত্ততিক্খত্তুঞ্চ, চক্কৱত্তী অহোসহং.

৩৫. ‘‘পদেসৰজ্জং ৱিপুলং, গণনাতো অসঙ্খিযং;

উপড্ঢদুস্সদানেন, মোদামি অকুতোভযো.

৩৬. ‘‘ইচ্ছমানো চহং অজ্জ, সকাননং সপব্বতং;

খোমদুস্সেহি ছাদেয্যং, অড্ঢদুস্সস্সিদং ফলং.

৩৭. ‘‘সতসহস্সিতো কপ্পে, যং দানমদদিং তদা;

দুগ্গতিং নাভিজানামি, অড্ঢদুস্সস্সিদং ফলং.

৩৮. ‘‘কিলেসা ঝাপিতা ময্হং…পে… ৱিহৰামি অনাসৱো.

৩৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

৪০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উপড্ঢদুস্সদাযকো থেৰো ইমা

গাথাযো অভাসিত্থাতি.

উপড্ঢদুস্সদাযকত্থেৰস্সাপদানং পঞ্চমং.

৬. ঘতমণ্ডদাযকত্থেৰঅপদানং

৪১. ‘‘সুচিন্তিতং ভগৱন্তং, লোকজেট্ঠং নৰাসভং;

উপৱিট্ঠং মহাৰঞ্ঞং, ৱাতাবাধেন পীড়িতং.

৪২. ‘‘দিস্ৱা চিত্তং পসাদেত্ৱা, ঘতমণ্ডমুপানযিং;

কতত্তা আচিতত্তা [উপচিতত্তা (স্যা. ক.)] চ, গঙ্গা ভাগীৰথী অযং.

৪৩. ‘‘মহাসমুদ্দা চত্তাৰো, ঘতং সম্পজ্জৰে মম;

অযঞ্চ পথৱী ঘোৰা, অপ্পমাণা অসঙ্খিযা.

৪৪. ‘‘মম সঙ্কপ্পমঞ্ঞায, ভৱতে মধুসক্কৰা [মধুসক্খৰা (স্যা. ক.)];

চাতুদ্দীপা ইমে ৰুক্খা, পাদপা ধৰণীৰুহা.

৪৫. ‘‘মম সঙ্কপ্পমঞ্ঞায, কপ্পৰুক্খা ভৱন্তি তে;

পঞ্ঞাসক্খত্তুং দেৱিন্দো, দেৱৰজ্জমকাৰযিং.

৪৬. ‘‘একপঞ্ঞাসক্খত্তুঞ্চ, চক্কৱত্তী অহোসহং;

পদেসৰজ্জং ৱিপুলং, গণনাতো অসঙ্খিযং.

৪৭. ‘‘চতুন্নৱুতিতো [ছনৱুতে ইতো (সী.)] কপ্পে, যং দানমদদিং তদা;

দুগ্গতিং নাভিজানামি, ঘতমণ্ডস্সিদং ফলং.

৪৮. ‘‘কিলেসা ঝাপিতা ময্হং…পে… ৱিহৰামি অনাসৱো.

৪৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

৫০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ঘতমণ্ডদাযকো থেৰো ইমা গাথাযো

অভাসিত্থাতি.

ঘতমণ্ডদাযকত্থেৰস্সাপদানং ছট্ঠং.

৭. উদকদাযকত্থেৰঅপদানং

৫১. ‘‘পদুমুত্তৰবুদ্ধস্স, ভিক্খুসঙ্ঘে অনুত্তৰে;

পসন্নচিত্তো সুমনো, পানীঘটমপূৰযিং.

৫২. ‘‘পব্বতগ্গে দুমগ্গে ৱা, আকাসে ৱাথ ভূমিযং;

যদা পানীযমিচ্ছামি, খিপ্পং নিব্বত্ততে মম.

৫৩. ‘‘সতসহস্সিতো কপ্পে, যং দানমদদিং তদা;

দুগ্গতিং নাভিজানামি, দকদানস্সিদং ফলং.

৫৪. ‘‘কিলেসা ঝাপিতা ময্হং…পে… ৱিহৰামি অনাসৱো.

৫৫. ‘‘স্ৱাগতং ৱত মে আসি…পে… কতং বুদ্ধস্স সাসনং.

৫৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উদকদাযকো থেৰো ইমা গাথাযো

অভাসিত্থাতি.

উদকদাযকত্থেৰস্সাপদানং সত্তমং.

৮. পুলিনথূপিযত্থেৰঅপদানং

৫৭. ‘‘হিমৱন্তস্সাৱিদূৰে, যমকো নাম পব্বতো;

অস্সমো সুকতো ময্হং, পণ্ণসালা সুমাপিতা.

৫৮. ‘‘নাৰদো নাম নামেন, জটিলো উগ্গতাপনো;

চতুদ্দসসহস্সানি, সিস্সা পৰিচৰন্তি মং.

৫৯. ‘‘পটিসল্লীনকো সন্তো, এৱং চিন্তেসহং তদা;

‘সব্বো জনো মং পূজেতি, নাহং পূজেমি কিঞ্চনং.

৬০. ‘‘‘ন মে ওৱাদকো অত্থি, ৱত্তা কোচি ন ৱিজ্জতি;

অনাচৰিযুপজ্ঝাযো, ৱনে ৱাসং উপেমহং.

৬১. ‘‘‘উপাসমানো যমহং, গৰুচিত্তং উপট্ঠহে;

সো মে আচৰিযো নত্থি, ৱনৱাসো নিৰত্থকো.

৬২. ‘‘‘আযাগং মে গৱেসিস্সং, গৰুং ভাৱনিযং তথা;

সাৱস্সযো ৱসিস্সামি, ন কোচি গৰহিস্সতি’.

৬৩. ‘‘উত্তানকূলা নদিকা, সুপতিত্থা মনোৰমা;

সংসুদ্ধপুলিনাকিণ্ণা, অৱিদূৰে মমস্সমং.

৬৪. ‘‘নদিং অমৰিকং নাম, উপগন্ত্ৱানহং তদা;

সংৱড্ঢযিত্ৱা পুলিনং, অকং পুলিনচেতিযং.

৬৫. ‘‘যে তে অহেসুং সম্বুদ্ধা, ভৱন্তকৰণা মুনী;

তেসং এতাদিসো থূপো, তং নিমিত্তং কৰোমহং.

৬৬. ‘‘কৰিত্ৱা পুলিনং [পুড়িনে (সী. স্যা. পী.)] থূপং, সোৱণ্ণং মাপযিং অহং;

সোণ্ণকিঙ্কণিপুপ্ফানি, সহস্সে তীণি পূজযিং.

৬৭. ‘‘সাযপাতং নমস্সামি, ৱেদজাতো কতঞ্জলী;

সম্মুখা ৱিয সম্বুদ্ধং, ৱন্দিং পুলিনচেতিযং.

৬৮. ‘‘যদা কিলেসা জাযন্তি, ৱিতক্কা গেহনিস্সিতা;

সৰামি সুকতং থূপং, পচ্চৱেক্খামি তাৱদে.

৬৯. ‘‘উপনিস্সায ৱিহৰং, সত্থৱাহং ৱিনাযকং;

কিলেসে সংৱসেয্যাসি, ন যুত্তং তৱ মাৰিস.