৫. পঞ্চহত্থিযত্থেৰঅপদানং

৭৭. ‘‘সুমেধো নাম সম্বুদ্ধো, গচ্ছতে অন্তৰাপণে;

ওক্খিত্তচক্খু [খিত্তচক্খু (ক. সী. ক.)] মিতভাণী, সতিমা সংৱুতিন্দ্ৰিযো.

৭৮. ‘‘পঞ্চ উপ্পলহত্থানি, আৱেড়ত্থং অহংসু মে;

তেন বুদ্ধং অপূজেসিং, পসন্নো সেহি পাণিভি.

৭৯. ‘‘আৰোপিতা চ তে পুপ্ফা, ছদনং অস্সু সত্থুনো;

সমাধিংসু [সংসাৱিংসু (সী.)] মহানাগং, সিস্সা আচৰিযং যথা.

৮০. ‘‘তিংসকপ্পসহস্সম্হি, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

৮১. ‘‘ইতো ৱীসকপ্পসতে, অহেসুং পঞ্চ খত্তিযা;

হত্থিযা নাম নামেন, চক্কৱত্তী মহব্বলা.

৮২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পঞ্চহত্থিযো থেৰো ইমা গাথাযো অভাসিত্থাতি.

পঞ্চহত্থিযত্থেৰস্সাপদানং পঞ্চমং.