৮. তৰণিযত্থেৰঅপদানং

১৪৮. ‘‘অত্থদস্সী তু ভগৱা, সযম্ভূ লোকনাযকো;

ৱিনতা নদিযা তীৰং [তীৰে (স্যা. পী. ক.)], উপাগচ্ছি তথাগতো.

১৪৯. ‘‘উদকা অভিনিক্খম্ম, কচ্ছপো ৱাৰিগোচৰো;

বুদ্ধং তাৰেতুকামোহং, উপেসিং লোকনাযকং.

১৫০. ‘‘‘অভিৰূহতু মং বুদ্ধো, অত্থদস্সী মহামুনি;

অহং তং তাৰযিস্সামি, দুক্খস্সন্তকৰো তুৱং’.

১৫১. ‘‘মম সঙ্কপ্পমঞ্ঞায, অত্থদস্সী মহাযসো;

অভিৰূহিত্ৱা মে পিট্ঠিং, অট্ঠাসি লোকনাযকো.

১৫২. ‘‘যতো সৰামি অত্তানং, যতো পত্তোস্মি ৱিঞ্ঞুতং;

সুখং মে তাদিসং নত্থি, ফুট্ঠে পাদতলে যথা.

১৫৩. ‘‘উত্তৰিত্ৱান সম্বুদ্ধো, অত্থদস্সী মহাযসো;

নদীতীৰম্হি ঠত্ৱান, ইমা গাথা অভাসথ.

১৫৪. ‘‘‘যাৱতা ৱত্ততে চিত্তং, গঙ্গাসোতং তৰামহং;

অযঞ্চ কচ্ছপো ৰাজা, তাৰেসি মম পঞ্ঞৱা.

১৫৫. ‘‘‘ইমিনা বুদ্ধতৰণেন, মেত্তচিত্তৱতায চ;

অট্ঠাৰসে কপ্পসতে, দেৱলোকে ৰমিস্সতি.

১৫৬. ‘‘‘দেৱলোকা ইধাগন্ত্ৱা, সুক্কমূলেন চোদিতো;

একাসনে নিসীদিত্ৱা, কঙ্খাসোতং তৰিস্সতি.

১৫৭. ‘‘‘যথাপি ভদ্দকে খেত্তে, বীজং অপ্পম্পি ৰোপিতং;

সম্মাধাৰে পৱচ্ছন্তে, ফলং তোসেতি কস্সকং [কস্সকে (স্যা.)].

১৫৮. ‘‘‘তথেৱিদং বুদ্ধখেত্তং, সম্মাসম্বুদ্ধদেসিতং;

সম্মাধাৰে পৱচ্ছন্তে, ফলং মং তোসযিস্সতি’.

১৫৯. ‘‘পধানপহিতত্তোম্হি, উপসন্তো নিৰূপধি;

সব্বাসৱে পৰিঞ্ঞায, ৱিহৰামি অনাসৱো.

১৬০. ‘‘অট্ঠাৰসে কপ্পসতে, যং কম্মমকৰিং তদা;

দুগ্গতিং নাভিজানামি, তৰণায ইদং ফলং.

১৬১. ‘‘কিলেসা ঝাপিতা ময্হং…পে… ৱিহৰামি অনাসৱো.

১৬২. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৬৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তৰণিযো থেৰো ইমা গাথাযো

অভাসিত্থাতি.

তৰণিযত্থেৰস্সাপদানং অট্ঠমং.