৫. চন্দনমালিযত্থেৰঅপদানং

৭৫. ‘‘পঞ্চ কামগুণে হিত্ৱা, পিযৰূপে মনোৰমে;

অসীতিকোটিযো হিত্ৱা, পব্বজিং অনগাৰিযং.

৭৬. ‘‘পব্বজিত্ৱান কাযেন, পাপকম্মং ৱিৱজ্জযিং;

ৱচীদুচ্চৰিতং হিত্ৱা, নদীকূলে ৱসামহং.

৭৭. ‘‘এককং মং ৱিহৰন্তং, বুদ্ধসেট্ঠো উপাগমি;

নাহং জানামি বুদ্ধোতি, অকাসিং পটিসন্থৰং [পটিসন্ধাৰং (ক.)].

৭৮. ‘‘কৰিত্ৱা পটিসন্থাৰং, নামগোত্তমপুচ্ছহং;

‘দেৱতানুসি গন্ধব্বো, অদু সক্কো পুৰিন্দদো.

৭৯. ‘‘‘কো ৱা ত্ৱং কস্স ৱা পুত্তো, মহাব্ৰহ্মা ইধাগতো;

ৱিৰোচেসি দিসা সব্বা, উদযং সূৰিযো যথা.

৮০. ‘‘‘সহস্সাৰানি চক্কানি, পাদে দিস্সন্তি মাৰিস;

কো ৱা ত্ৱং কস্স ৱা পুত্তো, কথং জানেমু তং মযং;

নামগোত্তং পৱেদেহি, সংসযং অপনেহি মে’.

৮১. ‘‘‘নম্হি দেৱো ন গন্ধব্বো, নম্হি [নাপি (সী.)] সক্কো পুৰিন্দদো;

ব্ৰহ্মভাৱো চ মে নত্থি, এতেসং উত্তমো অহং.

৮২. ‘‘‘অতীতো ৱিসযং তেসং, দালযিং কামবন্ধনং;

সব্বে কিলেসে ঝাপেত্ৱা, পত্তো সম্বোধিমুত্তমং’.

৮৩. ‘‘তস্স ৱাচং সুণিত্ৱাহং, ইদং ৱচনমব্ৰৱিং;

‘যদি বুদ্ধোতি সব্বঞ্ঞূ, নিসীদ ত্ৱং মহামুনে.

৮৪. ‘তমহং পূজযিস্সামি, দুক্খস্সন্তকৰো তুৱং’;

‘‘পত্থৰিত্ৱা জিনচম্মং, অদাসি সত্থুনো অহং.

৮৫. ‘‘নিসীদি তত্থ ভগৱা, সীহোৱ গিৰিগব্ভৰে;

খিপ্পং পব্বতমাৰুয্হ, অম্বস্স ফলমগ্গহিং.

৮৬. ‘‘সালকল্যাণিকং পুপ্ফং, চন্দনঞ্চ মহাৰহং;

খিপ্পং পগ্গয্হ তং সব্বং, উপেত্ৱা লোকনাযকং.

৮৭. ‘‘ফলং বুদ্ধস্স দত্ৱান, সালপুপ্ফমপূজযিং;

চন্দনং অনুলিম্পিত্ৱা, অৱন্দিং সত্থুনো অহং.

৮৮. ‘‘পসন্নচিত্তো সুমনো, ৱিপুলায চ পীতিযা;

অজিনম্হি নিসীদিত্ৱা, সুমেধো লোকনাযকো.

৮৯. ‘‘মম কম্মং পকিত্তেসি, হাসযন্তো মমং তদা;

‘ইমিনা ফলদানেন, গন্ধমালেহি চূভযং.

৯০. ‘‘‘পঞ্চৱীসে কপ্পসতে, দেৱলোকে ৰমিস্সতি;

অনূনমনসঙ্কপ্পো, ৱসৱত্তী ভৱিস্সতি.

৯১. ‘‘‘ছব্বীসতিকপ্পসতে, মনুস্সত্তং গমিস্সতি;

ভৱিস্সতি চক্কৱত্তী, চাতুৰন্তো মহিদ্ধিকো.

৯২. ‘‘‘ৱেভাৰং নাম নগৰং, ৱিস্সকম্মেন মাপিতং;

হেস্সতি সব্বসোৱণ্ণং, নানাৰতনভূসিতং.

৯৩. ‘‘‘এতেনেৱ উপাযেন, সংসৰিস্সতি সো ভৱে [যোনিসো (স্যা. পী.)];

সব্বত্থ পূজিতো হুত্ৱা, দেৱত্তে অথ মানুসে.

৯৪. ‘‘‘পচ্ছিমে ভৱে সম্পত্তে, ব্ৰহ্মবন্ধু ভৱিস্সতি;

অগাৰা অভিনিক্খম্ম, অনগাৰী ভৱিস্সতি;

অভিঞ্ঞাপাৰগূ হুত্ৱা, নিব্বাযিস্সতিনাসৱো’.

৯৫. ‘‘ইদং ৱত্ৱান সম্বুদ্ধো, সুমেধো লোকনাযকো;

মম নিজ্ঝাযমানস্স, পক্কামি অনিলঞ্জসে.

৯৬. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৯৭. ‘‘তুসিততো চৱিত্ৱান, নিব্বত্তিং মাতুকুচ্ছিযং;

ভোগে মে ঊনতা নত্থি, যম্হি গব্ভে ৱসামহং.

৯৮. ‘‘মাতুকুচ্ছিগতে মযি, অন্নপানঞ্চ ভোজনং;

মাতুযা মম ছন্দেন, নিব্বত্ততি যদিচ্ছকং.

৯৯. ‘‘জাতিযা পঞ্চৱস্সেন, পব্বজিং অনগাৰিযং;

ওৰোপিতম্হি কেসম্হি, অৰহত্তমপাপুণিং.

১০০. ‘‘পুব্বকম্মং গৱেসন্তো, ওৰেন নাদ্দসং অহং;

তিংসকপ্পসহস্সম্হি, মম কম্মমনুস্সৰিং.

১০১. ‘‘নমো তে পুৰিসাজঞ্ঞ, নমো তে পুৰিসুত্তম;

তৱ সাসনমাগম্ম, পত্তোম্হি অচলং পদং.

১০২. ‘‘তিংসকপ্পসহস্সম্হি, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১০৩. ‘‘কিলেসা ঝাপিতা ময্হং…পে… ৱিহৰামি অনাসৱো.

১০৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

১০৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা চন্দনমালিযো থেৰো ইমা গাথাযো

অভাসিত্থাতি.

চন্দনমালিযত্থেৰস্সাপদানং পঞ্চমং.