১. পংসুকূলসঞ্ঞকত্থেৰঅপদানং

১. ‘‘তিস্সো নামাসি ভগৱা, সযম্ভূ অগ্গপুগ্গলো;

পংসুকূলং ঠপেত্ৱান, ৱিহাৰং পাৱিসী জিনো.

২. ‘‘ৱিনতং [সজ্জিতং (স্যা.), তিযন্তং (পী.)] ধনুমাদায, ভক্খত্থায চৰিং অহং;

মণ্ডলগ্গং গহেত্ৱান, কাননং পাৱিসিং অহং.

৩. ‘‘তত্থদ্দসং পংসুকূলং, দুমগ্গে লগ্গিতং তদা;

চাপং তত্থেৱ নিক্খিপ্প, সিৰে কত্ৱান অঞ্জলিং.

৪. ‘‘পসন্নচিত্তো সুমনো, ৱিপুলায চ পীতিযা;

বুদ্ধসেট্ঠং সৰিত্ৱান, পংসুকূলং অৱন্দহং.

৫. ‘‘দ্ৱেনৱুতে ইতো কপ্পে, পংসুকূলমৱন্দহং;

দুগ্গতিং নাভিজানামি, ৱন্দনায ইদং ফলং.

৬. ‘‘কিলেসা ঝাপিতা ময্হং, ভৱা সব্বে সমূহতা;

নাগোৱ বন্ধনং ছেত্ৱা, ৱিহৰামি অনাসৱো.

৭. ‘‘স্ৱাগতং ৱত মে আসি, মম বুদ্ধস্স সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

৮. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা পংসুকূলসঞ্ঞকো থেৰো ইমা গাথাযো

অভাসিত্থাতি.

পংসুকূলসঞ্ঞকত্থেৰস্সাপদানং পঠমং.