৬. ঘতমণ্ডদাযকত্থেৰঅপদানং

৭৮. ‘‘সুচিন্তিতং ভগৱন্তং, লোকজেট্ঠং নৰাসভং;

উপৱিট্ঠং মহাৰঞ্ঞং, ৱাতাবাধেন পীড়িতং.

৭৯. ‘‘দিস্ৱা চিত্তং পসাদেত্ৱা, ঘতমণ্ডমুপানযিং;

কতত্তা আচিতত্তা চ, গঙ্গা ভাগীৰথী অযং.

৮০. ‘‘মহাসমুদ্দা চত্তাৰো, ঘতং সম্পজ্জৰে মম;

অযঞ্চ পথৱী ঘোৰা, অপ্পমাণা অসঙ্খিযা.

৮১. ‘‘মম সঙ্কপ্পমঞ্ঞায, ভৱতে মধুসক্কৰা;

চাতুদ্দীপা [চতুদ্দিসা (স্যা.)] ইমে ৰুক্খা, পাদপা ধৰণীৰুহা.

৮২. ‘‘মম সঙ্কপ্পমঞ্ঞায, কপ্পৰুক্খা ভৱন্তি তে;

পঞ্ঞাসক্খত্তুং দেৱিন্দো, দেৱৰজ্জমকাৰযিং.

৮৩. ‘‘একপঞ্ঞাসক্খত্তুঞ্চ, চক্কৱত্তী অহোসহং;

পদেসৰজ্জং ৱিপুলং, গণনাতো অসঙ্খিযং.

৮৪. ‘‘চতুন্নৱুতিতো কপ্পে, যং দানমদদিং তদা;

দুগ্গতিং নাভিজানামি, ঘতমণ্ডস্সিদং ফলং.

৮৫. ‘‘কিলেসা ঝাপিতা ময্হং…পে… ৱিহৰামি অনাসৱো.

৮৬. ‘‘স্ৱাগতং ৱত মে আসি…পে… কতং বুদ্ধস্স সাসনং.

৮৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ঘতমণ্ডদাযকো থেৰো ইমা গাথাযো

অভাসিত্থাতি.

ঘতমণ্ডদাযকত্থেৰস্সাপদানং ছট্ঠং.