৯. সব্বদাযকত্থেৰঅপদানং

৪৫৬. ‘‘মহাসমুদ্দং ওগয্হ, ভৱনং মে সুনিম্মিতং;

সুনিম্মিতা পোক্খৰণী, চক্কৱাকপকূজিতা.

৪৫৭. ‘‘মন্দালকেহি সঞ্ছন্না, পদুমুপ্পলকেহি চ;

নদী চ সন্দতে তত্থ, সুপতিত্থা মনোৰমা.

৪৫৮. ‘‘মচ্ছকচ্ছপসঞ্ছন্না, নানাদিজসমোত্থতা;

মযূৰকোঞ্চাভিৰুদা, কোকিলাদীহি ৱগ্গুহি.

৪৫৯. ‘‘পাৰেৱতা ৰৱিহংসা চ, চক্কৱাকা নদীচৰা;

দিন্দিভা সাড়িকা চেত্থ, পম্মকা [পম্পকা (সী.), চপ্পকা (স্যা.)] জীৱজীৱকা.

৪৬০. ‘‘হংসা কোঞ্চাপি নদিতা [কোঞ্চাভিনদিতা (সী. স্যা.)], কোসিযা পিঙ্গলা বহূ;

সত্তৰতনসম্পন্না, মণিমুত্তিকৱালুকা.

৪৬১. ‘‘সব্বসোণ্ণমযা ৰুক্খা, নানাগন্ধসমেৰিতা;

উজ্জোতেন্তি দিৱাৰত্তিং, ভৱনং সব্বকালিকং.

৪৬২. ‘‘সট্ঠি তূৰিযসহস্সানি, সাযং পাতো পৱজ্জৰে;

সোড়সিত্থিসহস্সানি, পৰিৱাৰেন্তি মং সদা.

৪৬৩. ‘‘অভিনিক্খম্ম ভৱনা, সুমেধং লোকনাযকং;

পসন্নচিত্তো সুমনো, ৱন্দযিং তং মহাযসং.

৪৬৪. ‘‘সম্বুদ্ধং অভিৱাদেত্ৱা, সসঙ্ঘং তং নিমন্তযিং;

অধিৱাসেসি সো ধীৰো, সুমেধো লোকনাযকো.

৪৬৫. ‘‘মম ধম্মকথং কত্ৱা, উয্যোজেসি মহামুনি;

সম্বুদ্ধং অভিৱাদেত্ৱা, ভৱনং মে উপাগমিং.

৪৬৬. ‘‘আমন্তযিং পৰিজনং, সব্বে সন্নিপতাথ [সন্নিপতত্থ (ক.)] ৱো;

পুব্বণ্হসমযং বুদ্ধো, ভৱনং আগমিস্সতি.

৪৬৭. ‘‘লাভা অম্হং সুলদ্ধং নো, যে ৱসাম তৱন্তিকে;

মযম্পি বুদ্ধসেট্ঠস্স, পূজং কস্সাম সত্থুনো.

৪৬৮. ‘‘অন্নপনং পট্ঠপেত্ৱা, কালং আৰোচযিং অহং;

ৱসীসতসহস্সেহি, উপেসি লোকনাযকো.

৪৬৯. ‘‘পঞ্চঙ্গিকেহি তূৰিযেহি, পচ্চুগ্গমনমকাসহং;

সব্বসোণ্ণমযে পীঠে, নিসীদি পুৰিসুত্তমো.

৪৭০. ‘‘উপৰিচ্ছদনং আসি, সব্বসোণ্ণমযং তদা;

বীজনিযো পৱাযন্তি, ভিক্খুসঙ্ঘস্স অন্তৰে.

৪৭১. ‘‘পহূতেনন্নপানেন, ভিক্খুসঙ্ঘমতপ্পযিং;

পচ্চেকদুস্সযুগড়ে, ভিক্খুসঙ্ঘস্সদাসহং.

৪৭২. ‘‘যং ৱদন্তি সুমেধোতি, লোকাহুতিপটিগ্গহং;

ভিক্খুসঙ্ঘে নিসীদিত্ৱা, ইমা গাথা অভাসথ.

৪৭৩. ‘‘যো মে অন্নেন পানেন, সব্বে ইমে চ তপ্পযিং;

তমহং কিত্তযিস্সামি, সুণাথ মম ভাসতো.

৪৭৪. ‘‘অট্ঠাৰসে কপ্পসতে, দেৱলোকে ৰমিস্সতি;

সহস্সক্খত্তুং ৰাজা চ, চক্কৱত্তী ভৱিস্সতি.

৪৭৫. ‘‘উপ্পজ্জতি [উপগচ্ছতি (সী.)] যং যোনিং, দেৱত্তং অথ মানুসং;

সব্বদা সব্বসোৱণ্ণং, ছদনং ধাৰযিস্সতি.

৪৭৬. ‘‘তিংসকপ্পসহস্সম্হি, ওক্কাককুসলসম্ভৱো;

গোতমো নাম গোত্তেন, সত্থা লোকে ভৱিস্সতি.

৪৭৭. ‘‘তস্স ধম্মেসু দাযাদো, ওৰসো ধম্মনিম্মিতো;

সব্বাসৱে পৰিঞ্ঞায, নিব্বাযিস্সতিনাসৱো.

৪৭৮. ‘‘‘ভিক্খুসঙ্ঘে নিসীদিত্ৱা, সীহনাদং নদিস্সতি;

চিতকে ছত্তং ধাৰেন্তি, হেট্ঠা ছত্তম্হি ডয্হথ’.

৪৭৯. ‘‘সামঞ্ঞং মে অনুপ্পত্তং, কিলেসা ঝাপিতা মযা;

মণ্ডপে ৰুক্খমূলে ৱা, সন্তাপো মে ন ৱিজ্জতি.

৪৮০. ‘‘তিংসকপ্পসহস্সম্হি, যং দানমদদিং তদা;

দুগ্গতিং নাভিজানামি, সব্বদানস্সিদং ফলং.

৪৮১. ‘‘কিলেসা ঝাপিতা ময্হং…পে… ৱিহৰামি অনাসৱো.

৪৮২. ‘‘স্ৱাগতং ৱত মে আসি…পে… কতং বুদ্ধস্স সাসনং.

৪৮৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সব্বদাযকো থেৰো ইমা গাথাযো অভাসিত্থাতি.

সব্বদাযকত্থেৰস্সাপদানং নৱমং.