১০. অজিতত্থেৰঅপদানং

৪৮৪. ‘‘পদুমুত্তৰো নাম জিনো, সব্বধম্মান পাৰগূ;

অজ্ঝোগাহেত্ৱা হিমৱন্তং, নিসীদি লোকনাযকো.

৪৮৫. ‘‘নাহং অদ্দক্খিং [পস্সামি (?)] সম্বুদ্ধং, নপি সদ্দং সুণোমহং;

মম ভক্খং গৱেসন্তো, আহিণ্ডামি ৱনে অহং [তদা (সী.)].

৪৮৬. ‘‘তত্থদ্দস্সাসিং সম্বুদ্ধং, দ্ৱত্তিংসৱৰলক্খণং;

দিস্ৱান ৱিত্তিমাপজ্জিং [চিত্তমাপজ্জি (সী.), চিত্তমাপজ্জিং (স্যা.)], সত্তো কো নামযং ভৱে.

৪৮৭. ‘‘লক্খণানি ৱিলোকেত্ৱা, মম ৱিজ্জং অনুস্সৰিং;

সুতঞ্হি মেতং ৱুড্ঢানং, পণ্ডিতানং সুভাসিতং.

৪৮৮. ‘‘তেসং যথা তং ৱচনং, অযং বুদ্ধো ভৱিস্সতি;

যংনূনাহং সক্কৰেয্যং, গতিং মে সোধযিস্সতি.

৪৮৯. ‘‘খিপ্পং অস্সমমাগন্ত্ৱা, মধুতেলং গহিং অহং;

কোলম্বকং গহেত্ৱান, উপগচ্ছিং ৱিনাযকং [নৰাসভং (সী.)].

৪৯০. ‘‘তিদণ্ডকে গহেত্ৱান, অব্ভোকাসে ঠপেসহং;

পদীপং পজ্জলিত্ৱান, অট্ঠক্খত্তুং অৱন্দহং.

৪৯১. ‘‘সত্তৰত্তিন্দিৱং বুদ্ধো, নিসীদি পুৰিসুত্তমো;

ততো ৰত্যা ৱিৱসানে, ৱুট্ঠাসি লোকনাযকো.

৪৯২. ‘‘পসন্নচিত্তো সুমনো, সব্বৰত্তিন্দিৱং অহং;

দীপং বুদ্ধস্স পাদাসিং, পসন্নো সেহি পাণিভি.

৪৯৩. ‘‘সব্বে ৱনা গন্ধমযা, পব্বতে গন্ধমাদনে;

বুদ্ধস্স আনুভাৱেন, আগচ্ছুং বুদ্ধসন্তিকং [উপগচ্ছুং তদা জিনং (সী.)].

৪৯৪. ‘‘যে কেচি পুপ্ফগন্ধাসে, পুপ্ফিতা ধৰণীৰুহা;

বুদ্ধস্স আনুভাৱেন, সব্বে সন্নিপতুং তদা.

৪৯৫. ‘‘যাৱতা হিমৱন্তম্হি, নাগা চ গৰুড়া উভো;

ধম্মঞ্চ সোতুকামা তে, আগচ্ছুং বুদ্ধসন্তিকং.

৪৯৬. ‘‘দেৱলো নাম সমণো, বুদ্ধস্স অগ্গসাৱকো;

ৱসীসতসহস্সেহি, বুদ্ধসন্তিকুপাগমি.

৪৯৭. ‘‘পদুমুত্তৰো লোকৱিদূ, আহুতীনং পটিগ্গহো;

ভিক্খুসঙ্ঘে নিসীদিত্ৱা, ইমা গাথা অভাসথ.

৪৯৮. ‘‘‘যো মে দীপং পদীপেসি, পসন্নো সেহি পাণিভি;

তমহং কিত্তযিস্সামি, সুণাথ মম ভাসতো.

৪৯৯. ‘‘‘সট্ঠি কপ্পসহস্সানি, দেৱলোকে ৰমিস্সতি;

সহস্সক্খত্তুং ৰাজা চ, চক্কৱত্তী ভৱিস্সতি.

সোড়সমং ভাণৱাৰং.

৫০০. ‘‘‘ছত্তিসক্খত্তুং দেৱিন্দো, দেৱৰজ্জং কৰিস্সতি;

পথৱিযং সত্তসতং, ৱিপুলং ৰজ্জং কৰিস্সতি.

৫০১. ‘‘‘পদেসৰজ্জং ৱিপুলং, গণনাতো অসঙ্খিযং;

ইমিনা দীপদানেন, দিব্বচক্খু ভৱিস্সতি.

৫০২. ‘‘‘সমন্ততো অট্ঠকোসং [অড্ঢকোসং (সী. স্যা.)], পস্সিস্সতি অযং সদা;

দেৱলোকা চৱন্তস্স, নিব্বত্তন্তস্স জন্তুনো.

৫০৩. ‘‘‘দিৱা ৱা যদি ৱা ৰত্তিং, পদীপং ধাৰযিস্সতি;

জাযমানস্স সত্তস্স, পুঞ্ঞকম্মসমঙ্গিনো.

৫০৪. ‘‘‘যাৱতা নগৰং আসি, তাৱতা জোতযিস্সতি;

উপপজ্জতি যং যোনিং, দেৱত্তং অথ মানুসং.

৫০৫. ‘‘‘অস্সেৱ দীপদানস্স, [অট্ঠদীপফলেন হি; উপট্ঠিস্সন্তিমং জন্তুং (স্যা.), অট্ঠ দীপা ফলেন হি; ন জহিস্সন্তি’মং জন্তুং (?)] অট্ঠদীপফলেন হি;

ন জযিস্সন্তিমং জন্তূ [অট্ঠদীপফলেন হি; উপট্ঠিস্সন্তিমং জন্তুং (স্যা.), অট্ঠ দীপা ফলেন হি; ন জহিস্সন্তি’মং জন্তুং (?)], দীপদানস্সিদং ফলং.

৫০৬. ‘‘‘কপ্পসতসহস্সম্হি, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৫০৭. ‘‘‘তস্স ধম্মেসু দাযাদো, ওৰসো ধম্মনিম্মিতো;

সব্বাসৱে পৰিঞ্ঞায, নিব্বাযিস্সতিনাসৱো.

৫০৮. ‘‘‘তোসযিত্ৱান সম্বুদ্ধং, গোতমং সক্যপুঙ্গৱং;

অজিতো নাম নামেন, হেস্সতি সত্থু সাৱকো’.

৫০৯. ‘‘সট্ঠি কপ্পসহস্সানি, দেৱলোকে ৰমিং অহং;

তত্ৰাপি মে দীপসতং, জোততে নিচ্চকালিকং [সব্বকালিকং (সী.)].

৫১০. ‘‘দেৱলোকে মনুস্সে ৱা, নিদ্ধাৱন্তি পভা মম;

বুদ্ধসেট্ঠং সৰিত্ৱান, ভিয্যো হাসং জনেসহং.

৫১১. ‘‘তুসিতাহং চৱিত্ৱান, ওক্কমিং মাতুকুচ্ছিযং;

জাযমানস্স সন্তস্স, আলোকো ৱিপুলো অহু.

৫১২. ‘‘অগাৰা অভিনিক্খম্ম, পব্বজিং অনগাৰিযং;

বাৱৰিং উপসঙ্কম্ম, সিস্সত্তং অজ্ঝুপাগমিং.

৫১৩. ‘‘হিমৱন্তে ৱসন্তোহং, অস্সোসিং লোকনাযকং;

উত্তমত্থং গৱেসন্তো, উপগচ্ছিং ৱিনাযকং.

৫১৪. ‘‘দন্তো বুদ্ধো দমেতাৱী, ওঘতিণ্ণো নিৰূপধি;

নিব্বানং কথযী বুদ্ধো, সব্বদুক্খপ্পমোচনং.

৫১৫. ‘‘তং মে আগমনং সিদ্ধং, তোসিতোহং মহামুনিং;

তিস্সো ৱিজ্জা অনুপ্পত্তা, কতং বুদ্ধস্স সাসনং.

৫১৬. ‘‘সতসহস্সিতো কপ্পে, যং দীপমদদিং তদা;

দুগ্গতিং নাভিজানামি, দীপদানস্সিদং ফলং.

৫১৭. ‘‘কিলেসা ঝাপিতা ময্হং…পে… ৱিহৰামি অনাসৱো.

৫১৮. ‘‘স্ৱাগতং ৱত মে আসি…পে… কতং বুদ্ধস্স সাসনং.

৫১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অজিতো থেৰো ইমা গাথাযো অভাসিত্থাতি.

অজিতত্থেৰস্সাপদানং দসমং.

পিলিন্দৱচ্ছৱগ্গো চত্তালীসমো.

তস্সুদ্দানং –

পিলিন্দৱচ্ছো সেলো চ, সব্বকিত্তী মধুংদদো;

কূটাগাৰী বাকুলো চ, গিৰি সড়লসৱ্হযো.

সব্বদো অজিতো চেৱ, গাথাযো গণিতা ইহ;

সতানি পঞ্চ গাথানং, ৱীসতি চ তদুত্তৰীতি.

অথ ৱগ্গুদ্দানং –

পদুমাৰক্খদো চেৱ, উমা গন্ধোদকেন চ;

একপদ্ম সদ্দসঞ্ঞী, মন্দাৰং বোধিৱন্দকো.

অৱটঞ্চ পিলিন্দি [এৱমেৱ দিস্সতি] চ, গাথাযো গণিতা ইহ;

চতুসত্ততি গাথাযো, একাদস সতানি চ.

পদুমৱগ্গদসকং.