৬. বাকুলত্থেৰঅপদানং

৩৮৬. ‘‘হিমৱন্তস্সাৱিদূৰে, সোভিতো নাম পব্বতো;

অস্সমো সুকতো ময্হং, সকসিস্সেহি মাপিতো.

৩৮৭. ‘‘মণ্ডপা চ বহূ তত্থ, পুপ্ফিতা সিন্দুৱাৰকা;

কপিত্থা চ বহূ তত্থ, পুপ্ফিতা জীৱজীৱকা [চম্পকা নাগকেতকা (স্যা.)].

৩৮৮. ‘‘নিগ্গুণ্ডিযো বহূ তত্থ, বদৰামলকানি চ;

ফাৰুসকা অলাবূ চ, পুণ্ডৰীকা চ পুপ্ফিতা.

৩৮৯. ‘‘আড়কা [অড়ক্কা (স্যা.)] বেলুৱা তত্থ, কদলী মাতুলুঙ্গকা;

মহানামা বহূ তত্থ, অজ্জুনা চ পিযঙ্গুকা.

৩৯০. ‘‘কোসম্বা সড়লা নিম্বা [নীপা (সী.)], নিগ্ৰোধা চ কপিত্থনা;

এদিসো অস্সমো ময্হং, সসিস্সোহং তহিং ৱসিং.

৩৯১. ‘‘অনোমদস্সী ভগৱা, সযম্ভূ লোকনাযকো;

গৱেসং পটিসল্লানং, মমস্সমমুপাগমি.

৩৯২. ‘‘উপেতম্হি মহাৱীৰে, অনোমদস্সিমহাযসে;

খণেন লোকনাথস্স, ৱাতাবাধো সমুট্ঠহি.

৩৯৩. ‘‘ৱিচৰন্তো অৰঞ্ঞম্হি, অদ্দসং লোকনাযকং;

উপগন্ত্ৱান সম্বুদ্ধং, চক্খুমন্তং মহাযসং.

৩৯৪. ‘‘ইৰিযঞ্চাপি দিস্ৱান, উপলক্খেসহং তদা;

অসংসযঞ্হি বুদ্ধস্স, ব্যাধি নো উদপজ্জথ.

৩৯৫. ‘‘খিপ্পং অস্সমমাগঞ্ছিং, মম সিস্সান সন্তিকে;

ভেসজ্জং কত্তুকামোহং, সিস্সে আমন্তযিং তদা.

৩৯৬. ‘‘পটিস্সুণিত্ৱান মে ৱাক্যং, সিস্সা সব্বে সগাৰৱা;

একজ্ঝং সন্নিপতিংসু, সত্থুগাৰৱতা মম.

৩৯৭. ‘‘খিপ্পং পব্বতমাৰুয্হ, সব্বোসধমহাসহং [মকাসহং (স্যা. ক.)];

পানীযযোগং [পানীযযোগ্গং (সী.)] কত্ৱান, বুদ্ধসেট্ঠস্সদাসহং.

৩৯৮. ‘‘পৰিভুত্তে মহাৱীৰে, সব্বঞ্ঞুলোকনাযকে;

খিপ্পং ৱাতো ৱূপসমি, সুগতস্স মহেসিনো.

৩৯৯. ‘‘পস্সদ্ধং দৰথং দিস্ৱা, অনোমদস্সী মহাযসো;

সকাসনে নিসীদিত্ৱা, ইমা গাথা অভাসথ.

৪০০. ‘‘‘যো মে পাদাসি ভেসজ্জং, ব্যাধিঞ্চ সমযী মম;

তমহং কিত্তযিস্সামি, সুণাথ মম ভাসতো.

৪০১. ‘‘‘কপ্পসতসহস্সানি, দেৱলোকে ৰমিস্সতি;

ৱাদিতে তূৰিযে তত্থ, মোদিস্সতি সদা অযং.

৪০২. ‘‘‘মনুস্সলোকমাগন্ত্ৱা, সুক্কমূলেন চোদিতো;

সহস্সক্খত্তুং ৰাজা চ, চক্কৱত্তী ভৱিস্সতি.

৪০৩. ‘‘‘পঞ্চপঞ্ঞাসকপ্পম্হি, অনোমো নাম খত্তিযো;

চাতুৰন্তো ৱিজিতাৱী, জম্বুমণ্ডস্স [জম্বুদীপস্স (স্যা.)] ইস্সৰো.

৪০৪. ‘‘‘সত্তৰতনসম্পন্নো, চক্কৱত্তী মহব্বলো;

তাৱতিংসেপি খোভেত্ৱা, ইস্সৰং কাৰযিস্সতি.

৪০৫. ‘‘‘দেৱভূতো মনুস্সো ৱা, অপ্পাবাধো ভৱিস্সতি;

পৰিগ্গহং ৱিৱজ্জেত্ৱা, ব্যাধিং লোকে তৰিস্সতি.

৪০৬. ‘‘‘অপ্পৰিমেয্যে ইতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৪০৭. ‘‘‘তস্স ধম্মেসু দাযাদো, ওৰসো ধম্মনিম্মিতো;

সব্বাসৱে পৰিঞ্ঞায, নিব্বাযিস্সতিনাসৱো.

৪০৮. ‘‘‘কিলেসে ঝাপযিত্ৱান, তণ্হাসোতং তৰিস্সতি;

বাকুলো [বক্কুলো (সী. স্যা.)] নাম নামেন, হেস্সতি সত্থু সাৱকো.

৪০৯. ‘‘‘ইদং সব্বং অভিঞ্ঞায, গোতমো সক্যপুঙ্গৱো;

ভিক্খুসঙ্ঘে নিসীদিত্ৱা, এতদগ্গে ঠপেস্সতি’.

৪১০. ‘‘অনোমদস্সী ভগৱা, সযম্ভূ লোকনাযকো;

ৱিৱেকানুৱিলোকেন্তো, মমস্সমমুপাগমি.

৪১১. ‘‘উপাগতং মহাৱীৰং, সব্বঞ্ঞুং লোকনাযকং;

সব্বোসধেন তপ্পেসিং, পসন্নো সেহি পাণিভি.

৪১২. ‘‘তস্স মে সুকতং কম্মং, সুখেত্তে বীজসম্পদা;

খেপেতুং নেৱ সক্কোমি, তদা হি সুকতং মম.

৪১৩. ‘‘লাভা মম সুলদ্ধং মে, যোহং অদ্দক্খি নাযকং;

তেন কম্মাৱসেসেন, পত্তোম্হি অচলং পদং.

৪১৪. ‘‘সব্বমেতং অভিঞ্ঞায, গোতমো সক্যপুঙ্গৱো;

ভিক্খুসঙ্ঘে নিসীদিত্ৱা, এতদগ্গে ঠপেসি মং.

৪১৫. ‘‘অপৰিমেয্যে ইতো কপ্পে, যং কম্মমকৰিং তদা;

দুগ্গতিং নাভিজানামি, ভেসজ্জস্স ইদং ফলং.

৪১৬. ‘‘কিলেসা ঝাপিতা ময্হং, ভৱা সব্বে সমূহতা;

সব্বাসৱা পৰিক্খীণা, নত্থি দানি পুনব্ভৱো.

৪১৭. ‘‘স্ৱাগতং ৱত মে আসি…পে… কতং বুদ্ধস্স সাসনং.

৪১৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বাকুলো [বক্কুলো (সী. স্যা.)] থেৰো ইমা গাথাযো অভাসিত্থাতি;

বাকুলত্থেৰস্সাপদানং ছট্ঠং.