৭. গিৰিমানন্দত্থেৰঅপদানং

৪১৯. ‘‘ভৰিযা মে কালঙ্কতা, পুত্তো সীৱথিকং গতো;

মাতা পিতা মতা ভাতা, একচিতম্হি [মাতা পিতা চ ভাতা চ, একচিতকম্হি (সী. স্যা.)] ডয্হৰে.

৪২০. ‘‘তেন সোকেন সন্তত্তো, কিসো পণ্ডু অহোসহং;

চিত্তক্খেপো চ মে আসি, তেন সোকেন অট্টিতো.

৪২১. ‘‘সোকসল্লপৰেতোহং, ৱনন্তমুপসঙ্কমিং;

পৱত্তফলং ভুঞ্জিত্ৱা, ৰুক্খমূলে ৱসামহং.

৪২২. ‘‘সুমেধো নাম সম্বুদ্ধো, দুক্খস্সন্তকৰো জিনো;

মমুদ্ধৰিতুকামো সো, আগঞ্ছি মম সন্তিকং.

৪২৩. ‘‘পদসদ্দং সুণিত্ৱান, সুমেধস্স মহেসিনো;

পগ্গহেত্ৱানহং সীসং, উল্লোকেসিং মহামুনিং.

৪২৪. ‘‘উপাগতে মহাৱীৰে, পীতি মে উদপজ্জথ;

তদাসিমেকগ্গমনো, দিস্ৱা তং লোকনাযকং.

৪২৫. ‘‘সতিং পটিলভিত্ৱান, পণ্ণমুট্ঠিমদাসহং;

নিসীদি ভগৱা তত্থ, অনুকম্পায চক্খুমা.

৪২৬. ‘‘নিসজ্জ তত্থ ভগৱা, সুমেধো লোকনাযকো;

ধম্মং মে কথযী বুদ্ধো, সোকসল্লৱিনোদনং.

৪২৭. ‘‘‘অনৱ্হিতা ততো আগুং, অননুঞ্ঞাতা ইতো গতা;

যথাগতা তথা গতা, তত্থ কা পৰিদেৱনা.

৪২৮. ‘‘‘যথাপি পথিকা সত্তা, ৱস্সমানায ৱুট্ঠিযা;

সভণ্ডা উপগচ্ছন্তি, ৱস্সস্সাপতনায তে.

৪২৯. ‘‘‘ৱস্সে চ তে ওৰমিতে, সম্পযন্তি যদিচ্ছকং;

এৱং মাতা পিতা তুয্হং, তত্থ কা পৰিদেৱনা.

৪৩০. ‘‘‘আগন্তুকা পাহুনকা, চলিতেৰিতকম্পিতা;

এৱং মাতা পিতা তুয্হং, তত্থ কা পৰিদেৱনা.

৪৩১. ‘‘‘যথাপি উৰগো জিণ্ণং, হিত্ৱা গচ্ছতি সং তচং [সংতনুং (স্যা. ক.)];

এৱং মাতা পিতা তুয্হং, সং তনুং ইধ হীযৰে’.

৪৩২. ‘‘বুদ্ধস্স গিৰমঞ্ঞায, সোকসল্লং ৱিৱজ্জযিং;

পামোজ্জং জনযিত্ৱান, বুদ্ধসেট্ঠং অৱন্দহং.

৪৩৩. ‘‘ৱন্দিত্ৱান মহানাগং, পূজযিং গিৰিমঞ্জৰিং [গিৰিমঞ্জৰিমপূজযিং (সী. স্যা.)];

দিব্বগন্ধং সম্পৱন্তং [দিব্বগন্ধেন সম্পন্নং (সী. স্যা.)], সুমেধং লোকনাযকং.

৪৩৪. ‘‘পূজযিত্ৱান সম্বুদ্ধং, সিৰে কত্ৱান অঞ্জলিং;

অনুস্সৰং গুণগ্গানি, সন্থৱিং লোকনাযকং.

৪৩৫. ‘‘নিত্তিণ্ণোসি [নিত্তণ্হোসি (সী.), ৱিতিণ্ণোসি (স্যা.)] মহাৱীৰ, সব্বঞ্ঞু লোকনাযক;

সব্বে সত্তে উদ্ধৰসি, ঞাণেন ত্ৱং মহামুনে.

৪৩৬. ‘‘ৱিমতিং দ্ৱেড়্হকং ৱাপি, সঞ্ছিন্দসি মহামুনে;

পটিপাদেসি মে মগ্গং, তৱ ঞাণেন চক্খুম.

৪৩৭. ‘‘অৰহা ৱসিপত্তা [সিদ্ধিপত্তা (সী. স্যা.)] চ, ছড়ভিঞ্ঞা মহিদ্ধিকা;

অন্তলিক্খচৰা ধীৰা, পৰিৱাৰেন্তি তাৱদে.

৪৩৮. ‘‘পটিপন্না চ সেখা চ, ফলট্ঠা সন্তি সাৱকা;

সূৰোদযেৱ পদুমা, পুপ্ফন্তি তৱ সাৱকা.

৪৩৯. ‘‘মহাসমুদ্দোৱক্খোভো, অতুলোপি [যথা সমুদ্দো অক্খোভো, অতুলো চ (সী.)] দুৰুত্তৰো;

এৱং ঞাণেন সম্পন্নো, অপ্পমেয্যোসি চক্খুম.

৪৪০. ‘‘ৱন্দিত্ৱাহং লোকজিনং, চক্খুমন্তং মহাযসং;

পুথু দিসা নমস্সন্তো, পটিকুটিকো অগঞ্ছহং.

৪৪১. ‘‘দেৱলোকা চৱিত্ৱান, সম্পজানো পতিস্সতো;

ওক্কমিং মাতুযা কুচ্ছিং, সন্ধাৱন্তো ভৱাভৱে.

৪৪২. ‘‘অগাৰা অভিনিক্খম্ম, পব্বজিং অনগাৰিযং;

আতাপী নিপকো ঝাযী, পটিসল্লানগোচৰো.

৪৪৩. ‘‘পধানং পদহিত্ৱান, তোসযিত্ৱা মহামুনিং;

চন্দোৱব্ভঘনা মুত্তো, ৱিচৰামি অহং সদা.

৪৪৪. ‘‘ৱিৱেকমনুযুত্তোম্হি, উপসন্তো নিৰূপধি;

সব্বাসৱে পৰিঞ্ঞায, ৱিহৰামি অনাসৱো.

৪৪৫. ‘‘তিংসকপ্পসহস্সম্হি, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৪৪৬. ‘‘কিলেসা ঝাপিতা ময্হং, ভৱা সব্বে সমূহতা;

সব্বাসৱা পৰিক্খীণা, নত্থি দানি পুনব্ভৱো.

৪৪৭. ‘‘স্ৱাগতং ৱত মে আসি…পে… কতং বুদ্ধস্স সাসনং.

৪৪৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা গিৰিমানন্দো থেৰো ইমা গাথাযো অভাসিত্থাতি.

গিৰিমানন্দত্থেৰস্সাপদানং সত্তমং.