৫. পদুমকূটাগাৰিযত্থেৰঅপদানং

৩৫৩. ‘‘পিযদস্সী নাম ভগৱা, সযম্ভূ লোকনাযকো;

ৱিৱেককামো সম্বুদ্ধো, সমাধিকুসলো মুনি.

৩৫৪. ‘‘ৱনসণ্ডং সমোগয্হ, পিযদস্সী মহামুনি;

পংসুকূলং পত্থৰিত্ৱা, নিসীদি পুৰিসুত্তমো.

৩৫৫. ‘‘মিগলুদ্দো পুৰে আসিং, অৰঞ্ঞে [ৱিপিনে (সী.), ইৰিনে (স্যা. ক.)] কাননে অহং;

পসদং মিগমেসন্তো, আহিণ্ডামি অহং তদা.

৩৫৬. ‘‘তত্থদ্দসাসিং সম্বুদ্ধং, ওঘতিণ্ণমনাসৱং;

পুপ্ফিতং সালৰাজংৱ, সতৰংসিংৱ উগ্গতং.

৩৫৭. ‘‘দিস্ৱানহং দেৱদেৱং, পিযদস্সিং মহাযসং;

জাতস্সৰং সমোগয্হ, পদুমং আহৰিং তদা.

৩৫৮. ‘‘আহৰিত্ৱান পদুমং, সতপত্তং মনোৰমং;

কূটাগাৰং কৰিত্ৱান, ছাদযিং পদুমেনহং.

৩৫৯. ‘‘অনুকম্পকো কাৰুণিকো, পিযদস্সী মহামুনি;

সত্তৰত্তিন্দিৱং বুদ্ধো, কূটাগাৰে ৱসী জিনো.

৩৬০. ‘‘পুৰাণং ছড্ডযিত্ৱান, নৱেন ছাদযিং অহং;

অঞ্জলিং পগ্গহেত্ৱান, অট্ঠাসিং তাৱদে অহং.

৩৬১. ‘‘ৱুট্ঠহিত্ৱা সমাধিম্হা, পিযদস্সী মহামুনি;

দিসং অনুৱিলোকেন্তো, নিসীদি লোকনাযকো.

৩৬২. ‘‘তদা সুদস্সনো নাম, উপট্ঠাকো মহিদ্ধিকো;

চিত্তমঞ্ঞায বুদ্ধস্স, পিযদস্সিস্স সত্থুনো.

৩৬৩. ‘‘অসীতিযা সহস্সেহি, ভিক্খূহি পৰিৱাৰিতো;

ৱনন্তে সুখমাসীনং, উপেসি লোকনাযকং.

৩৬৪. ‘‘যাৱতা ৱনসণ্ডম্হি, অধিৱত্থা চ দেৱতা;

বুদ্ধস্স চিত্তমঞ্ঞায, সব্বে সন্নিপতুং তদা.

৩৬৫. ‘‘সমাগতেসু যক্খেসু, কুম্ভণ্ডে সহৰক্খসে;

ভিক্খুসঙ্ঘে চ সম্পত্তে, গাথা পব্যাহৰী [সব্যাহৰী (স্যা.), মাব্যাহৰী (সী.)] জিনো.

৩৬৬. ‘‘‘যো মং সত্তাহং পূজেসি, আৱাসঞ্চ অকাসি মে;

তমহং কিত্তযিস্সামি, সুণাথ মম ভাসতো.

৩৬৭. ‘‘‘সুদুদ্দসং সুনিপুণং, গম্ভীৰং সুপ্পকাসিতং;

ঞাণেন কিত্তযিস্সামি, সুণাথ মম ভাসতো.

৩৬৮. ‘‘‘চতুদ্দসানি কপ্পানি, দেৱৰজ্জং কৰিস্সতি;

কূটাগাৰং মহন্তস্স [ব্ৰহং তস্স (সী. স্যা.)], পদ্মপুপ্ফেহি ছাদিতং.

৩৬৯. ‘‘‘আকাসে ধাৰযিস্সতি, পুপ্ফকম্মস্সিদং [পুব্বকম্মস্সিদং (স্যা.)] ফলং;

চতুব্বীসে [চতুদ্দসে (স্যা.)] কপ্পসতে, ৱোকিণ্ণং সংসৰিস্সতি.

৩৭০. ‘‘‘তত্থ পুপ্ফমযং ব্যম্হং, আকাসে ধাৰযিস্সতি;

যথা পদুমপত্তম্হি, তোযং ন উপলিম্পতি.

৩৭১. ‘‘‘তথেৱীমস্স ঞাণম্হি, কিলেসা নোপলিম্পৰে;

মনসা ৱিনিৱট্টেত্ৱা, পঞ্চ নীৱৰণে অযং.

৩৭২. ‘‘‘চিত্তং জনেত্ৱা নেক্খম্মে, অগাৰা পব্বজিস্সতি;

ততো পুপ্ফমযে ব্যম্হে, ধাৰেন্তে [পুপ্ফমযং ব্যম্হং, ধাৰেন্তং (স্যা. ক.)] নিক্খমিস্সতি.

৩৭৩. ‘‘‘ৰুক্খমূলে ৱসন্তস্স, নিপকস্স সতীমতো;

তত্থ পুপ্ফমযং ব্যম্হং, মত্থকে ধাৰযিস্সতি.

৩৭৪. ‘‘‘চীৱৰং পিণ্ডপাতঞ্চ, পচ্চযং সযনাসনং;

দত্ৱান ভিক্খুসঙ্ঘস্স, নিব্বাযিস্সতিনাসৱো’.

৩৭৫. ‘‘কূটাগাৰেন চৰতা [চৰণা (সী. পী. ক.), চৰিতে (স্যা.)], পব্বজ্জং অভিনিক্খমিং;

ৰুক্খমূলে ৱসন্তম্পি [ৱসন্তম্হি (সী.), ৱসতোপি (?)], কূটাগাৰং ধৰীযতি.

৩৭৬. ‘‘চীৱৰে পিণ্ডপাতে চ, চেতনা মে ন ৱিজ্জতি;

পুঞ্ঞকম্মেন সংযুত্তো, লভামি পৰিনিট্ঠিতং.

৩৭৭. ‘‘গণনাতো অসঙ্খেয্যা, কপ্পকোটী বহূ মম;

ৰিত্তকা তে অতিক্কন্তা, পমুত্তা লোকনাযকা.

৩৭৮. ‘‘অট্ঠাৰসে কপ্পসতে, পিযদস্সী ৱিনাযকো;

তমহং পযিৰুপাসিত্ৱা, ইমং যোনিং উপাগতো.

৩৭৯. ‘‘ইধ পস্সামি [ইধদ্দসাসিং (সী.)] সম্বুদ্ধং, অনোমং নাম চক্খুমং;

তমহং উপগন্ত্ৱান, পব্বজিং অনগাৰিযং.

৩৮০. ‘‘দুক্খস্সন্তকৰো বুদ্ধো, মগ্গং মে দেসযী জিনো;

তস্স ধম্মং সুণিত্ৱান, পত্তোম্হি অচলং পদং.

৩৮১. ‘‘তোসযিত্ৱান সম্বুদ্ধং, গোতমং সক্যপুঙ্গৱং;

সব্বাসৱে পৰিঞ্ঞায, ৱিহৰামি অনাসৱো.

৩৮২. ‘‘অট্ঠাৰসে কপ্পসতে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৩৮৩. ‘‘কিলেসা ঝাপিতা ময্হং, ভৱা সব্বে সমূহতা;

সব্বাসৱা পৰিক্খীণা, নত্থি দানি পুনব্ভৱো.

৩৮৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩৮৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পদুমকূটাগাৰিযো থেৰো ইমা গাথাযো অভাসিত্থাতি.

পদুমকূটাগাৰিযত্থেৰস্সাপদানং পঞ্চমং.