৪. মধুদাযকত্থেৰঅপদানং

৩৩৩. ‘‘সিন্ধুযা নদিযা তীৰে, সুকতো অস্সমো মম;

তত্থ ৱাচেমহং সিস্সে, ইতিহাসং সলক্খণং.

৩৩৪. ‘‘ধম্মকামা ৱিনীতা তে, সোতুকামা সুসাসনং;

ছড়ঙ্গে পাৰমিপ্পত্তা, সিন্ধুকূলে ৱসন্তি তে.

৩৩৫. ‘‘উপ্পাতগমনে চেৱ, লক্খণেসু চ কোৱিদা;

উত্তমত্থং গৱেসন্তা, ৱসন্তি ৱিপিনে তদা.

৩৩৬. ‘‘সুমেধো নাম সম্বুদ্ধো, লোকে উপ্পজ্জি তাৱদে;

অম্হাকং অনুকম্পন্তো, উপাগচ্ছি ৱিনাযকো.

৩৩৭. ‘‘উপাগতং মহাৱীৰং, সুমেধং লোকনাযকং;

তিণসন্থাৰকং কত্ৱা, লোকজেট্ঠস্সদাসহং.

৩৩৮. ‘‘ৱিপিনাতো মধুং গয্হ, বুদ্ধসেট্ঠস্সদাসহং;

সম্বুদ্ধো পৰিভুঞ্জিত্ৱা, ইদং ৱচনমব্ৰৱি.

৩৩৯. ‘‘‘যো তং অদাসি মধুং মে, পসন্নো সেহি পাণিভি;

তমহং কিত্তযিস্সামি, সুণাথ মম ভাসতো.

৩৪০. ‘‘‘ইমিনা মধুদানেন, তিণসন্থাৰকেন চ;

তিংস কপ্পসহস্সানি, দেৱলোকে ৰমিস্সতি.

৩৪১. ‘‘‘তিংস কপ্পসহস্সম্হি, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৩৪২. ‘‘‘তস্স ধম্মেসু দাযাদো, ওৰসো ধম্মনিম্মিতো;

সব্বাসৱে পৰিঞ্ঞায, নিব্বাযিস্সতিনাসৱো.

৩৪৩. ‘‘‘দেৱলোকা ইধাগন্ত্ৱা, মাতুকুচ্ছিং উপাগতে;

মধুৱস্সং পৱস্সিত্থ, ছাদযং মধুনা মহিং’.

৩৪৪. ‘‘মযি নিক্খন্তমত্তম্হি, কুচ্ছিযা চ সুদুত্তৰা;

তত্ৰাপি মধুৱস্সং মে, ৱস্সতে নিচ্চকালিকং.

৩৪৫. ‘‘অগাৰা অভিনিক্খম্ম, পব্বজিং অনগাৰিযং;

লাভী অন্নস্স পানস্স, মধুদানস্সিদং ফলং.

৩৪৬. ‘‘সব্বকামসমিদ্ধোহং, ভৱিত্ৱা দেৱমানুসে;

তেনেৱ মধুদানেন, পত্তোম্হি আসৱক্খযং.

৩৪৭. ‘‘ৱুট্ঠম্হি দেৱে চতুৰঙ্গুলে তিণে, সম্পুপ্ফিতে [সুপুপ্ফিতে (স্যা.)] ধৰণীৰুহে সঞ্ছন্নে [ৱপ্পদেসে (স্যা.)];

সুঞ্ঞে ঘৰে মণ্ডপৰুক্খমূলকে, ৱসামি নিচ্চং সুখিতো অনাসৱো.

৩৪৮. ‘‘মজ্ঝে মহন্তে হীনে চ [মজ্ঝে ময্হং ভৱা অস্সু (স্যা. পী. ক.)], ভৱে সব্বে অতিক্কমিং [যে ভৱে সমতিক্কমিং (স্যা. ক.), যো ভৱেসু পকিত্তযি (ক.)];

অজ্জ মে আসৱা খীণা, নত্থি দানি পুনব্ভৱো.

৩৪৯. ‘‘তিংসকপ্পসহস্সম্হি, যং দানমদদিং তদা;

দুগ্গতিং নাভিজানামি, মধুদানস্সিদং ফলং.

৩৫০. ‘‘কিলেসা ঝাপিতা ময্হং, ভৱা সব্বে সমূহতা;

সব্বাসৱা পৰিক্খীণা, নত্থি দানি পুনব্ভৱো.

৩৫১. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩৫২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মধুদাযকো থেৰো ইমা গাথাযো অভাসিত্থাতি.

মধুদাযকত্থেৰস্সাপদানং চতুত্থং.