৩. সব্বকিত্তিকত্থেৰঅপদানং

৩০৪. ‘‘কণিকাৰংৱ জলিতং [জোতন্তং (সী.)], দীপৰুক্খংৱ উজ্জলং [জোতিতং (স্যা.)];

ওসধিংৱ ৱিৰোচন্তং, ৱিজ্জুতং গগনে যথা.

৩০৫. ‘‘অসম্ভীতং অনুত্তাসিং, মিগৰাজংৱ কেসৰিং;

ঞাণালোকং পকাসেন্তং, মদ্দন্তং তিত্থিযে গণে.

৩০৬. ‘‘উদ্ধৰন্তং ইমং লোকং, ছিদ্দন্তং সব্বসংসযং;

গজ্জন্তং [অসম্ভীতং (স্যা.), গচ্ছন্তং (ক.)] মিগৰাজংৱ, অদ্দসং লোকনাযকং.

৩০৭. ‘‘জটাজিনধৰো আসিং, ব্ৰহা উজু পতাপৱা;

ৱাকচীৰং গহেত্ৱান, পাদমূলে অপত্থৰিং.

৩০৮. ‘‘কাড়ানুসাৰিযং গয্হ, অনুলিম্পিং তথাগতং;

সম্বুদ্ধমনুলিম্পেত্ৱা, সন্থৱিং লোকনাযকং.

৩০৯. ‘‘সমুদ্ধৰসিমং লোকং, ওঘতিণ্ণ [ওঘতিণ্ণো (স্যা. ক.)] মহামুনি;

ঞাণালোকেন জোতেসি, নাৱটং [পৱৰং (স্যা.), ৱজিৰ (পী.)] ঞাণমুত্তমং.

৩১০. ‘‘ধম্মচক্কং [তুৱং চক্কং (ক.)] পৱত্তেসি, মদ্দসে পৰতিত্থিযে;

উসভো জিতসঙ্গামো, সম্পকম্পেসি মেদনিং.

৩১১. ‘‘মহাসমুদ্দে ঊমিযো, ৱেলন্তম্হি পভিজ্জৰে;

তথেৱ তৱ ঞাণম্হি, সব্বদিট্ঠী পভিজ্জৰে.

৩১২. ‘‘সুখুমচ্ছিকজালেন, সৰম্হি সম্পতানিতে;

অন্তোজালিকতা [জালগতা (সী.)] পাণা, পীড়িতা হোন্তি তাৱদে.

৩১৩. ‘‘তথেৱ তিত্থিযা লোকে, পুথুপাসণ্ডনিস্সিতা [মূড়্হা সচ্চৱিনিস্সটা (স্যা.), মুট্ঠসচ্চৱিনিস্সটা (ক.)];

অন্তোঞাণৱৰে তুয্হং, পৰিৱত্তন্তি মাৰিস.

৩১৪. ‘‘পতিট্ঠা ৱুয্হতং ওঘে, ত্ৱঞ্হি নাথো অবন্ধুনং;

ভযট্টিতানং সৰণং, মুত্তিত্থীনং পৰাযণং.

৩১৫. ‘‘একৱীৰো অসদিসো, মেত্তাকৰুণসঞ্চযো [সঞ্ঞুতো (স্যা.)];

অসমো সুসমো সন্তো [সুসীলো অসমো সন্তো (সী.), পঞ্ঞৱা যুত্তচাগো চ (স্যা.)], ৱসী তাদী জিতঞ্জযো.

৩১৬. ‘‘ধীৰো ৱিগতসম্মোহো, অনেজো অকথংকথী;

তুসিতো [ৱুসিতো (সী.)] ৱন্তদোসোসি, নিম্মলো সংযতো সুচি.

৩১৭. ‘‘সঙ্গাতিগো হতমদো [গতমদো (স্যা.), তমনুদো (ক.)], তেৱিজ্জো তিভৱন্তগো;

সীমাতিগো ধম্মগৰু, গতত্থো হিতৱব্ভুতো [হিতৱপ্পথো (সী. স্যা.)].

৩১৮. ‘‘তাৰকো ত্ৱং যথা নাৱা, নিধীৱস্সাসকাৰকো;

অসম্ভীতো যথা সীহো, গজৰাজাৱ দপ্পিতো.

৩১৯. ‘‘থোমেত্ৱা দসগাথাহি, পদুমুত্তৰং মহাযসং;

ৱন্দিত্ৱা সত্থুনো পাদে, তুণ্হী অট্ঠাসহং তদা.

৩২০. ‘‘পদুমুত্তৰো লোকৱিদূ, আহুতীনং পটিগ্গহো;

ভিক্খুসঙ্ঘে ঠিতো সত্থা, ইমা গাথা অভাসথ.

৩২১. ‘‘‘যো মে সীলঞ্চ ঞাণঞ্চ, সদ্ধম্মঞ্চাপি ৱণ্ণযি [ধম্মঞ্চাপি পকিত্তযি (সী. স্যা.)];

তমহং কিত্তযিস্সামি, সুণাথ মম ভাসতো.

৩২২. ‘‘‘সট্ঠি কপ্পসহস্সানি, দেৱলোকে ৰমিস্সতি;

অঞ্ঞে দেৱেভিভৱিত্ৱা, ইস্সৰং কাৰযিস্সতি.

৩২৩. ‘‘‘সো পচ্ছা পব্বজিত্ৱান, সুক্কমূলেন চোদিতো;

গোতমস্স ভগৱতো, সাসনে পব্বজিস্সতি.

৩২৪. ‘‘‘পব্বজিত্ৱান কাযেন, পাপকম্মং ৱিৱজ্জিয;

সব্বাসৱে পৰিঞ্ঞায, নিব্বাযিস্সতিনাসৱো’.

৩২৫. ‘‘যথাপি মেঘো থনযং, তপ্পেতি মেদিনিং ইমং;

তথেৱ ত্ৱং মহাৱীৰ, ধম্মেন তপ্পযী মমং.

৩২৬. ‘‘সীলং পঞ্ঞঞ্চ ধম্মঞ্চ, থৱিত্ৱা লোকনাযকং;

পত্তোম্হি পৰমং সন্তিং, নিব্বানং পদমচ্চুতং.

৩২৭. ‘‘অহো নূন স ভগৱা, চিৰং তিট্ঠেয্য চক্খুমা;

অঞ্ঞাতঞ্চ ৱিজানেয্যুং, ফুসেয্যুং [অঞ্ঞাতঞ্চাপি জানেয্য, পস্সেয্য (ক.)] অমতং পদং.

৩২৮. ‘‘অযং মে পচ্ছিমা জাতি, ভৱা সব্বে সমূহতা;

সব্বাসৱে পৰিঞ্ঞায, ৱিহৰামি অনাসৱো.

৩২৯. ‘‘সতসহস্সিতো কপ্পে, যং বুদ্ধমভিথোমযিং

দুগ্গতিং নাভিজানামি, কিত্তনায ইদং ফলং.

৩৩০. ‘‘কিলেসা ঝাপিতা ময্হং, ভৱা সব্বে সমূহতা;

সব্বাসৱা পৰিক্খীণা, নত্থি দানি পুনব্ভৱো.

৩৩১. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩৩২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সব্বকিত্তিকো থেৰো ইমা গাথাযো অভাসিত্থাতি.

সব্বকিত্তিকত্থেৰস্সাপদানং ততিযং.