২. সেলত্থেৰঅপদানং

২০৮. ‘‘নগৰে হংসৱতিযা, ৱীথিসামী অহোসহং;

মম ঞাতী সমানেত্ৱা, ইদং ৱচনমব্ৰৱিং.

২০৯. ‘‘‘বুদ্ধো লোকে সমুপ্পন্নো, পুঞ্ঞক্খেত্তো অনুত্তৰো [পুঞ্ঞক্খেত্তং অনুত্তৰং (সী.)];

আসি সো [আসীসো (সী.), আধাৰো (পী.)] সব্বলোকস্স, আহুতীনং পটিগ্গহো.

২১০. ‘‘‘খত্তিযা নেগমা চেৱ, মহাসালা চ ব্ৰাহ্মণা;

পসন্নচিত্তা সুমনা, পূগধম্মং অকংসু তে.

২১১. ‘‘‘হত্থাৰোহা অনীকট্ঠা, ৰথিকা পত্তিকাৰকা;

পসন্নচিত্তা সুমনা, পূগধম্মং অকংসু তে.

২১২. ‘‘‘উগ্গা চ ৰাজপুত্তা চ, ৱেসিযানা চ ব্ৰাহ্মণা;

পসন্নচিত্তা সুমনা, পূগধম্মং অকংসু তে.

২১৩. ‘‘‘আড়াৰিকা কপ্পকা [আড়াৰিকা চ সূদা (স্যা.)] চ, ন্হাপকা মালকাৰকা;

পসন্নচিত্তা সুমনা, পূগধম্মং অকংসু তে.

২১৪. ‘‘‘ৰজকা পেসকাৰা চ, চম্মকাৰা চ ন্হাপিতা;

পসন্নচিত্তা সুমনা, পূগধম্মং অকংসু তে.

২১৫. ‘‘‘উসুকাৰা ভমকাৰা, চম্মকাৰা চ তচ্ছকা;

পসন্নচিত্তা সুমনা, পূগধম্মং অকংসু তে.

২১৬. ‘‘‘কম্মাৰা সোণ্ণকাৰা চ, তিপুলোহকৰা তথা;

পসন্নচিত্তা সুমনা, পূগধম্মং অকংসু তে.

২১৭. ‘‘‘ভতকা চেটকা চেৱ, দাসকম্মকৰা বহূ;

যথাসকেন থামেন, পূগধম্মং অকংসু তে.

২১৮. ‘‘‘উদহাৰা কট্ঠহাৰা, কস্সকা তিণহাৰকা;

যথাসকেন থামেন, পূগধম্মং অকংসু তে.

২১৯. ‘‘‘পুপ্ফিকা মালিকা চেৱ, পণ্ণিকা ফলহাৰকা;

যথাসকেন থামেন, পূগধম্মং অকংসু তে.

২২০. ‘‘‘গণিকা কুম্ভদাসী চ, পূৱিকা [সূপিকা (ক.)] মচ্ছিকাপি চ;

যথাসকেন থামেন, পূগধম্মং অকংসু তে.

২২১. ‘‘‘এথ সব্বে সমাগন্ত্ৱা, গণং বন্ধাম একতো;

অধিকাৰং কৰিস্সাম, পুঞ্ঞক্খেত্তে অনুত্তৰে’.

২২২. ‘‘তে মে সুত্ৱান ৱচনং, গণং বন্ধিংসু তাৱদে;

উপট্ঠানসালং সুকতং, ভিক্খুসঙ্ঘস্স কাৰযুং.

২২৩. ‘‘নিট্ঠাপেত্ৱান তং সালং, উদগ্গো তুট্ঠমানসো;

পৰেতো তেহি সব্বেহি, সম্বুদ্ধমুপসঙ্কমিং.

২২৪. ‘‘উপসঙ্কম্ম সম্বুদ্ধং, লোকনাথং নৰাসভং;

ৱন্দিত্ৱা সত্থুনো পাদে, ইদং ৱচনমব্ৰৱিং.

২২৫. ‘‘‘ইমে তীণি সতা ৱীৰ, পুৰিসা একতো গণা;

উপট্ঠানসালং সুকতং, নিয্যাদেন্তি [নিয্যাতেন্তি (সী.)] তুৱং [তৱং (সী.), তৱ (স্যা.)] মুনি’.

২২৬. ‘‘ভিক্খুসঙ্ঘস্স পুৰতো, সম্পটিচ্ছত্ৱ চক্খুমা;

তিণ্ণং সতানং পুৰতো, ইমা গাথা অভাসথ.

২২৭. ‘‘‘তিসতাপি চ জেট্ঠো চ, অনুৱত্তিংসু একতো;

সম্পত্তিঞ্হি [সম্পত্তীহি (স্যা. ক.)] কৰিত্ৱান, সব্বে অনুভৱিস্সথ.

২২৮. ‘‘‘পচ্ছিমে ভৱে সম্পত্তে, সীতিভাৱমনুত্তৰং;

অজৰং অমতং সন্তং, নিব্বানং ফস্সযিস্সথ’.

২২৯. ‘‘এৱং বুদ্ধো ৱিযাকাসি, সব্বঞ্ঞূ সমণুত্তৰো;

বুদ্ধস্স ৱচনং সুত্ৱা, সোমনস্সং পৱেদযিং.

২৩০. ‘‘তিংস কপ্পসহস্সানি, দেৱলোকে ৰমিং অহং;

দেৱাধিপো পঞ্চসতং, দেৱৰজ্জমকাৰযিং.

২৩১. ‘‘সহস্সক্খত্তুং ৰাজা চ, চক্কৱত্তী অহোসহং;

দেৱৰজ্জং কৰোন্তস্স, মহাদেৱা অৱন্দিসুং.

২৩২. ‘‘ইধ মানুসকে ৰজ্জং [ৰজ্জে (সী.)], পৰিসা হোন্তি বন্ধৱা;

পচ্ছিমে ভৱে সম্পত্তে, ৱাসেট্ঠো নাম ব্ৰাহ্মণো.

২৩৩. ‘‘অসীতিকোটি নিচযো, তস্স পুত্তো অহোসহং;

সেলো ইতি মম নামং, ছড়ঙ্গে পাৰমিং গতো.

২৩৪. ‘‘জঙ্ঘাৱিহাৰং ৱিচৰং, সসিস্সেহি পুৰক্খতো;

জটাভাৰিকভৰিতং, কেণিযং নাম তাপসং.

২৩৫. ‘‘পটিযত্তাহুতিং দিস্ৱা, ইদং ৱচনমব্ৰৱিং;

‘আৱাহো ৱা ৱিৱাহো ৱা, ৰাজা ৱা তে নিমন্তিতো’.

২৩৬. ‘‘আহুতিং [নাহুতিং (?)] যিট্ঠুকামোহং, ব্ৰাহ্মণে দেৱসম্মতে;

ন নিমন্তেমি ৰাজানং, আহুতী মে ন ৱিজ্জতি.

২৩৭. ‘‘ন চত্থি ময্হমাৱাহো, ৱিৱাহো মে ন ৱিজ্জতি;

সক্যানং নন্দিজননো, সেট্ঠো লোকে সদেৱকে.

২৩৮. ‘‘সব্বলোকহিতত্থায, সব্বসত্তসুখাৱহো;

সো মে নিমন্তিতো অজ্জ, তস্সেতং পটিযাদনং.

২৩৯. ‘‘তিম্বৰূসকৱণ্ণাভো, অপ্পমেয্যো অনূপমো;

ৰূপেনাসদিসো বুদ্ধো, স্ৱাতনায নিমন্তিতো.

২৪০. ‘‘উক্কামুখপহট্ঠোৱ, খদিৰঙ্গাৰসন্নিভো;

ৱিজ্জূপমো মহাৱীৰো, সো মে বুদ্ধো নিমন্তিতো.

২৪১. ‘‘পব্বতগ্গে যথা অচ্চি, পুণ্ণমাযেৱ চন্দিমা;

নড়গ্গিৱণ্ণসঙ্কাসো, সো মে বুদ্ধো নিমন্তিতো.

২৪২. ‘‘অসম্ভীতো ভযাতীতো, ভৱন্তকৰণো মুনি;

সীহূপমো মহাৱীৰো, সো মে বুদ্ধো নিমন্তিতো.

২৪৩. ‘‘কুসলো বুদ্ধধম্মেহি, অপসয্হো পৰেহি সো;

নাগূপমো মহাৱীৰো, সো মে বুদ্ধো নিমন্তিতো.

২৪৪. ‘‘সদ্ধম্মাচাৰকুসলো, বুদ্ধনাগো অসাদিসো;

উসভূপমো মহাৱীৰো, সো মে বুদ্ধো নিমন্তিতো.

২৪৫. ‘‘অনন্তৱণ্ণো অমিতযসো, ৱিচিত্তসব্বলক্খণো;

সক্কূপমো মহাৱীৰো, সো মে বুদ্ধো নিমন্তিতো.

২৪৬. ‘‘ৱসী গণী পতাপী চ, তেজস্সী চ দুৰাসদো;

ব্ৰহ্মূপমো মহাৱীৰো, সো মে বুদ্ধো নিমন্তিতো.

২৪৭. ‘‘পত্তধম্মো দসবলো, বলাতিবলপাৰগো;

ধৰণূপমো মহাৱীৰো, সো মে বুদ্ধো নিমন্তিতো.

২৪৮. ‘‘সীলৱীচিসমাকিণ্ণো, ধম্মৱিঞ্ঞাণখোভিতো;

উদধূপমো মহাৱীৰো, সো মে বুদ্ধো নিমন্তিতো.

২৪৯. ‘‘দুৰাসদো দুপ্পসহো, অচলো উগ্গতো ব্ৰহা;

নেৰূপমো মহাৱীৰো, সো মে বুদ্ধো নিমন্তিতো.

২৫০. ‘‘অনন্তঞাণো অসমসমো, অতুলো অগ্গতং গতো;

গগনূপমো মহাৱীৰো, সো মে বুদ্ধো নিমন্তিতো.

পন্নৰসমং ভাণৱাৰং.

২৫১. ‘‘পতিট্ঠা ভযভীতানং, তাণো সৰণগামিনং;

অস্সাসকো মহাৱীৰো, সো মে বুদ্ধো নিমন্তিতো.

২৫২. ‘‘আসযো বুদ্ধিমন্তানং, পুঞ্ঞক্খেত্তং সুখেসিনং;

ৰতনাকৰো মহাৱীৰো, সো মে বুদ্ধো নিমন্তিতো.

২৫৩. ‘‘অস্সাসকো ৱেদকৰো, সামঞ্ঞফলদাযকো;

মেঘূপমো মহাৱীৰো, সো মে বুদ্ধো নিমন্তিতো.

২৫৪. ‘‘লোকচক্খু মহাতেজো, সব্বতমৱিনোদনো;

সূৰিযূপমো মহাৱীৰো, সো মে বুদ্ধো নিমন্তিতো.

২৫৫. ‘‘আৰম্মণৱিমুত্তীসু, সভাৱদস্সনো মুনি;

চন্দূপমো মহাৱীৰো, সো মে বুদ্ধো নিমন্তিতো.

২৫৬. ‘‘বুদ্ধো সমুস্সিতো লোকে, লক্খণেহি অলঙ্কতো;

অপ্পমেয্যো মহাৱীৰো, সো মে বুদ্ধো নিমন্তিতো.

২৫৭. ‘‘যস্স ঞাণং অপ্পমেয্যং, সীলং যস্স অনূপমং;

ৱিমুত্তি অসদিসা যস্স, সো মে বুদ্ধো নিমন্তিতো.

২৫৮. ‘‘যস্স ধীতি অসদিসা, থামো যস্স অচিন্তিযো;

যস্স পৰক্কমো জেট্ঠো, সো মে বুদ্ধো নিমন্তিতো.

২৫৯. ‘‘ৰাগো দোসো চ মোহো চ, ৱিসা সব্বে সমূহতা;

অগদূপমো মহাৱীৰো, সো মে বুদ্ধো নিমন্তিতো.

২৬০. ‘‘ক্লেসব্যাধিবহুদুক্খ সব্বতমৱিনোদনো [ৱিনোদকো (সী. স্যা.)];

ৱেজ্জূপমো মহাৱীৰো, সো মে বুদ্ধো নিমন্তিতো.

২৬১. ‘‘বুদ্ধোতি ভো যং ৱদেসি, ঘোসোপেসো সুদুল্লভো;

বুদ্ধো বুদ্ধোতি সুত্ৱান, পীতি মে উদপজ্জথ.

২৬২. ‘‘অব্ভন্তৰং অগণ্হন্তং, পীতি মে বহি নিচ্ছৰে;

সোহং পীতিমনো সন্তো, ইদং ৱচনমব্ৰৱিং.

২৬৩. ‘‘‘কহং নু খো সো ভগৱা, লোকজেট্ঠো নৰাসভো;

তত্থ গন্ত্ৱা নমস্সিস্সং, সামঞ্ঞফলদাযকং’.

২৬৪. ‘‘‘পগ্গয্হ দক্খিণং বাহুং, ৱেদজাতো কতঞ্জলী;

আচিক্খি মে ধম্মৰাজং, সোকসল্লৱিনোদনং.

২৬৫. ‘‘‘উদেন্তংৱ মহামেঘং, নীলং অঞ্জনসন্নিভং;

সাগৰং ৱিয দিস্সন্তং, পস্সসেতং মহাৱনং.

২৬৬. ‘‘‘এত্থ সো ৱসতে বুদ্ধো, অদন্তদমকো মুনি;

ৱিনযন্তো চ ৱেনেয্যে, বোধেন্তো বোধিপক্খিযে.

২৬৭. ‘‘‘পিপাসিতোৱ উদকং, ভোজনংৱ জিঘচ্ছিতো;

গাৱী যথা ৱচ্ছগিদ্ধা, এৱাহং ৱিচিনিং জিনং.

২৬৮. ‘‘‘আচাৰউপচাৰঞ্ঞূ, ধম্মানুচ্ছৱিসংৱৰং;

সিক্খাপেমি সকে সিস্সে, গচ্ছন্তে জিনসন্তিকং.

২৬৯. ‘‘‘দুৰাসদা ভগৱন্তো, সীহাৱ একচাৰিনো;

পদে পদং নিক্খিপন্তা, আগচ্ছেয্যাথ মাণৱা.

২৭০. ‘‘‘আসীৱিসো যথা ঘোৰো, মিগৰাজাৱ কেসৰী;

মত্তোৱ কুঞ্জৰো দন্তী, এৱং বুদ্ধা দুৰাসদা.

২৭১. ‘‘‘উক্কাসিতঞ্চ খিপিতং, অজ্ঝুপেক্খিয মাণৱা;

পদে পদং নিক্খিপন্তা, উপেথ বুদ্ধসন্তিকং.

২৭২. ‘‘‘পটিসল্লানগৰুকা, অপ্পসদ্দা দুৰাসদা;

দুৰূপসঙ্কমা বুদ্ধা, গৰূ হোন্তি সদেৱকে.

২৭৩. ‘‘‘যদাহং পঞ্হং পুচ্ছামি, পটিসম্মোদযামি ৱা;

অপ্পসদ্দা তদা হোথ, মুনিভূতাৱ তিট্ঠথ.

২৭৪. ‘‘‘যং সো দেসেতি সম্বুদ্ধো [সদ্ধম্মং (সী. স্যা.)], খেমং নিব্বানপত্তিযা;

তমেৱত্থং নিসামেথ, সদ্ধম্মসৱনং সুখং’.

২৭৫. ‘‘উপসঙ্কম্ম সম্বুদ্ধং, সম্মোদিং মুনিনা অহং;

তং কথং ৱীতিসাৰেত্ৱা, লক্খণে উপধাৰযিং.

২৭৬. ‘‘লক্খণে দ্ৱে চ কঙ্খামি, পস্সামি তিংসলক্খণে;

কোসোহিতৱত্থগুয্হং, ইদ্ধিযা দস্সযী মুনি.

২৭৭. ‘‘জিৱ্হং নিন্নামযিত্ৱান, কণ্ণসোতে চ নাসিকে;

পটিমসি নলাটন্তং, কেৱলং ছাদযী জিনো.

২৭৮. ‘‘তস্সাহং লক্খণে দিস্ৱা, পৰিপুণ্ণে সব্যঞ্জনে;

বুদ্ধোতি নিট্ঠং গন্ত্ৱান, সহ সিস্সেহি পব্বজিং.

২৭৯. ‘‘সতেহি তীহি সহিতো, পব্বজিং অনগাৰিযং;

অদ্ধমাসে অসম্পত্তে, সব্বে পত্তাম্হ নিব্বুতিং.

২৮০. ‘‘একতো কম্মং কত্ৱান, পুঞ্ঞক্খেত্তে অনুত্তৰে;

একতো সংসৰিত্ৱান, একতো ৱিনিৱত্তযুং.

২৮১. ‘‘গোপানসিযো দত্ৱান, পূগধম্মে ৱসিং অহং;

তেন কম্মেন সুকতেন, অট্ঠ হেতূ লভামহং.