১. পিলিন্দৱচ্ছত্থেৰঅপদানং

১. ‘‘নগৰে হংসৱতিযা, আসিং দোৱাৰিকো অহং;

অক্খোভং অমিতং ভোগং, ঘৰে সন্নিচিতং মম.

২. ‘‘ৰহোগতো নিসীদিত্ৱা, পহংসিত্ৱান মানসং [সম্পহংসিত্ৱ মানসং (সী.)];

নিসজ্জ পাসাদৱৰে, এৱং চিন্তেসহং তদা.

(চিন্তনাকাৰো)

৩. ‘‘‘বহূ মেধিগতা ভোগা, ফীতং অন্তেপুৰং মম;

ৰাজাপি [ৰাজিসি (ক.)] সন্নিমন্তেসি, আনন্দো পথৱিস্সৰো.

৪. ‘‘‘অযঞ্চ বুদ্ধো উপ্পন্নো, অধিচ্চুপ্পত্তিকো মুনি;

সংৱিজ্জন্তি চ মে ভোগা, দানং দস্সামি সত্থুনো.

৫. ‘‘‘পদুমেন ৰাজপুত্তেন, দিন্নং দানৱৰং জিনে;

হত্থিনাগে চ পল্লঙ্কে, অপস্সেনঞ্চনপ্পকং.

৬. ‘‘‘অহম্পি দানং দস্সামি, সঙ্ঘে গণৱৰুত্তমে;

অদিন্নপুব্বমঞ্ঞেসং, ভৱিস্সং আদিকম্মিকো.

৭. ‘‘‘চিন্তেত্ৱাহং বহুৱিধং, যাগে যস্স সুখংফলং;

পৰিক্খাৰদানমদ্দক্খিং, মম সঙ্কপ্পপূৰণং.

৮. ‘‘‘পৰিক্খাৰানি দস্সামি, সঙ্ঘে গণৱৰুত্তমে;

অদিন্নপুব্বমঞ্ঞেসং, ভৱিস্সং আদিকম্মিকো’.

(দানৱত্থুসম্পাদনং)

৯. ‘‘নড়কাৰে উপাগম্ম, ছত্তং কাৰেসি তাৱদে;

ছত্তসতসহস্সানি, একতো সন্নিপাতযিং.

১০. ‘‘দুস্সসতসহস্সানি, একতো সন্নিপাতযিং;

পত্তসতসহস্সানি, একতো সন্নিপাতযিং.

১১. ‘‘ৱাসিযো সত্থকে চাপি, সূচিযো নখছেদনে;

হেট্ঠাছত্তে ঠপাপেসিং, কাৰেত্ৱা তদনুচ্ছৱে.

১২. ‘‘ৱিধূপনে তালৱণ্টে, মোৰহত্থে চ চামৰে;

পৰিস্সাৱনে তেলধাৰে [তেলধৰে (সী.)], কাৰযিং তদনুচ্ছৱে.

১৩. ‘‘সূচিঘৰে অংসবদ্ধে, অথোপি কাযবন্ধনে;

আধাৰকে চ সুকতে, কাৰযিং তদনুচ্ছৱে.

১৪. ‘‘পৰিভোগভাজনে চ, অথোপি লোহথালকে;

ভেসজ্জে পূৰযিত্ৱান, হেট্ঠাছত্তে ঠপেসহং.

১৫. ‘‘ৱচং উসীৰং লট্ঠিমধুং, পিপ্ফলী মৰিচানি চ;

হৰীতকিং সিঙ্গীৱেৰং, সব্বং পূৰেসি ভাজনে.

১৬. ‘‘উপাহনা পাদুকাযো, অথো উদকপুঞ্ছনে;

কত্তৰদণ্ডে সুকতে, কাৰযিং তদনুচ্ছৱে.

১৭. ‘‘ওসধঞ্জননাড়ী চ [ওসধং অঞ্জনাপিচ (স্যা.)], সলাকা ধম্মকুত্তৰা;

কুঞ্চিকা পঞ্চৱণ্ণেহি, সিব্বিতে কুঞ্চিকাঘৰে.

১৮. ‘‘আযোগে ধূমনেত্তে চ, অথোপি দীপধাৰকে;

তুম্বকে চ কৰণ্ডে চ, কাৰযিং তদনুচ্ছৱে.

১৯. ‘‘সণ্ডাসে পিপ্ফলে চেৱ, অথোপি মলহাৰকে;

ভেসজ্জথৱিকে চেৱ, কাৰযিং তদনুচ্ছৱে.

২০. ‘‘আসন্দিযো পীঠকে চ, পল্লঙ্কে চতুৰোমযে;

তদনুচ্ছৱে কাৰযিত্ৱা, হেট্ঠাছত্তে ঠপেসহং.

২১. ‘‘উণ্ণাভিসী তূলভিসী, অথোপি পীঠিকাভিসী [পীঠকাভিসী (স্যা. ক.)];

বিম্বোহনে [বিব্বোহনে (স্যা. ক.)] চ সুকতে, কাৰযিং তদনুচ্ছৱে.

২২. ‘‘কুৰুৱিন্দে মধুসিত্থে, তেলং হত্থপ্পতাপকং;

সিপাটিফলকে সুচী, মঞ্চং অত্থৰণেন চ.

২৩. ‘‘সেনাসনে পাদপুঞ্ছে, সযনাসনদণ্ডকে;

দন্তপোণে চ আটলী [কথলিং (স্যা.)], সীসালেপনগন্ধকে.

২৪. ‘‘অৰণী ফলপীঠে [পলালপীঠে (সী.)] চ, পত্তপিধানথালকে;

উদকস্স কটচ্ছূ চ, চুণ্ণকং ৰজনম্বণং [ৰজনম্মণং (সী.)].

২৫. ‘‘সম্মজ্জনং [সম্মুঞ্জনং (স্যা.), সম্মজ্জনিং, সম্মুঞ্জনিং (?)] উদপত্তং, তথা ৱস্সিকসাটিকং;

নিসীদনং কণ্ডুচ্ছাদি, অথ অন্তৰৱাসকং.

২৬. ‘‘উত্তৰাসঙ্গসঙ্ঘাটী, নত্থুকং মুখসোধনং;

বিড়ঙ্গলোণং পহূতঞ্চ [লোণভূতঞ্চ (ক.)], মধুঞ্চ দধিপানকং.

২৭. ‘‘ধূপং [ধূমং (ক.)] সিত্থং পিলোতিঞ্চ, মুখপুঞ্ছনসুত্তকং;

দাতব্বং নাম যং অত্থি, যঞ্চ কপ্পতি সত্থুনো.

২৮. ‘‘সব্বমেতং সমানেত্ৱা, আনন্দং উপসঙ্কমিং;

উপসঙ্কম্ম ৰাজানং, জনেতাৰং মহেসিনো [মহেসিনং (সী.), মহাযসং (স্যা.), মহিস্সৰং (ক.)];

সিৰসা অভিৱাদেত্ৱা, ইদং ৱচনমব্ৰৱিং.

(দানোকাসযাচনা)

২৯. ‘‘‘একতো জাতসংৱদ্ধা, উভিন্নং একতো মনং [যসো (স্যা.), মনো (?)];

সাধাৰণা সুখদুক্খে, উভো চ অনুৱত্তকা.

৩০. ‘‘‘অত্থি চেতসিকং দুক্খং, তৱাধেয্যং অৰিন্দম;

যদি সক্কোসি তং দুক্খং, ৱিনোদেয্যাসি খত্তিয.

৩১. ‘‘‘তৱ দুক্খং মম দুক্খং, উভিন্নং একতো মনো [মনং (সী. স্যা.)];

নিট্ঠিতন্তি ৱিজানাহি, মমাধেয্যং সচে তুৱং.

৩২. ‘‘‘জানাহি খো মহাৰাজ, দুক্খং মে দুব্বিনোদযং;

পহু সমানো গজ্জসু, একং তে দুচ্চজং ৱৰং.

৩৩. ‘‘‘যাৱতা ৱিজিতে অত্থি, যাৱতা মম জীৱিতং;

এতেহি যদি তে অত্থো, দস্সামি অৱিকম্পিতো.

৩৪. ‘‘‘গজ্জিতং খো তযা দেৱ, মিচ্ছা তং বহু গজ্জিতং;

জানিস্সামি তুৱং অজ্জ, সব্বধম্মে [সচ্চধম্মে (?)] পতিট্ঠিতং.

৩৫. ‘‘‘অতিবাড়্হং নিপীড়েসি, দদমানস্স মে সতো;

কিং তে মে পীড়িতেনত্থো, পত্থিতং তে কথেহি মে.

৩৬. ‘‘‘ইচ্ছামহং মহাৰাজ, বুদ্ধসেট্ঠং অনুত্তৰং;

ভোজযিস্সামি সম্বুদ্ধং, ৱজ্জং [ৱঞ্চুং (?)] মে মাহু জীৱিতং.

৩৭. ‘‘‘অঞ্ঞং তেহং ৱৰং দম্মি, মা যাচিত্থো তথাগতং [অযাচিতো তথাগতো (স্যা. ক.)];

অদেয্যো কস্সচি বুদ্ধো, মণি জোতিৰসো যথা.

৩৮. ‘‘‘ননু তে গজ্জিতং দেৱ, যাৱ জীৱিতমত্তনো [ৱিজিতমত্থিতং (ক.), জীৱিতমত্থিকং (স্যা.)];

জীৱিতং [ৱিজিতং (ক.)] দদমানেন, যুত্তং দাতুং তথাগতং.

৩৯. ‘‘‘ঠপনীযো মহাৱীৰো, অদেয্যো কস্সচি জিনো;

ন মে পটিস্সুতো বুদ্ধো, ৱৰস্সু অমিতং ধনং.

৪০. ‘‘‘ৱিনিচ্ছযং পাপুণাম, পুচ্ছিস্সাম ৱিনিচ্ছযে;

যথাসণ্ঠং [যথাসন্তং (সী.)] কথেস্সন্তি, পটিপুচ্ছাম তং তথা.

৪১. ‘‘‘ৰঞ্ঞো হত্থে গহেত্ৱান, অগমাসিং ৱিনিচ্ছযং;

পুৰতো অক্খদস্সানং, ইদং ৱচনমব্ৰৱিং.

৪২. ‘‘‘সুণন্তু মে অক্খদস্সা, ৰাজা ৱৰমদাসি মে;

ন কিঞ্চি ঠপযিত্ৱান, জীৱিতম্পি [ৱিজিতংপি (ক.)] পৱাৰযি.

৪৩. ‘‘‘তস্স মে ৱৰদিন্নস্স, বুদ্ধসেট্ঠং ৱৰিং অহং;

সুদিন্নো হোতি মে বুদ্ধো, ছিন্দথ সংসযং মম.

৪৪. ‘‘‘সোস্সাম তৱ ৱচনং, ভূমিপালস্স ৰাজিনো;

উভিন্নং ৱচনং সুত্ৱা, ছিন্দিস্সামেত্থ সংসযং.

৪৫. ‘‘‘সব্বং দেৱ তযা দিন্নং, ইমস্স সব্বগাহিকং [সব্বগাহিতং (স্যা. ক.)];

ন কিঞ্চি ঠপযিত্ৱান, জীৱিতম্পি পৱাৰযি.

৪৬. ‘‘‘কিচ্ছপ্পত্তোৱ হুত্ৱান, যাচী ৱৰমনুত্তৰং [যাৱজীৱমনুত্তৰং (স্যা. ক.)];

ইমং সুদুক্খিতং ঞত্ৱা, অদাসিং সব্বগাহিকং.

৪৭. ‘‘‘পৰাজযো তুৱং [তৱং (সী.)] দেৱ, অস্স দেয্যো তথাগতো;

উভিন্নং সংসযো ছিন্নো, যথাসণ্ঠম্হি [যথাসন্তম্হি (সী.)] তিট্ঠথ.

৪৮. ‘‘‘ৰাজা তত্থেৱ ঠত্ৱান, অক্খদস্সেতদব্ৰৱি;

সম্মা ময্হম্পি দেয্যাথ, পুন বুদ্ধং লভামহং.

৪৯. ‘‘‘পূৰেত্ৱা তৱ সঙ্কপ্পং, ভোজযিত্ৱা তথাগতং;

পুন দেয্যাসি [দেয্যাথ (ক.)] সম্বুদ্ধং, আনন্দস্স যসস্সিনো’.

(নিমন্তনকথা)

৫০. ‘‘অক্খদস্সেভিৱাদেত্ৱা, আনন্দঞ্চাপি খত্তিযং;

তুট্ঠো পমুদিতো হুত্ৱা, সম্বুদ্ধমুপসঙ্কমিং.

৫১. ‘‘উপসঙ্কম্ম সম্বুদ্ধং, ওঘতিণ্ণমনাসৱং;

সিৰসা অভিৱাদেত্ৱা, ইদং ৱচনমব্ৰৱিং.

৫২. ‘ৱসীসতসহস্সেহি, অধিৱাসেহি চক্খুম;

হাসযন্তো মম চিত্তং, নিৱেসনমুপেহি মে’.

৫৩. ‘‘পদুমুত্তৰো লোকৱিদূ, আহুতীনং পটিগ্গহো;

মম সঙ্কপ্পমঞ্ঞায, অধিৱাসেসি চক্খুমা.

৫৪. ‘‘অধিৱাসনমঞ্ঞায, অভিৱাদিয সত্থুনো;

হট্ঠো উদগ্গচিত্তোহং, নিৱেসনমুপাগমিং.

(দানপটিযাদনং)

৫৫. ‘‘মিত্তামচ্চে সমানেত্ৱা, ইদং ৱচনমব্ৰৱিং;

‘সুদুল্লভো মযা লদ্ধো, মণি জোতিৰসো যথা.

৫৬. ‘‘‘কেন তং পূজযিস্সাম, অপ্পমেয্যো অনূপমো;

অতুলো অসমো ধীৰো, জিনো অপ্পটিপুগ্গলো.

৫৭. ‘‘‘তথাসমসমো চেৱ, অদুতিযো নৰাসভো;

দুক্কৰং অধিকাৰঞ্হি, বুদ্ধানুচ্ছৱিকং মযা.

৫৮. ‘‘‘নানাপুপ্ফে সমানেত্ৱা, কৰোম পুপ্ফমণ্ডপং;

বুদ্ধানুচ্ছৱিকং এতং, সব্বপূজা ভৱিস্সতি’.

৫৯. ‘‘উপ্পলং পদুমং ৱাপি, ৱস্সিকং অধিমুত্তকং [অতিমুত্তকং (?)];

চম্পকং [চন্দনং (ক.)] নাগপুপ্ফঞ্চ, মণ্ডপং কাৰযিং অহং.

৬০. ‘‘সতাসনসহস্সানি, ছত্তচ্ছাযায পঞ্ঞপিং;

পচ্ছিমং আসনং ময্হং, অধিকং সতমগ্ঘতি.

৬১. ‘‘সতাসনসহস্সানি, ছত্তচ্ছাযায পঞ্ঞপিং;

পটিযাদেত্ৱা অন্নপানং, কালং আৰোচযিং অহং.

৬২. ‘‘আৰোচিতম্হি কালম্হি, পদুমুত্তৰো মহামুনি;

ৱসীসতসহস্সেহি, নিৱেসনমুপেসি মে.

৬৩. ‘‘ধাৰেন্তং উপৰিচ্ছত্তং [ধাৰেন্তমুপৰিচ্ছত্তে (সী.)], সুফুল্লপুপ্ফমণ্ডপে;

ৱসীসতসহস্সেহি, নিসীদি পুৰিসুত্তমো.

৬৪. ‘‘‘ছত্তসতসহস্সানি, সতসহস্সমাসনং;

কপ্পিযং অনৱজ্জঞ্চ, পটিগণ্হাহি চক্খুম’.

৬৫. ‘‘পদুমুত্তৰো লোকৱিদূ, আহুতীনং পটিগ্গহো;

মমং তাৰেতুকামো সো, সম্পটিচ্ছি মহামুনি.

(দানকথা)

৬৬. ‘‘ভিক্খুনো একমেকস্স, পচ্চেকং পত্তমদাসহং;

জহিংসু সুম্ভকং [পুব্বকং (সী.), সম্ভতং (স্যা.), মত্তিকং (?)] পত্তং, লোহপত্তং অধাৰযুং.

৬৭. ‘‘সত্তৰত্তিন্দিৱং বুদ্ধো, নিসীদি পুপ্ফমণ্ডপে;

বোধযন্তো বহূ সত্তে, ধম্মচক্কং পৱত্তযি.

৬৮. ‘‘ধম্মচক্কং পৱত্তেন্তো, হেট্ঠতো পুপ্ফমণ্ডপে;

চুল্লাসীতিসহস্সানং, ধম্মাভিসমযো অহু.

৬৯. ‘‘সত্তমে দিৱসে পত্তে, পদুমুত্তৰো মহামুনি;

ছত্তচ্ছাযাযমাসীনো, ইমা গাথা অভাসথ.

(ব্যাকৰণং)

৭০. ‘‘‘অনূনকং দানৱৰং, যো মে পাদাসি মাণৱো;

তমহং কিত্তযিস্সামি, সুণাথ মম ভাসতো.

৭১. ‘‘‘হত্থী অস্সা ৰথা পত্তী, সেনা চ চতুৰঙ্গিনী;