৯. সোণকোটিৱীসত্থেৰঅপদানং

৪৯. ‘‘ৱিপস্সিনো পাৱচনে, একং লেণং মযা কতং;

চাতুদ্দিসস্স সঙ্ঘস্স, বন্ধুমাৰাজধানিযা.

৫০. ‘‘দুস্সেহি ভূমিং লেণস্স, সন্থৰিত্ৱা পৰিচ্চজিং;

উদগ্গচিত্তো সুমনো, অকাসিং পণিধিং তদা.

৫১. ‘‘আৰাধযেয্যং সম্বুদ্ধং, পব্বজ্জঞ্চ লভেয্যহং;

অনুত্তৰঞ্চ নিব্বানং, ফুসেয্যং সন্তিমুত্তমং.

৫২. ‘‘তেনেৱ সুক্কমূলেন, কপ্পে [কপ্পং (সী.), কপ্প (ক.)] নৱুতি সংসৰিং;

দেৱভূতো মনুস্সো চ, কতপুঞ্ঞো ৱিৰোচহং.

৫৩. ‘‘ততো কম্মাৱসেসেন, ইধ পচ্ছিমকে ভৱে;

চম্পাযং অগ্গসেট্ঠিস্স, জাতোম্হি একপুত্তকো.

৫৪. ‘‘জাতমত্তস্স মে সুত্ৱা, পিতু ছন্দো অযং অহু;

দদামহং কুমাৰস্স, ৱীসকোটী অনূনকা.

৫৫. ‘‘চতুৰঙ্গুলা চ মে লোমা, জাতা পাদতলে উভো;

সুখুমা মুদুসম্ফস্সা, তূলাপিচুসমা সুভা.

৫৬. ‘‘অতীতা নৱুতি কপ্পা, অযং একো চ উত্তৰি;

নাভিজানামি নিক্খিত্তে, পাদে ভূম্যা অসন্থতে.

৫৭. ‘‘আৰাধিতো মে সম্বুদ্ধো, পব্বজিং অনগাৰিযং;

অৰহত্তঞ্চ মে পত্তং, সীতিভূতোম্হি নিব্বুতো.

৫৮. ‘‘অগ্গো আৰদ্ধৱীৰিযানং, নিদ্দিট্ঠো সব্বদস্সিনা;

খীণাসৱোম্হি অৰহা, ছড়ভিঞ্ঞো মহিদ্ধিকো.

৫৯. ‘‘একনৱুতিতো কপ্পে, যং দানমদদিং তদা;

দুগ্গতিং নাভিজানামি, লেণদানস্সিদং ফলং.

৬০. ‘‘কিলেসা ঝাপিতা ময্হং…পে… ৱিহৰামি অনাসৱো.

৬১. ‘‘স্ৱাগতং ৱত মে আসি…পে… কতং বুদ্ধস্স সাসনং.

৬২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

৬৩. ‘‘থেৰো কোটিৱীসো [কোটিৱিসো (স্যা. ক.), কোড়িৱিসো (অঞ্ঞট্ঠানেসু)] সোণো, ভিক্খুসঙ্ঘস্স অগ্গতো;

পঞ্হং পুট্ঠো ৱিযাকাসি, অনোতত্তে মহাসৰে’’তি.

ইত্থং সুদং আযস্মা সোণো কোটিৱীসো থেৰো ইমা গাথাযো অভাসিত্থাতি.

সোণকোটিৱীসত্থেৰস্সাপদানং নৱমং.