৩. তীণুপ্পলমালিযত্থেৰঅপদানং

১৩. ‘‘চন্দভাগানদীতীৰে, অহোসিং ৱানৰো তদা;

অদ্দসং ৱিৰজং বুদ্ধং, নিসিন্নং পব্বতন্তৰে.

১৪. ‘‘ওভাসেন্তং দিসা সব্বা, সালৰাজংৱ ফুল্লিতং;

লক্খণব্যঞ্জনূপেতং, দিস্ৱানত্তমনো অহং.

১৫. ‘‘উদগ্গচিত্তো সুমনো, পীতিযা হট্ঠমানসো;

তীণি উপ্পলপুপ্ফানি, মত্থকে অভিৰোপযিং.

১৬. ‘‘পূজযিত্ৱান পুপ্ফানি, ফুস্সস্সাহং মহেসিনো;

সগাৰৱো ভৱিত্ৱান, পক্কামিং উত্তৰামুখো.

১৭. ‘‘গচ্ছন্তো পটিকুটিকো, ৱিপ্পসন্নেন চেতসা;

সেলন্তৰে পতিত্ৱান, পাপুণিং জীৱিতক্খযং.

১৮. ‘‘তেন কম্মেন সুকতেন, চেতনাপণিধীহি চ;

জহিত্ৱা পুৰিমং জাতিং, তাৱতিংসমগচ্ছহং.

১৯. ‘‘সতানং তীণিক্খত্তুঞ্চ, দেৱৰজ্জমকাৰযিং;

সতানং পঞ্চক্খত্তুঞ্চ, চক্কৱত্তী অহোসহং.

২০. ‘‘দ্ৱেনৱুতে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তীণুপ্পলমালিযো থেৰো ইমা গাথাযো অভাসিত্থাতি.

তীণুপ্পলমালিযত্থেৰস্সাপদানং ততিযং.