২. পাটলিপুপ্ফিযত্থেৰঅপদানং

৬. ‘‘ৱিপস্সী নাম ভগৱা, সযম্ভূ অগ্গপুগ্গলো;

পুৰক্খতো সসিস্সেহি, পাৱিসি বন্ধুমং জিনো.

৭. ‘‘তীণি পাটলিপুপ্ফানি, উচ্ছঙ্গে ঠপিতানি মে;

সীসং ন্হাযিতুকামোৱ, নদীতিত্থং অগচ্ছহং.

৮. ‘‘নিক্খম্ম বন্ধুমতিযা, অদ্দসং লোকনাযকং;

ইন্দীৱৰংৱ জলিতং, আদিত্তংৱ হুতাসনং.

৯. ‘‘ব্যগ্ঘূসভংৱ পৱৰং, অভিজাতংৱ কেসৰিং;

গচ্ছন্তং সমণানগ্গং, ভিক্খুসঙ্ঘপুৰক্খতং.

১০. ‘‘তস্মিং পসন্নো [সমণে (ক.)] সুগতে, কিলেসমলধোৱনে;

গহেত্ৱা তীণি পুপ্ফানি, বুদ্ধসেট্ঠং অপূজযিং.

১১. ‘‘একনৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পাটলিপুপ্ফিযো থেৰো ইমা গাথাযো অভাসিত্থাতি.

পাটলিপুপ্ফিযত্থেৰস্সাপদানং দুতিযং.