৪. যঞ্ঞসামিকত্থেৰঅপদানং

১৭. ‘‘জাতিযা সত্তৱস্সোহং, অহোসিং মন্তপাৰগূ;

কুলৱত্তং [কুলৱংসং (সী. স্যা.)] অধাৰেসিং, যঞ্ঞো উস্সাহিতো মযা.

১৮. ‘‘চুল্লাসীতিসহস্সানি, পসূ হঞ্ঞন্তি মে তদা;

সাৰথম্ভুপনীতানি [তাৰস্মীহি উপনীতানি (ক.), সাৰস্মিংহি উপনীতানি (স্যা.)], যঞ্ঞত্থায উপট্ঠিতা.

১৯. ‘‘উক্কামুখপহট্ঠোৱ, খদিৰঙ্গাৰসন্নিভো;

উদযন্তোৱ সূৰিযো, পুণ্ণমাযেৱ [পুণ্ণমাসেৱ (সী.)] চন্দিমা.

২০. ‘‘সিদ্ধত্থো সব্বসিদ্ধত্থো, তিলোকমহিতো হিতো;

উপগন্ত্ৱান সম্বুদ্ধো, ইদং ৱচনমব্ৰৱি.

২১. ‘‘‘অহিংসা সব্বপাণীনং, কুমাৰ মম ৰুচ্চতি;

থেয্যা চ অতিচাৰা চ, মজ্জপানা চ আৰতি.

২২. ‘‘‘ৰতি চ সমচৰিযায, বাহুসচ্চং কতঞ্ঞুতা;

দিট্ঠে ধম্মে পৰত্থ চ, ধম্মা এতে পসংসিযা.

২৩. ‘‘‘এতে ধম্মে ভাৱযিত্ৱা, সব্বসত্তহিতে ৰতো [হিতেসিতো (ক.)];

বুদ্ধে চিত্তং পসাদেত্ৱা, ভাৱেহি মগ্গমুত্তমং’.

২৪. ‘‘ইদং ৱত্ৱান সব্বঞ্ঞূ, লোকজেট্ঠো নৰাসভো;

মমেৱং অনুসাসিত্ৱা, ৱেহাসং উগ্গতো গতো.

২৫. ‘‘পুব্বে চিত্তং ৱিসোধেত্ৱা, পচ্ছা চিত্তং পসাদযিং;

তেন চিত্তপ্পসাদেন, তুসিতং উপপজ্জহং.

২৬. ‘‘চতুন্নৱুতিতো কপ্পে, যদা চিত্তং পসাদযিং;

দুগ্গতিং নাভিজানামি, বুদ্ধসঞ্ঞাযিদং ফলং.

২৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা যঞ্ঞসামিকো থেৰো ইমা গাথাযো অভাসিত্থাতি.

যঞ্ঞসামিকত্থেৰস্সাপদানং চতুত্থং.