১. উমাপুপ্ফিযত্থেৰঅপদানং

১. ‘‘সমাহিতং সমাপন্নং, সিদ্ধত্থমপৰাজিতং;

সমাধিনা উপৱিট্ঠং, অদ্দসাহং নৰুত্তমং.

২. ‘‘উমাপুপ্ফং গহেত্ৱান, বুদ্ধস্স অভিৰোপযিং;

সব্বপুপ্ফা একসীসা, উদ্ধংৱণ্টা অধোমুখা.

৩. ‘‘সুচিত্তা ৱিয তিট্ঠন্তে, আকাসে পুপ্ফসন্থৰা;

তেন চিত্তপ্পসাদেন, তুসিতং উপপজ্জহং.

৪. ‘‘চতুন্নৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৫. ‘‘পঞ্চপঞ্ঞাসিতো কপ্পে, একো আসিং মহীপতি;

সমন্তছদনো নাম, চক্কৱত্তী মহব্বলো.

৬. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং.

ইত্থং সুদং আযস্মা উমাপুপ্ফিযো থেৰো ইমা গাথাযো অভাসিত্থাতি.

উমাপুপ্ফিযত্থেৰস্সাপদানং পঠমং.