৩২. আৰক্খদাযকৱগ্গো

১. আৰক্খদাযকত্থেৰঅপদানং

১. ‘‘ধম্মদস্সিস্স মুনিনো, ৱতি কাৰাপিতা মযা;

আৰক্খো চ মযা দিন্নো, দ্ৱিপদিন্দস্স তাদিনো.

২. ‘‘অট্ঠাৰসে কপ্পসতে, যং কম্মমকৰিং তদা;

তেন কম্মৱিসেসেন, পত্তো মে আসৱক্খযো.

৩. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা আৰক্খদাযকো থেৰো ইমা গাথাযো অভাসিত্থাতি.

আৰক্খদাযকত্থেৰস্সাপদানং পঠমং.

২. ভোজনদাযকত্থেৰঅপদানং

৪. ‘‘সুজাতো সাললট্ঠীৱ, সোভঞ্জনমিৱুগ্গতো;

ইন্দলট্ঠিৰিৱাকাসে, ৱিৰোচতি সদা জিনো.

৫. ‘‘তস্স দেৱাতিদেৱস্স, ৱেস্সভুস্স মহেসিনো;

অদাসি ভোজনমহং, ৱিপ্পসন্নেন চেতসা.

৬. ‘‘তং মে বুদ্ধো অনুমোদি, সযম্ভূ অপৰাজিতো;

ভৱে নিব্বত্তমানম্হি, ফলং নিব্বত্ততূ তৱ.

৭. ‘‘একত্তিংসে ইতো কপ্পে, যং দানমদদিং তদা;

দুগ্গতিং নাভিজানামি, ভোজনস্স ইদং ফলং.

৮. ‘‘পঞ্চৱীসে ইতো কপ্পে, একো আসিং অমিত্তকো;

সত্তৰতনসম্পন্নো, চক্কৱত্তী মহব্বলো.

৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ভোজনদাযকো থেৰো ইমা গাথাযো অভাসিত্থাতি.

ভোজনদাযকত্থেৰস্সাপদানং দুতিযং.

৩. গতসঞ্ঞকত্থেৰঅপদানং

১০. ‘‘আকাসেৱ পদং নত্থি, অম্বৰে অনিলঞ্জসে;

সিদ্ধত্থং জিনমদ্দক্খিং, গচ্ছন্তং তিদিৱঙ্গণে [তিদিৱঙ্গণং (স্যা. ক.)].

১১. ‘‘অনিলেনেৰিতং দিস্ৱা, সম্মাসম্বুদ্ধচীৱৰং;

ৱিত্তি মমাহু তাৱদে [ৱিত্তি মে পাহুণা তাৱ (স্যা.), ৱিত্তি মে তাৱদে জাতা (সী.)], দিস্ৱান গমনং মুনিং [মুনে (সী.)].

১২. ‘‘চতুন্নৱুতিতো কপ্পে, যং সঞ্ঞমলভিং তদা;

দুগ্গতিং নাভিজানামি, বুদ্ধসঞ্ঞাযিদং ফলং.

১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা গতসঞ্ঞকো থেৰো ইমা গাথাযো অভাসিত্থাতি.

গতসঞ্ঞকত্থেৰস্সাপদানং ততিযং.

৪. সত্তপদুমিযত্থেৰঅপদানং

১৪. ‘‘নদীকূলে ৱসামহং, নেসাদো নাম ব্ৰাহ্মণো;

সতপত্তেহি পুপ্ফেহি, সম্মজ্জিত্ৱান অস্সমং.

১৫. ‘‘সুৱণ্ণৱণ্ণং সম্বুদ্ধং, সিদ্ধত্থং লোকনাযকং;

দিস্ৱা নভেন [ৱনেন (স্যা. ক.)] গচ্ছন্তং, হাসো মে উদপজ্জথ.

১৬. ‘‘পচ্চুগ্গন্ত্ৱান সম্বুদ্ধং, লোকজেট্ঠং নৰাসভং;

অস্সমং অতিনামেত্ৱা, জলজগ্গেহি ওকিৰিং.

১৭. ‘‘চতুন্নৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

১৮. ‘‘ইতো তে সত্তমে কপ্পে, চতুৰো পাদপাৱৰা;

সত্তৰতনসম্পন্না, চক্কৱত্তী মহব্বলা.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সত্তপদুমিযো থেৰো ইমা গাথাযো অভাসিত্থাতি.

সত্তপদুমিযত্থেৰস্সাপদানং চতুত্থং.

৫. পুপ্ফাসনদাযকত্থেৰঅপদানং

২০. ‘‘সুৱণ্ণৱণ্ণং সম্বুদ্ধং, পীতৰংসিংৱ [সতৰংসিংৱ (সী. স্যা.)] ভাণুমং;

অৱিদূৰেন গচ্ছন্তং, সিদ্ধত্থং অপৰাজিতং.

২১. ‘‘তস্স পচ্চুগ্গমিত্ৱান, পৱেসেত্ৱান অস্সমং;

পুপ্ফাসনং মযা দিন্নং, ৱিপ্পসন্নেন চেতসা.

২২. ‘‘অঞ্জলিং পগ্গহেত্ৱান, ৱেদজাতো তদা অহং;

বুদ্ধে চিত্তং পসাদেত্ৱা, তং কম্মং পৰিণামযিং.

২৩. ‘‘যং মে অত্থি কতং পুঞ্ঞং, সযম্ভুম্হপৰাজিতে;

সব্বেন তেন কুসলেন, ৱিমলো হোমি সাসনে.

২৪. ‘‘চতুন্নৱুতিতো কপ্পে, পুপ্ফাসনমদং তদা;

দুগ্গতিং নাভিজানামি, পুপ্ফাসনস্সিদং ফলং.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুপ্ফাসনদাযকো থেৰো ইমা গাথাযো অভাসিত্থাতি.

পুপ্ফাসনদাযকত্থেৰস্সাপদানং পঞ্চমং.

৬. আসনসন্থৱিকত্থেৰঅপদানং

২৬. ‘‘চেতিযং উত্তমং নাম, সিখিনো লোকবন্ধুনো;

অৰঞ্ঞে ইৰীণে ৱনে, অন্ধাহিণ্ডামহং তদা.

২৭. ‘‘পৱনা নিক্খমন্তেন, দিট্ঠং সীহাসনং মযা;

একংসং অঞ্জলিং কত্ৱা, সন্থৱিং [থৱিস্সং (সী.)] লোকনাযকং.

২৮. ‘‘দিৱসভাগং থৱিত্ৱান, বুদ্ধং লোকগ্গনাযকং;

হট্ঠো হট্ঠেন চিত্তেন, ইমং ৱাচং উদীৰযিং.

২৯. ‘‘‘নমো তে পুৰিসাজঞ্ঞ, নমো তে পুৰিসুত্তম;

সব্বঞ্ঞূসি মহাৱীৰ, লোকজেট্ঠ নৰাসভ’.

৩০. ‘‘অভিত্থৱিত্ৱা সিখিনং, নিমিত্তকৰণেনহং;

আসনং অভিৱাদেত্ৱা, পক্কামিং উত্তৰামুখো.

৩১. ‘‘একত্তিংসে ইতো কপ্পে, যং থৱিং ৱদতং ৱৰং;

দুগ্গতিং নাভিজানামি, থোমনায ইদং ফলং.

৩২. ‘‘সত্তৱীসে ইতো কপ্পে, অতুলা সত্ত আসু তে;

সত্তৰতনসম্পন্না, চক্কৱত্তী মহব্বলা.

৩৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা আসনসন্থৱিকো [আসনসন্থৱকো (?), আসনথৱিকো (ক.), আসনত্থৱিকো (সী. স্যা.)] থেৰো ইমা গাথাযো অভাসিত্থাতি.

আসনসন্থৱিকত্থেৰস্সাপদানং ছট্ঠং.

৭. সদ্দসঞ্ঞকত্থেৰঅপদানং

৩৪. ‘‘সুদস্সনো মহাৱীৰো, দেসেতি অমতং পদং;

পৰিৱুতো সাৱকেহি, ৱসতি ঘৰমুত্তমে.

৩৫. ‘‘তায ৱাচায মধুৰায, সঙ্গণ্হাতি [সঙ্গণ্হন্তে (সী.)] মহাজনং;

ঘোসো চ ৱিপুলো আসি, আসীসো [আসংসো (সী.)] দেৱমানুসে.

৩৬. ‘‘নিগ্ঘোসসদ্দং সুত্ৱান, সিদ্ধত্থস্স মহেসিনো;

সদ্দে চিত্তং পসাদেত্ৱা, অৱন্দিং লোকনাযকং.

৩৭. ‘‘চতুন্নৱুতিতো কপ্পে, যং সঞ্ঞমলভিং তদা;

দুগ্গতিং নাভিজানামি, বুদ্ধসঞ্ঞাযিদং ফলং.

৩৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সদ্দসঞ্ঞকো থেৰো ইমা গাথাযো অভাসিত্থাতি.

সদ্দসঞ্ঞকত্থেৰস্সাপদানং সত্তমং.

৮. তিৰংসিযত্থেৰঅপদানং

৩৯. ‘‘কেসৰিং অভিজাতংৱ, অগ্গিক্খন্ধংৱ পব্বতে;

ওভাসেন্তং দিসা সব্বা [নিৱাসেন্তং (ক.), দিসাসিন্নং (স্যা.)], সিদ্ধত্থং পব্বতন্তৰে.

৪০. ‘‘সূৰিযস্স চ আলোকং, চন্দালোকং তথেৱ চ;

বুদ্ধালোকঞ্চ দিস্ৱান, ৱিত্তি মে উদপজ্জথ.

৪১. ‘‘তযো আলোকে দিস্ৱান, সম্বুদ্ধং [বুদ্ধঞ্চ (সী.)] সাৱকুত্তমং;

একংসং অজিনং কত্ৱা, সন্থৱিং লোকনাযকং.

৪২. ‘‘তযো হি আলোককৰা, লোকে লোকতমোনুদা;

চন্দো চ সূৰিযো চাপি, বুদ্ধো চ লোকনাযকো.

৪৩. ‘‘ওপম্মং উপদস্সেত্ৱা, কিত্তিতো মে মহামুনি;

বুদ্ধস্স ৱণ্ণং কিত্তেত্ৱা, কপ্পং সগ্গম্হি মোদহং.

৪৪. ‘‘চতুন্নৱুতিতো কপ্পে, যং বুদ্ধমভিকিত্তযিং;

দুগ্গতিং নাভিজানামি, কিত্তনায ইদং ফলং.

৪৫. ‘‘একসট্ঠিম্হিতো কপ্পে, একো ঞাণধৰো অহু;

সত্তৰতনসম্পন্নো, চক্কৱত্তী মহব্বলো.

৪৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিৰংসিযো থেৰো ইমা গাথাযো অভাসিত্থাতি.

তিৰংসিযত্থেৰস্সাপদানং অট্ঠমং.

৯. কন্দলিপুপ্ফিযত্থেৰঅপদানং

৪৭. ‘‘সিন্ধুযা নদিযা তীৰে, অহোসিং কস্সকো তদা;

পৰকম্মাযনে যুত্তো, পৰভত্তং অপস্সিতো.

৪৮. ‘‘সিন্ধুং অনুচৰন্তোহং, সিদ্ধত্থং জিনমদ্দসং;

সমাধিনা নিসিন্নংৱ, সতপত্তংৱ পুপ্ফিতং.

৪৯. ‘‘সত্ত কন্দলিপুপ্ফানি, ৱণ্টে ছেত্ৱানহং তদা;

মত্থকে অভিৰোপেসিং, বুদ্ধস্সাদিচ্চবন্ধুনো.

৫০. ‘‘সুৱণ্ণৱণ্ণং সম্বুদ্ধং, অনুকূলে সমাহিতং;

তিধাপভিন্নমাতঙ্গং, কুঞ্জৰংৱ দুৰাসদং.

৫১. ‘‘তমহং উপগন্ত্ৱান, নিপকং ভাৱিতিন্দ্ৰিযং;

অঞ্জলিং পগ্গহেত্ৱান, অৱন্দিং সত্থুনো অহং.

৫২. ‘‘চতুন্নৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

৫৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কন্দলিপুপ্ফিযো থেৰো ইমা গাথাযো অভাসিত্থাতি.

কন্দলিপুপ্ফিযত্থেৰস্সাপদানং নৱমং.

১০. কুমুদমালিযত্থেৰঅপদানং

৫৪. ‘‘উসভং পৱৰং ৱীৰং, মহেসিং ৱিজিতাৱিনং;

ৱিপস্সিনং মহাৱীৰং, অভিজাতংৱ কেসৰিং.

৫৫. ‘‘ৰথিযং পটিপজ্জন্তং, আহুতীনং পটিগ্গহং;

গহেত্ৱা কুমুদং মালং, বুদ্ধসেট্ঠং সমোকিৰিং.

৫৬. ‘‘একনৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৫৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কুমুদমালিযো থেৰো ইমা গাথাযো অভাসিত্থাতি.

কুমুদমালিযত্থেৰস্সাপদানং দসমং.

আৰক্খদাযকৱগ্গো বাত্তিংসতিমো [বত্তিংসতিমো (সী. স্যা.)].