৩১. পদুমকেসৰৱগ্গো

১. পদুমকেসৰিযত্থেৰঅপদানং

১. ‘‘ইসিসঙ্ঘে অহং পুব্বে, আসিং মাতঙ্গৱাৰণো;

মহেসীনং পসাদেন, পদ্মকেসৰমোকিৰিং.

২. ‘‘পচ্চেকজিনসেট্ঠেসু, ধুতৰাগেসু তাদিসু;

তেসু চিত্তং পসাদেত্ৱা, কপ্পং সগ্গম্হি মোদহং.

৩. ‘‘একনৱুতিতো কপ্পে, কেসৰং ওকিৰিং তদা;

দুগ্গতিং নাভিজানামি, বুদ্ধপূজাযিদং ফলং.

৪. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা পদুমকেসৰিযো থেৰো ইমা গাথাযো অভাসিত্থাতি.

পদুমকেসৰিযত্থেৰস্সাপদানং পঠমং.

২. সব্বগন্ধিযত্থেৰঅপদানং

৫. ‘‘গন্ধমালং মযা দিন্নং, ৱিপস্সিস্স মহেসিনো;

অদাসিং উজুভূতস্স, কোসেয্যৱত্থমুত্তমং.

৬. ‘‘একনৱুতিতো কপ্পে, যং ৱত্থমদদিং [গন্ধমদদিং (স্যা.)] পুৰে;

দুগ্গতিং নাভিজানামি, গন্ধদানস্সিদং ফলং.

৭. ‘‘ইতো পন্নৰসে কপ্পে, সুচেড়ো নাম খত্তিযো;

সত্তৰতনসম্পন্নো, চক্কৱত্তী মহব্বলো.

৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সব্বগন্ধিযো থেৰো ইমা গাথাযো অভাসিত্থাতি.

সব্বগন্ধিযত্থেৰস্সাপদানং দুতিযং.

৩. পৰমন্নদাযকত্থেৰঅপদানং

৯. ‘‘কণিকাৰংৱ জোতন্তং, উদযন্তংৱ ভাণুমং;

ৱিপস্সিং অদ্দসং বুদ্ধং, লোকজেট্ঠং নৰাসভং.

১০. ‘‘অঞ্জলিং পগ্গহেত্ৱান, অভিনেসিং সকং ঘৰং;

অভিনেত্ৱান সম্বুদ্ধং, পৰমন্নমদাসহং.

১১. ‘‘একনৱুতিতো কপ্পে, পৰমন্নমদিং [পৰমন্নং দদিং (সী.), পৰমন্নমদং (স্যা.)] তদা;

দুগ্গতিং নাভিজানামি, পৰমন্নস্সিদং ফলং.

১২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পৰমন্নদাযকো থেৰো ইমা গাথাযো অভাসিত্থাতি.

পৰমন্নদাযকত্থেৰস্সাপদানং ততিযং.

৪. ধম্মসঞ্ঞকত্থেৰঅপদানং

১৩. ‘‘ৱিপস্সিনো ভগৱতো, মহাবোধিমহো অহু;

ৰুক্খট্ঠস্সেৱ সম্বুদ্ধো, [ৰুক্খট্ঠেযেৱ সম্বুদ্ধে (সী.), ৰুক্খট্ঠো ইৱ সম্বুদ্ধো (অট্ঠ.) এত্থ ৰুক্খট্ঠস্সেৱ বোধিমহকাৰজনস্স সম্বুদ্ধো চতুসচ্চং পকাসেতীতি অত্থোপি সক্কা ঞাতুং] লোকজেট্ঠো নৰাসভো [লোকজেট্ঠে নৰাসভে (সী.)].

১৪. ‘‘ভগৱা তম্হি সমযে, ভিক্খুসঙ্ঘপুৰক্খতো;

চতুসচ্চং পকাসেতি, ৱাচাসভিমুদীৰযং.

১৫. ‘‘সঙ্খিত্তেন চ দেসেন্তো, ৱিত্থাৰেন চ দেসযং [দেসযি (স্যা.), ভাসতি (ক.)];

ৱিৱট্টচ্ছদো সম্বুদ্ধো, নিব্বাপেসি মহাজনং.

১৬. ‘‘তস্সাহং ধম্মং সুত্ৱান, লোকজেট্ঠস্স তাদিনো;

ৱন্দিত্ৱা সত্থুনো পাদে, পক্কামিং উত্তৰামুখো.

১৭. ‘‘একনৱুতিতো কপ্পে, যং ধম্মমসুণিং তদা;

দুগ্গতিং নাভিজানামি, ধম্মসৱস্সিদং ফলং.

১৮. ‘‘তেত্তিংসম্হি ইতো কপ্পে, একো আসিং মহীপতি;

সুতৱা নাম নামেন, চক্কৱত্তী মহব্বলো.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ধম্মসঞ্ঞকো থেৰো ইমা গাথাযো অভাসিত্থাতি.

ধম্মসঞ্ঞকত্থেৰস্সাপদানং চতুত্থং.

৫. ফলদাযকত্থেৰঅপদানং

২০. ‘‘ভাগীৰথীনদীতীৰে, অহোসি অস্সমো তদা;

তমহং অস্সমং গচ্ছিং, ফলহত্থো অপেক্খৱা.

২১. ‘‘ৱিপস্সিং তত্থ অদ্দক্খিং, পীতৰংসিংৱ ভাণুমং;

যং মে অত্থি ফলং সব্বং, অদাসিং সত্থুনো অহং.

২২. ‘‘একনৱুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

২৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ফলদাযকো থেৰো ইমা গাথাযো অভাসিত্থাতি.

ফলদাযকত্থেৰস্সাপদানং পঞ্চমং.

৬. সম্পসাদকত্থেৰঅপদানং

২৪. ‘‘‘নমো তে বুদ্ধ ৱীৰত্থু, ৱিপ্পমুত্তোসি সব্বধি;

ব্যসনম্হি [ব্যসনং হি (সী.)] অনুপ্পত্তো, তস্স মে সৰণং ভৱ’.

২৫. ‘‘সিদ্ধত্থো তস্স ব্যাকাসি, লোকে অপ্পটিপুগ্গলো;

‘মহোদধিসমো সঙ্ঘো, অপ্পমেয্যো অনুত্তৰো.

২৬. ‘‘‘তত্থ ত্ৱং ৱিৰজে খেত্তে, অনন্তফলদাযকে;

সঙ্ঘে চিত্তং পসাদেত্ৱা, সুবীজং ৱাপ [চাপি (সী.), ৱাপি (স্যা.)] ৰোপয.

২৭. ‘‘ইদং ৱত্ৱান সব্বঞ্ঞূ, লোকজেট্ঠো নৰাসভো;

মমেৱ অনুসাসিত্ৱা, ৱেহাসং নভমুগ্গমি.

২৮. ‘‘অচিৰং গতমত্তম্হি, সব্বঞ্ঞুম্হি নৰাসভে;

মৰণং সমনুপ্পত্তো, তুসিতং উপপজ্জহং.

২৯. ‘‘তদাহং ৱিৰজে খেত্তে, অনন্তফলদাযকে;

সঙ্ঘে চিত্তং পসাদেত্ৱা, কপ্পং সগ্গম্হি মোদহং.

৩০. ‘‘চতুন্নৱুতিতো কপ্পে, পসাদমলভিং তদা;

দুগ্গতিং নাভিজানামি, পসাদস্স ইদং ফলং.

৩১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সম্পসাদকো থেৰো ইমা গাথাযো অভাসিত্থাতি.

সম্পসাদকত্থেৰস্সাপদানং ছট্ঠং.

৭. আৰামদাযকত্থেৰঅপদানং

৩২. ‘‘সিদ্ধত্থস্স ভগৱতো, আৰামো ৰোপিতো মযা;

সন্দচ্ছাযেসু [সীতছাযেসু (স্যা.), সন্তচ্ছাযেসু (ক.)] ৰুক্খেসু, উপাসন্তেসু পক্খিসু.

৩৩. ‘‘অদ্দসং ৱিৰজং বুদ্ধং, আহুতীনং পটিগ্গহং;

আৰামং অভিনামেসিং, লোকজেট্ঠং নৰাসভং.

৩৪. ‘‘হট্ঠো হট্ঠেন চিত্তেন, ফলং পুপ্ফমদাসহং;

ততো জাতপ্পসাদোৱ, তং ৱনং পৰিণামযিং.

৩৫. ‘‘বুদ্ধস্স যমিদং দাসিং, ৱিপ্পসন্নেন চেতসা;

ভৱে নিব্বত্তমানম্হি, নিব্বত্ততি ফলং মম.

৩৬. ‘‘চতুন্নৱুতিতো কপ্পে, যং আৰামমদং তদা;

দুগ্গতিং নাভিজানামি, আৰামস্স ইদং ফলং.

৩৭. ‘‘সত্ততিংসে ইতো কপ্পে, সত্তাসুং মুদুসীতলা;

সত্তৰতনসম্পন্না, চক্কৱত্তী মহব্বলা.

৩৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা আৰামদাযকো থেৰো ইমা গাথাযো অভাসিত্থাতি.

আৰামদাযকত্থেৰস্সাপদানং সত্তমং.

৮. অনুলেপদাযকত্থেৰঅপদানং

৩৯. ‘‘অত্থদস্সিস্স মুনিনো, অদ্দসং সাৱকং অহং;

নৱকম্মং কৰোন্তস্স, সীমায উপগচ্ছহং.

৪০. ‘‘নিট্ঠিতে নৱকম্মে চ, অনুলেপমদাসহং;

পসন্নচিত্তো সুমনো, পুঞ্ঞক্খেত্তে অনুত্তৰে.

৪১. ‘‘অট্ঠাৰসে কপ্পসতে, যং কম্মমকৰিং তদা;

দুগ্গতিং নাভিজানামি, অনুলেপস্সিদং ফলং.

৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অনুলেপদাযকো থেৰো ইমা গাথাযো অভাসিত্থাতি.

অনুলেপদাযকত্থেৰস্সাপদানং অট্ঠমং.

৯. বুদ্ধসঞ্ঞকত্থেৰঅপদানং

৪৩. ‘‘উদেন্তং সতৰংসিংৱ, পীতৰংসিংৱ ভাণুমং;

ৱনন্তৰগতং সন্তং, লোকজেট্ঠং নৰাসভং.

৪৪. ‘‘অদ্দসং সুপিনন্তেন, সিদ্ধত্থং লোকনাযকং;

তত্থ চিত্তং পসাদেত্ৱা, সুগতিং উপপজ্জহং.

৪৫. ‘‘চতুন্নৱুতিতো কপ্পে, যং সঞ্ঞমলভিং তদা;

দুগ্গতিং নাভিজানামি, বুদ্ধসঞ্ঞাযিদং ফলং.

৪৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বুদ্ধসঞ্ঞকো থেৰো ইমা গাথাযো অভাসিত্থাতি.

বুদ্ধসঞ্ঞকত্থেৰস্সাপদানং নৱমং.

১০. পব্ভাৰদাযকত্থেৰঅপদানং

৪৭. ‘‘পিযদস্সিনো ভগৱতো, পব্ভাৰো সোধিতো মযা;

ঘটকঞ্চ উপট্ঠাসিং, পৰিভোগায তাদিনো.

৪৮. ‘‘তং মে বুদ্ধো ৱিযাকাসি, পিযদস্সী মহামুনি;

সহস্সকণ্ডো সতভেণ্ডু [সতগেণ্ডু (স্যা. ক.)], ধজালু হৰিতামযো.

৪৯. ‘‘নিব্বত্তিস্সতি সো যূপো, ৰতনঞ্চ অনপ্পকং;

পব্ভাৰদানং দত্ৱান, কপ্পং সগ্গম্হি মোদহং.

৫০. ‘‘ইতো বাত্তিংসকপ্পম্হি, সুসুদ্ধো নাম খত্তিযো;

সত্তৰতনসম্পন্নো, চক্কৱত্তী মহব্বলো.

৫১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পব্ভাৰদাযকো থেৰো ইমা গাথাযো অভাসিত্থাতি.

পব্ভাৰদাযকত্থেৰস্সাপদানং দসমং.

পদুমকেসৰৱগ্গো একতিংসতিমো.