২৬. থোমকৱগ্গো

১. থোমকত্থেৰঅপদানং

১. ‘‘দেৱলোকে ঠিতো সন্তো, ৱিপস্সিস্স মহেসিনো;

ধম্মং সুণিত্ৱা মুদিতো, ইমং ৱাচং অভাসহং.

২. ‘‘‘নমো তে পুৰিসাজঞ্ঞ, নমো তে পুৰিসুত্তম;

বহুজ্জনং [বহুং জনং (সী.)] তাৰযসি, দেসেন্তো অমতং পদং’.

৩. ‘‘একনৱুতিতো কপ্পে, যং ৱাচমভণিং তদা;

দুগ্গতিং নাভিজানামি, থোমনায ইদং ফলং.

৪. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা থোমকো থেৰো ইমা গাথাযো অভাসিত্থাতি.

থোমকত্থেৰস্সাপদানং পঠমং.

২. একাসনদাযকত্থেৰঅপদানং

৫. ‘‘ৱিজহিত্ৱা দেৱৱণ্ণং, সভৰিযো ইধাগমিং;

অধিকাৰং কত্তুকামো, বুদ্ধসেট্ঠস্স সাসনে.

৬. ‘‘দেৱলো নাম নামেন, পদুমুত্তৰসাৱকো;

তস্স ভিক্খা মযা দিন্না, ৱিপ্পসন্নেন চেতসা.

৭. ‘‘সতসহস্সিতো কপ্পে, যং কম্মমকৰিং তদা;

দুগ্গতিং নাভিজানামি, পিণ্ডপাতস্সিদং ফলং.

৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একাসনদাযকো থেৰো ইমা গাথাযো অভাসিত্থাতি.

একাসনদাযকত্থেৰস্সাপদানং দুতিযং.

৩. চিতকপূজকত্থেৰঅপদানং

৯. ‘‘আনন্দো নাম সম্বুদ্ধো, সযম্ভূ অপৰাজিতো;

অৰঞ্ঞে পৰিনিব্বাযি, অমনুস্সম্হি কাননে.

১০. ‘‘দেৱলোকা ইধাগন্ত্ৱা, চিতং কত্ৱানহং তদা;

সৰীৰং তত্থ ঝাপেসিং, সক্কাৰঞ্চ অকাসহং.

১১. ‘‘একনৱুতিতো কপ্পে, যং কম্মমকৰিং তদা;

দুগ্গতিং নাভিজানামি, বুদ্ধপূজাযিদং ফলং.

১২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা চিতকপূজকো থেৰো ইমা গাথাযো অভাসিত্থাতি.

চিতকপূজকত্থেৰস্সাপদানং ততিযং.

৪. তিচম্পকপুপ্ফিযত্থেৰঅপদানং

১৩. ‘‘হিমৱন্তস্সাৱিদূৰে, ৱিকতো [ৱিকনো (সী. স্যা.)] নাম পব্বতো;

তস্স ৱেমজ্ঝে ৱসতি, সমণো ভাৱিতিন্দ্ৰিযো.

১৪. ‘‘দিস্ৱান তস্সোপসমং, ৱিপ্পসন্নেন চেতসা;

তীণি চম্পকপুপ্ফানি, গহেত্ৱান সমোকিৰিং.

১৫. ‘‘একনৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিচম্পকপুপ্ফিযো থেৰো ইমা গাথাযো অভাসিত্থাতি.

তিচম্পকপুপ্ফিযত্থেৰস্সাপদানং চতুত্থং.

৫. সত্তপাটলিযত্থেৰঅপদানং

১৭. ‘‘কণিকাৰংৱ জোতন্তং, নিসিন্নং পব্বতন্তৰে;

সত্ত পাটলিপুপ্ফানি, বুদ্ধস্স অভিৰোপযিং.

১৮. ‘‘চতুন্নৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সত্তপাটলিযো থেৰো ইমা গাথাযো অভাসিত্থাতি.

সত্তপাটলিযত্থেৰস্সাপদানং পঞ্চমং.

৬. উপাহনদাযকত্থেৰঅপদানং

২০. ‘‘অহোসিং চন্দনো নাম, সম্বুদ্ধস্সত্ৰজো তদা;

একোপাহনো মযা দিন্নো, বোধিং সম্পজ্জ মে তুৱং.

২১. ‘‘একনৱুতিতো কপ্পে, যং পানধিং [যমুপাহনং (সী.), যং পাদুং (স্যা.)] দদিং তদা;

দুগ্গতিং নাভিজানামি, উপাহনস্সিদং ফলং.

২২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উপাহনদাযকো থেৰো ইমা গাথাযো অভাসিত্থাতি.

উপাহনদাযকত্থেৰস্সাপদানং ছট্ঠং.

৭. মঞ্জৰিপূজকত্থেৰঅপদানং

২৩. ‘‘মঞ্জৰিকং কৰিত্ৱান, ৰথিযং পটিপজ্জহং;

অদ্দসং সমণানগ্গং, ভিক্খুসঙ্ঘপুৰক্খতং.

২৪. ‘‘পসন্নচিত্তো সুমনো, পৰমায চ পীতিযা;

উভো হত্থেহি পগ্গয্হ, বুদ্ধস্স অভিৰোপযিং.

২৫. ‘‘দ্ৱেনৱুতে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, পুপ্ফপূজাযিদং ফলং.

২৬. ‘‘ইতো তেসত্ততিকপ্পে, একো আসিং মহীপতি;

জোতিযো নাম নামেন, চক্কৱত্তী মহব্বলো.

২৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মঞ্জৰিপূজকো থেৰো ইমা গাথাযো অভাসিত্থাতি.

মঞ্জৰিপূজকত্থেৰস্সাপদানং সত্তমং.

৮. পণ্ণদাযকত্থেৰঅপদানং

২৮. ‘‘পব্বতে হিমৱন্তম্হি, ৱাকচীৰধৰো অহং;

অলোণপণ্ণভক্খোম্হি, নিযমেসু চ সংৱুতো.

২৯. ‘‘পাতৰাসে অনুপ্পত্তে, সিদ্ধত্থো উপগচ্ছি মং;

তাহং বুদ্ধস্স পাদাসিং, পসন্নো সেহি পাণিভি.

৩০. ‘‘চতুন্নৱুতিতো কপ্পে, যং পণ্ণমদদিং তদা;

দুগ্গতিং নাভিজানামি, পণ্ণদানস্সিদং ফলং.

৩১. ‘‘সত্তৱীসতিকপ্পম্হি, ৰাজা আসিং সদত্থিযো [যদত্থিযো (সী. স্যা.)];

সত্তৰতনসম্পন্নো, চক্কৱত্তী মহব্বলো.

৩২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পণ্ণদাযকো থেৰো ইমা গাথাযো অভাসিত্থাতি.

পণ্ণদাযকত্থেৰস্সাপদানং অট্ঠমং.

৯. কুটিদাযকত্থেৰঅপদানং

৩৩. ‘‘ৱিপিনচাৰী সম্বুদ্ধো, ৰুক্খমূলে ৱসী তদা;

পণ্ণসালং কৰিত্ৱান, অদাসিং অপৰাজিতে.

৩৪. ‘‘একনৱুতিতো কপ্পে, যং পণ্ণকুটিকং অদং;

দুগ্গতিং নাভিজানামি, কুটিদানস্সিদং ফলং.

৩৫. ‘‘অট্ঠৱীসে [অট্ঠতিংসে (স্যা.)] ইতো কপ্পে, সোড়সাসিংসু ৰাজানো;

সব্বত্থ অভিৱস্সীতি, ৱুচ্চৰে চক্কৱত্তিনো.

৩৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কুটিদাযকো থেৰো ইমা গাথাযো অভাসিত্থাতি.

কুটিদাযকত্থেৰস্সাপদানং নৱমং.

১০. অগ্গপুপ্ফিযত্থেৰঅপদানং

৩৭. ‘‘সুৱণ্ণৱণ্ণং সম্বুদ্ধং, নিসিন্নং পব্বতন্তৰে;

ওভাসযন্তং ৰংসেন [ৰংসিযা (স্যা.)], সিখিনং সিখিনং যথা.

৩৮. ‘‘অগ্গজং পুপ্ফমাদায, উপাগচ্ছিং নৰুত্তমং;

পসন্নচিত্তো সুমনো, বুদ্ধস্স অভিৰোপযিং.

৩৯. ‘‘একত্তিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৪০. ‘‘পঞ্চৱীসতিকপ্পম্হি, অহোসি অমিতোগতো [অমিতৱ্হযো (সী.)];

সত্তৰতনসম্পন্নো, চক্কৱত্তী মহব্বলো.

৪১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অগ্গপুপ্ফিযো থেৰো ইমা গাথাযো অভাসিত্থাতি.

অগ্গপুপ্ফিযত্থেৰস্সাপদানং দসমং.

থোমকৱগ্গো ছব্বীসতিমো.