২৭. পদুমুক্খিপৱগ্গো

১. আকাসুক্খিপিযত্থেৰঅপদানং

১. ‘‘সুৱণ্ণৱণ্ণং সিদ্ধত্থং, গচ্ছন্তং অন্তৰাপণে;

জলজগ্গে দুৱে গয্হ, উপাগচ্ছিং নৰাসভং.

২. ‘‘একঞ্চ পুপ্ফং পাদেসু, বুদ্ধসেট্ঠস্স নিক্খিপিং;

একঞ্চ পুপ্ফং পগ্গয্হ, আকাসে উক্খিপিং অহং.

৩. ‘‘চতুন্নৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, পুপ্ফদানস্সিদং ফলং.

৪. ‘‘ইতো ছত্তিংসকপ্পম্হি, একো আসিং মহীপতি;

অন্তলিক্খকৰো নাম, চক্কৱত্তী মহব্বলো.

৫. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা আকাসুক্খিপিযো থেৰো ইমা গাথাযো অভাসিত্থাতি.

আকাসুক্খিপিযত্থেৰস্সাপদানং পঠমং.

২. তেলমক্খিযত্থেৰঅপদানং

৬. ‘‘সিদ্ধত্থম্হি ভগৱতি, নিব্বুতম্হি নৰাসভে;

বোধিযা ৱেদিকাযাহং, তেলং মক্খেসি তাৱদে.

৭. ‘‘চতুন্নৱুতিতো কপ্পে, যং তেলং মক্খযিং তদা;

দুগ্গতিং নাভিজানামি, মক্খনায ইদং ফলং.

৮. ‘‘চতুৱীসে ইতো কপ্পে, সুচ্ছৱি নাম খত্তিযো;

সত্তৰতনসম্পন্নো, চক্কৱত্তী মহব্বলো.

৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তেলমক্খিযো থেৰো ইমা গাথাযো অভাসিত্থাতি.

তেলমক্খিযত্থেৰস্সাপদানং দুতিযং.

৩. অড্ঢচন্দিযত্থেৰঅপদানং

১০. ‘‘তিস্সস্স খো ভগৱতো, বোধিযা পাদপুত্তমে;

অড্ঢচন্দং মযা দিন্নং, ধৰণীৰুহপাদপে.

১১. ‘‘দ্ৱেনৱুতে ইতো কপ্পে, যং চন্দ [যং পুপ্ফ (ক.)] মভিৰোপযিং;

দুগ্গতিং নাভিজানামি, বোধিপূজাযিদং ফলং.

১২. ‘‘পঞ্চৱীসে ইতো কপ্পে, দেৱলো নাম খত্তিযো;

সত্তৰতনসম্পন্নো, চক্কৱত্তী মহব্বলো.

১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অড্ঢচন্দিযো থেৰো ইমা গাথাযো অভাসিত্থাতি.

অড্ঢচন্দিযত্থেৰস্সাপদানং ততিযং.

৪. পদীপদাযকত্থেৰঅপদানং

১৪. ‘‘দেৱভূতো অহং সন্তো, ওৰুয্হ পথৱিং তদা;

পদীপে পঞ্চ পাদাসিং, পসন্নো সেহি পাণিভি.

১৫. ‘‘চতুন্নৱুতিতো কপ্পে, যং পদীপমদং তদা;

দুগ্গতিং নাভিজানামি, দীপদানস্সিদং ফলং.

১৬. ‘‘পঞ্চপঞ্ঞাসকে কপ্পে, একো আসিং মহীপতি;

সমন্তচক্খুনামেন, চক্কৱত্তী মহব্বলো.

১৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পদীপদাযকো [অপণ্ণদীপিযো (সী. ক.)] থেৰো ইমা গাথাযো অভাসিত্থাতি.

পদীপদাযকত্থেৰস্সাপদানং চতুত্থং.

৫. বিড়ালিদাযকত্থেৰঅপদানং

১৮. ‘‘হিমৱন্তস্সাৱিদূৰে, ৰোমসো নাম পব্বতো;

তম্হি পব্বতপাদম্হি, সমণো ভাৱিতিন্দ্ৰিযো.

১৯. ‘‘বিড়ালিযো গহেত্ৱান, সমণস্স অদাসহং;

অনুমোদি মহাৱীৰো, সযম্ভূ অপৰাজিতো.

২০. ‘‘বিড়ালী তে মম দিন্না, ৱিপ্পসন্নেন চেতসা;

ভৱে নিব্বত্তমানম্হি, ফলং নিব্বত্ততং তৱ.

২১. ‘‘চতুন্নৱুতিতো কপ্পে, যং বিড়ালিমদাসহং;

দুগ্গতিং নাভিজানামি, বিড়ালিযা ইদং ফলং.

২২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বিড়ালিদাযকো থেৰো ইমা গাথাযো অভাসিত্থাতি.

বিড়ালিদাযকত্থেৰস্সাপদানং পঞ্চমং.

৬. মচ্ছদাযকত্থেৰঅপদানং

২৩. ‘‘চন্দভাগানদীতীৰে, উক্কুসো আসহং তদা;

মহন্তং মচ্ছং পগ্গয্হ, সিদ্ধত্থমুনিনো অদং.

২৪. ‘‘চতুন্নৱুতিতো কপ্পে, যং মচ্ছমদদিং তদা;

দুগ্গতিং নাভিজানামি, মচ্ছদানস্সিদং ফলং.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মচ্ছদাযকো থেৰো ইমা গাথাযো অভাসিত্থাতি.

মচ্ছদাযকত্থেৰস্সাপদানং ছট্ঠং.

৭. জৱহংসকত্থেৰঅপদানং

২৬. ‘‘চন্দভাগানদীতীৰে, আসিং ৱনচৰো তদা;

সিদ্ধত্থং অদ্দসং বুদ্ধং, গচ্ছন্তং অনিলঞ্জসে.

২৭. ‘‘অঞ্জলিং পগ্গহেত্ৱান, উল্লোকেন্তো মহামুনিং;

সকং চিত্তং পসাদেত্ৱা, অৱন্দিং নাযকং অহং.

২৮. ‘‘চতুন্নৱুতিতো কপ্পে, যমৱন্দিং নৰাসভং;

দুগ্গতিং নাভিজানামি, ৱন্দনায ইদং ফলং.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা জৱহংসকো থেৰো ইমা গাথাযো অভাসিত্থাতি.

জৱহংসকত্থেৰস্সাপদানং সত্তমং.

৮. সড়লপুপ্ফিযত্থেৰঅপদানং

৩০. ‘‘চন্দভাগানদীতীৰে, অহোসিং কিন্নৰো তদা;

ৱিপস্সিং অদ্দসং বুদ্ধং, ৰংসিজালসমাকুলং.

৩১. ‘‘পসন্নচিত্তো সুমনো, পৰমায চ পীতিযা;

পগ্গয্হ সড়লং পুপ্ফং, ৱিপস্সিং ওকিৰিং অহং.

৩২. ‘‘একনৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৩৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সড়লপুপ্ফিযো থেৰো ইমা গাথাযো অভাসিত্থাতি.

সড়লপুপ্ফিযত্থেৰস্সাপদানং অট্ঠমং.

৯. উপাগতাসযত্থেৰঅপদানং

৩৪. ‘‘হিমৱন্তস্স ৱেমজ্ঝে, সৰো আসি সুনিম্মিতো;

তত্থাহং ৰক্খসো আসিং, হেঠসীলো ভযানকো.

৩৫. ‘‘অনুকম্পকো কাৰুণিকো, ৱিপস্সী লোকনাযকো;

মমুদ্ধৰিতুকামো সো, আগচ্ছি মম সন্তিকং.

৩৬. ‘‘উপাগতং মহাৱীৰং, দেৱদেৱং নৰাসভং;

আসযা অভিনিক্খম্ম, অৱন্দিং সত্থুনো অহং.

৩৭. ‘‘একনৱুতিতো কপ্পে, যং ৱন্দিং পুৰিসুত্তমং;

দুগ্গতিং নাভিজানামি, ৱন্দনায ইদং ফলং.

৩৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উপাগতাসযো [উপাগতহাসনিযো (স্যা.), উপাগতাহাসনিযো (ক.)] থেৰো ইমা গাথাযো অভাসিত্থাতি.

উপাগতাসযত্থেৰস্সাপদানং নৱমং.

১০. তৰণিযত্থেৰঅপদানং

৩৯. ‘‘সুৱণ্ণৱণ্ণো সম্বুদ্ধো, ৱিপস্সী দক্খিণাৰহো;

নদীতীৰে ঠিতো সত্থা, ভিক্খুসঙ্ঘপুৰক্খতো.

৪০. ‘‘নাৱা ন ৱিজ্জতে তত্থ, সন্তাৰণী মহণ্ণৱে;

নদিযা অভিনিক্খম্ম, তাৰেসিং লোকনাযকং.

৪১. ‘‘একনৱুতিতো কপ্পে, যং তাৰেসিং নৰুত্তমং;

দুগ্গতিং নাভিজানামি, তৰণায ইদং ফলং.

৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তৰণিযো থেৰো ইমা গাথাযো অভাসিত্থাতি.

তৰণিযত্থেৰস্সাপদানং দসমং.

পদুমুক্খিপৱগ্গো সত্তৱীসতিমো.