২৫. তুৱৰদাযকৱগ্গো

১. তুৱৰদাযকত্থেৰঅপদানং

১. ‘‘মিগলুদ্দো পুৰে আসিং, অৰঞ্ঞে কাননে অহং;

ভৰিত্ৱা তুৱৰমাদায [ভৰিত্ৱা তুৰৱমাদায (ক.), ভজ্জিতং তুৱৰমাদায (?) এত্থ তুৱৰন্তি মুগ্গকলাযসদিসং তুৱৰট্ঠিন্তি তদট্ঠকথা; তুৱৰো ধঞ্ঞভেদেতি সক্কতাভিধানে], সঙ্ঘস্স অদদিং অহং.

২. ‘‘একনৱুতিতো কপ্পে, যং দানমদদিং তদা;

দুগ্গতিং নাভিজানামি, তুৱৰস্স ইদং ফলং.

৩. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা তুৱৰদাযকো থেৰো ইমা গাথাযো অভাসিত্থাতি.

তুৱৰদাযকত্থেৰস্সাপদানং পঠমং.

২. নাগকেসৰিযত্থেৰঅপদানং

৪. ‘‘ধনুং অদ্ৱেজ্ঝং কত্ৱান, ৱনমজ্ঝোগহিং অহং;

কেসৰং ওগতং [ওসৰং (স্যা.), ওসটং (সী.)] দিস্ৱা, পতপত্তং সমুট্ঠিতং.

৫. ‘‘উভো হত্থেহি পগ্গয্হ, সিৰে কত্ৱান অঞ্জলিং;

বুদ্ধস্স অভিৰোপেসিং, তিস্সস্স লোকবন্ধুনো.

৬. ‘‘দ্ৱেনৱুতে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৭. ‘‘তেসত্ততিম্হি কপ্পম্হি [সত্তসত্ততিমে কপ্পে (স্যা.)], সত্ত কেসৰনামকা;

সত্তৰতনসম্পন্না, চক্কৱত্তী মহব্বলা.

৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নাগকেসৰিযো থেৰো ইমা গাথাযো অভাসিত্থাতি.

নাগকেসৰিযত্থেৰস্সাপদানং দুতিযং.

৩. নড়িনকেসৰিযত্থেৰঅপদানং

৯. ‘‘জাতস্সৰস্স ৱেমজ্ঝে, ৱসামি জলকুক্কুটো;

অদ্দসাহং [অথদ্দসং (সী. স্যা.)] দেৱদেৱং, গচ্ছন্তং অনিলঞ্জসে.

১০. ‘‘তুণ্ডেন কেসৰিং [কেসৰং (স্যা.)] গয্হ, ৱিপ্পসন্নেন চেতসা;

বুদ্ধস্স অভিৰোপেসিং, তিস্সস্স লোকবন্ধুনো.

১১. ‘‘দ্ৱেনৱুতে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১২. ‘‘তেসত্ততিম্হি কপ্পম্হি, সত্ত কেসৰনামকা [সতপত্তসনামকো (সী. স্যা.)];

সত্তৰতনসম্পন্না, চক্কৱত্তী মহব্বলা.

১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নড়িনকেসৰিযো থেৰো ইমা গাথাযো অভাসিত্থাতি.

নড়িনকেসৰিযত্থেৰস্সাপদানং ততিযং.

৪. ৱিৰৱপুপ্ফিযত্থেৰঅপদানং

১৪. ‘‘খীণাসৱসহস্সেহি, নিয্যাতি লোকনাযকো;

ৱিৰৱপুপ্ফমাদায [ৱিৰৱিপুপ্ফং পগ্গয্হ (সী.)], বুদ্ধস্স অভিৰোপযিং.

১৫. ‘‘একনৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৱিৰৱপুপ্ফিযো থেৰো ইমা গাথাযো অভাসিত্থাতি.

ৱিৰৱপুপ্ফিযত্থেৰস্সাপদানং চতুত্থং.

৫. কুটিধূপকত্থেৰঅপদানং

১৭. ‘‘সিদ্ধত্থস্স ভগৱতো, অহোসিং কুটিগোপকো;

কালেন কালং ধূপেসিং, পসন্নো সেহি পাণিভি.

১৮. ‘‘চতুন্নৱুতিতো কপ্পে, যং কম্মমকৰিং তদা;

দুগ্গতিং নাভিজানামি, ধূপদানস্সিদং [বুদ্ধপূজাযিদং (সী.)] ফলং.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কুটিধূপকো থেৰো ইমা গাথাযো অভাসিত্থাতি.

কুটিধূপকত্থেৰস্সাপদানং পঞ্চমং.

৬. পত্তদাযকত্থেৰঅপদানং

২০. ‘‘পৰমেন দমথেন, সিদ্ধত্থস্স মহেসিনো;

পত্তদানং মযা দিন্নং, উজুভূতস্স তাদিনো.

২১. ‘‘চতুন্নৱুতিতো কপ্পে, যং দানমদদিং তদা;

দুগ্গতিং নাভিজানামি, পত্তদানস্সিদং ফলং.

২২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পত্তদাযকো থেৰো ইমা গাথাযো অভাসিত্থাতি.

পত্তদাযকত্থেৰস্সাপদানং ছট্ঠং.

৭. ধাতুপূজকত্থেৰঅপদানং

২৩. ‘‘নিব্বুতে লোকনাথম্হি, সিদ্ধত্থম্হি নৰুত্তমে;

একা ধাতু মযা লদ্ধা, দ্ৱিপদিন্দস্স তাদিনো.

২৪. ‘‘তাহং ধাতুং গহেত্ৱান, বুদ্ধস্সাদিচ্চবন্ধুনো;

পঞ্চৱস্সে পৰিচৰিং, তিট্ঠন্তংৱ নৰুত্তমং.

২৫. ‘‘চতুন্নৱুতিতো কপ্পে, যং ধাতুং পূজযিং তদা;

দুগ্গতিং নাভিজানামি, ধাতুপট্ঠহনে ফলং.

২৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ধাতুপূজকো থেৰো ইমা গাথাযো অভাসিত্থাতি.

ধাতুপূজকত্থেৰস্সাপদানং সত্তমং.

৮. সত্তলিপুপ্ফপূজকত্থেৰঅপদানং

২৭. ‘‘সত্ত সত্তলিপুপ্ফানি, সীসে কত্ৱানহং তদা;

বুদ্ধস্স অভিৰোপেসিং, ৱেস্সভুম্হি নৰুত্তমে [ৱিভত্তিৱিপল্লাসো চিন্তেতব্বো].

২৮. ‘‘একত্তিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সত্তলিপুপ্ফপূজকো থেৰো ইমা গাথাযো অভাসিত্থাতি.

সত্তলিপুপ্ফপূজকত্থেৰস্সাপদানং অট্ঠমং.

৯. বিম্বিজালিযত্থেৰঅপদানং

৩০. ‘‘পদুমুত্তৰো নাম জিনো, সযম্ভূ অগ্গপুগ্গলো;

চতুসচ্চং পকাসেতি, দীপেতি অমতং পদং.

৩১. ‘‘বিম্বিজালকপুপ্ফানি [বিম্বজালকপুপ্ফানি (ক.)], পুথু কত্ৱানহং তদা;

বুদ্ধস্স অভিৰোপেসিং, দ্ৱিপদিন্দস্স তাদিনো.

৩২. ‘‘অট্ঠসট্ঠিম্হিতো কপ্পে, চতুৰো কিঞ্জকেসৰা;

সত্তৰতনসম্পন্না, চক্কৱত্তী মহব্বলা.

৩৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বিম্বিজালিযো থেৰো ইমা গাথাযো অভাসিত্থাতি.

বিম্বিজালিযত্থেৰস্সাপদানং নৱমং.

১০. উদ্দালকদাযকত্থেৰঅপদানং

৩৪. ‘‘ককুধো নাম নামেন, সযম্ভূ অপৰাজিতো;

পৱনা নিক্খমিত্ৱান, অনুপ্পত্তো মহানদিং.

৩৫. ‘‘উদ্দালকং গহেত্ৱান, সযম্ভুস্স অদাসহং;

সংযতস্সুজুভূতস্স, পসন্নমানসো অহং.

৩৬. ‘‘একত্তিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, পুপ্ফদানস্সিদং ফলং.

৩৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উদ্দালকদাযকো থেৰো ইমা গাথাযো অভাসিত্থাতি.

উদ্দালকদাযকত্থেৰস্সাপদানং দসমং.

তুৱৰদাযকৱগ্গো পঞ্চৱীসতিমো.