২৪. উদকাসনৱগ্গো

১. উদকাসনদাযকত্থেৰঅপদানং

১. ‘‘আৰামদ্ৱাৰা নিক্খম্ম, ফলকং সন্থৰিং অহং;

উদকঞ্চ উপট্ঠাসিং, উত্তমত্থস্স পত্তিযা.

২. ‘‘একত্তিংসে ইতো কপ্পে, যং কম্মমকৰিং তদা;

দুগ্গতিং নাভিজানামি, আসনে চোদকে ফলং.

৩. ‘‘ইতো পন্নৰসে কপ্পে, অভিসামসমৱ্হযো;

সত্তৰতনসম্পন্নো, চক্কৱত্তী মহব্বলো.

৪. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা উদকাসনদাযকো থেৰো ইমা গাথাযো অভাসিত্থাতি.

উদকাসনদাযকত্থেৰস্সাপদানং পঠমং.

২. ভাজনপালকত্থেৰঅপদানং

৫. ‘‘নগৰে বন্ধুমতিযা, কুম্ভকাৰো অহং তদা;

ভাজনং অনুপালেসিং, ভিক্খুসঙ্ঘস্স তাৱদে.

৬. ‘‘একনৱুতিতো কপ্পে, ভাজনং অনুপালযিং;

দুগ্গতিং নাভিজানামি, ভাজনস্স ইদং ফলং.

৭. ‘‘তেপঞ্ঞাসে ইতো কপ্পে, অনন্তজালিনামকো;

সত্তৰতনসম্পন্নো, চক্কৱত্তী মহব্বলো.

৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ভাজনপালকো [ভাজনদাযকো (সী. স্যা.)] থেৰো ইমা গাথাযো অভাসিত্থাতি.

ভাজনপালকত্থেৰস্সাপদানং দুতিযং.

৩. সালপুপ্ফিযত্থেৰঅপদানং

৯. ‘‘অৰুণৱতিযা নগৰে, অহোসিং পূপিকো তদা;

মম দ্ৱাৰেন গচ্ছন্তং, সিখিনং অদ্দসং জিনং.

১০. ‘‘বুদ্ধস্স পত্তং পগ্গয্হ, সালপুপ্ফং অদাসহং;

সম্মগ্গতস্স বুদ্ধস্স, ৱিপ্পসন্নেন চেতসা.

১১. ‘‘একত্তিংসে ইতো কপ্পে, যং পুপ্ফমভিদাসহং [যং খজ্জকমদাসহং (সী.), যং খজ্জমভিদাসহং (ক.) সালপুপ্ফনামকং খজ্জকং ৱা ভৱেয্য];

দুগ্গতিং নাভিজানামি, সালপুপ্ফস্সিদং ফলং.

১২. ‘‘ইতো চুদ্দসকপ্পম্হি, অহোসিং অমিতঞ্জলো;

সত্তৰতনসম্পন্নো, চক্কৱত্তী মহব্বলো.

১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সালপুপ্ফিযো থেৰো ইমা গাথাযো অভাসিত্থাতি.

সালপুপ্ফিযত্থেৰস্সাপদানং ততিযং.

৪. কিলঞ্জদাযকত্থেৰঅপদানং

১৪. ‘‘তিৱৰাযং পুৰে ৰম্মে, নড়কাৰো অহং তদা;

সিদ্ধত্থে লোকপজ্জোতে, পসন্না জনতা তহিং.

১৫. ‘‘পূজত্থং লোকনাথস্স, কিলঞ্জং পৰিযেসতি;

বুদ্ধপূজং কৰোন্তানং, কিলঞ্জং অদদিং অহং.

১৬. ‘‘চতুন্নৱুতিতো কপ্পে, যং কম্মমকৰিং তদা;

দুগ্গতিং নাভিজানামি, কিলঞ্জস্স ইদং ফলং.

১৭. ‘‘সত্তসত্ততিকপ্পম্হি, ৰাজা আসিং জলদ্ধৰো [জুতিন্ধৰো (সী.)];

সত্তৰতনসম্পন্নো, চক্কৱত্তী মহব্বলো.

১৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কিলঞ্জদাযকো থেৰো ইমা গাথাযো অভাসিত্থাতি.

কিলঞ্জদাযকত্থেৰস্সাপদানং চতুত্থং.

৫. ৱেদিকাৰকত্থেৰঅপদানং

১৯. ‘‘ৱিপস্সিনো ভগৱতো, বোধিযা পাদপুত্তমে;

পসন্নচিত্তো সুমনো, কাৰেসিং ৱেদিকং অহং.

২০. ‘‘একনৱুতিতো কপ্পে, কাৰেসিং ৱেদিকং অহং;

দুগ্গতিং নাভিজানামি, ৱেদিকায ইদং ফলং.

২১. ‘‘ইতো একাদসে কপ্পে, অহোসিং সূৰিযস্সমো;

সত্তৰত্তনসম্পন্নো, চক্কৱত্তী মহব্বলো.

২২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৱেদিকাৰকো থেৰো ইমা গাথাযো অভাসিত্থাতি.

ৱেদিকাৰকত্থেৰস্সাপদানং পঞ্চমং.

৬. ৱণ্ণকাৰত্থেৰঅপদানং

২৩. ‘‘নগৰে অৰুণৱতিযা, ৱণ্ণকাৰো অহং তদা;

চেতিযে দুস্সভণ্ডানি, নানাৱণ্ণং ৰজেসহং [ৰজিং অহং (ক.), ৰজেমহং (স্যা.)].

২৪. ‘‘একত্তিংসে ইতো কপ্পে, যং ৱণ্ণং ৰজযিং তদা;

দুগ্গতিং নাভিজানামি, ৱণ্ণদানস্সিদং ফলং.

২৫. ‘‘ইতো তেৱীসতিকপ্পে, ৱণ্ণসম [চন্দুপম (সী.), চন্দসম (স্যা.)] সনামকো;

সত্তৰতনসম্পন্নো, চক্কৱত্তী মহব্বলো.

২৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৱণ্ণকাৰো থেৰো ইমা গাথাযো অভাসিত্থাতি.

ৱণ্ণকাৰত্থেৰস্সাপদানং ছট্ঠং.

৭. পিযালপুপ্ফিযত্থেৰঅপদানং

২৭. ‘‘মিগলুদ্দো পুৰে আসিং, অৰঞ্ঞে কাননে অহং;

পিযালং পুপ্ফিতং দিস্ৱা, গতমগ্গে খিপিং অহং.

২৮. ‘‘একনৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পিযালপুপ্ফিযো থেৰো ইমা গাথাযো অভাসিত্থাতি.

পিযালপুপ্ফিযত্থেৰস্সাপদানং সত্তমং.

৮. অম্বযাগদাযকত্থেৰঅপদানং

৩০. ‘‘সকে সিপ্পে অপত্থদ্ধো, অগমং কাননং অহং;

সম্বুদ্ধং যন্তং দিস্ৱান, অম্বযাগং অদাসহং.

৩১. ‘‘একনৱুতিতো কপ্পে, যং দানমদদিং তদা;

দুগ্গতিং নাভিজানামি, অম্বযাগস্সিদং ফলং.

৩২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অম্বযাগদাযকো থেৰো ইমা গাথাযো অভাসিত্থাতি.

অম্বযাগদাযকত্থেৰস্সাপদানং অট্ঠমং.

৯. জগতিকাৰকত্থেৰঅপদানং

৩৩. ‘‘নিব্বুতে লোকনাথম্হি, অত্থদস্সি নৰুত্তমে;

জগতী কাৰিতা ময্হং, বুদ্ধস্স থূপমুত্তমে.

৩৪. ‘‘অট্ঠাৰসে কপ্পসতে, যং কম্মমকৰিং তদা;

দুগ্গতিং নাভিজানামি, জগতিযা ইদং ফলং.

৩৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা জগতিকাৰকো থেৰো ইমা গাথাযো অভাসিত্থাতি.

জগতিকাৰকত্থেৰস্সাপদানং নৱমং.

১০. ৱাসিদাযকত্থেৰঅপদানং

৩৬. ‘‘কম্মাৰোহং পুৰে আসিং, তিৱৰাযং পুৰুত্তমে;

একা ৱাসি মযা দিন্না, সযম্ভুং অপৰাজিতং [সযম্ভুম্হিপৰাজিতে (?)].

৩৭. ‘‘চতুন্নৱুতিতো কপ্পে, যং ৱাসিমদদিং তদা;

দুগ্গতিং নাভিজানামি, ৱাসিদানস্সিদং ফলং.

৩৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৱাসিদাযকো থেৰো ইমা গাথাযো অভাসিত্থাতি.

ৱাসিদাযকত্থেৰস্সাপদানং দসমং.

উদকাসনৱগ্গো চতুৱীসতিমো.