৭. তিন্দুকদাযকত্থেৰঅপদানং

৩৫. ‘‘গিৰিদুগ্গচৰো আসিং, মক্কটো থামৱেগিকো;

ফলিনং তিন্দুকং দিস্ৱা, বুদ্ধসেট্ঠং অনুস্সৰিং.

৩৬. ‘‘নিক্খমিত্ৱা কতিপাহং, ৱিচিনিং লোকনাযকং;

পসন্নচিত্তো সুমনো, সিদ্ধত্থং তিভৱন্তগুং.

৩৭. ‘‘মম সঙ্কপ্পমঞ্ঞায, সত্থা লোকে অনুত্তৰো;

খীণাসৱসহস্সেহি, আগচ্ছি মম সন্তিকং.

৩৮. ‘‘পামোজ্জং জনযিত্ৱান, ফলহত্থো উপাগমিং;

পটিগ্গহেসি ভগৱা, সব্বঞ্ঞূ ৱদতং ৱৰো.

৩৯. ‘‘চতুন্নৱুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

৪০. ‘‘সত্তপঞ্ঞাসকপ্পম্হি, উপনন্দসনামকো;

সত্তৰতনসম্পন্নো, চক্কৱত্তী মহব্বলো.

৪১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিন্দুকদাযকো থেৰো ইমা গাথাযো অভাসিত্থাতি.

তিন্দুকদাযকত্থেৰস্সাপদানং সত্তমং.