৪. অসোকপূজকত্থেৰঅপদানং

১৭. ‘‘তিৱৰাযং [তিপুৰাযং (স্যা.)] পুৰে ৰম্মে, ৰাজুয্যানং অহু তদা;

উয্যানপালো তত্থাসিং, ৰঞ্ঞো বদ্ধচৰো অহং.

১৮. ‘‘পদুমো নাম নামেন, সযম্ভূ সপ্পভো অহু;

নিসিন্নং [নিসিন্নো (ক.)] পুণ্ডৰীকম্হি, ছাযা ন জহি তং মুনিং.

১৯. ‘‘অসোকং পুপ্ফিতং দিস্ৱা, পিণ্ডিভাৰং সুদস্সনং;

বুদ্ধস্স অভিৰোপেসিং, জলজুত্তমনামিনো.

২০. ‘‘চতুন্নৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

২১. ‘‘সত্ততিংসম্হিতো কপ্পে, সোড়স অৰণঞ্জহা [অৰুণঞ্জহা (সী.)];

সত্তৰতনসম্পন্না, চক্কৱত্তী মহব্বলা.

২২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অসোকপূজকো থেৰো ইমা গাথাযো অভাসিত্থাতি.

অসোকপূজকত্থেৰস্সাপদানং চতুত্থং.