৯. সোপাকত্থেৰঅপদানং

১১২. ‘‘পব্ভাৰং সোধযন্তস্স [সেৱযন্তস্স (সী. ক.)], ৱিপিনে পব্বতুত্তমে;

সিদ্ধত্থো নাম ভগৱা, আগচ্ছি মম সন্তিকং.

১১৩. ‘‘বুদ্ধং উপগতং দিস্ৱা, লোকজেট্ঠস্স তাদিনো;

সন্থৰং সন্থৰিত্ৱান [পঞ্ঞপেত্ৱান (স্যা. অট্ঠ)], পুপ্ফাসনমদাসহং.

১১৪. ‘‘পুপ্ফাসনে নিসীদিত্ৱা, সিদ্ধত্থো লোকনাযকো;

মমঞ্চ গতিমঞ্ঞায, অনিচ্চতমুদাহৰি.

১১৫. ‘‘‘অনিচ্চা ৱত সঙ্খাৰা, উপ্পাদৱযধম্মিনো;

উপ্পজ্জিত্ৱা নিৰুজ্ঝন্তি, তেসং ৱূপসমো সুখো’.

১১৬. ‘‘ইদং ৱত্ৱান সব্বঞ্ঞূ, লোকজেট্ঠো নৰাসভো;

নভং অব্ভুগ্গমি ৱীৰো, হংসৰাজাৱ অম্বৰে.

১১৭. ‘‘সকং দিট্ঠিং জহিত্ৱান, ভাৱযানিচ্চসঞ্ঞহং;

একাহং ভাৱযিত্ৱান, তত্থ কালং কতো অহং.

১১৮. ‘‘দ্ৱে সম্পত্তী অনুভোত্ৱা, সুক্কমূলেন চোদিতো;

পচ্ছিমে ভৱে সম্পত্তে, সপাকযোনুপাগমিং.

১১৯. ‘‘অগাৰা অভিনিক্খম্ম, পব্বজিং অনগাৰিযং;

জাতিযা সত্তৱস্সোহং, অৰহত্তমপাপুণিং.

১২০. ‘‘আৰদ্ধৱীৰিযো পহিতত্তো, সীলেসু সুসমাহিতো;

তোসেত্ৱান মহানাগং, অলত্থং উপসম্পদং.

১২১. ‘‘চতুন্নৱুতিতো কপ্পে, যং কম্মমকৰিং তদা;

দুগ্গতিং নাভিজানামি, পুপ্ফদানস্সিদং ফলং.

১২২. ‘‘চতুন্নৱুতিতো কপ্পে, যং সঞ্ঞং ভাৱযিং তদা;

তং সঞ্ঞং ভাৱযন্তস্স, পত্তো মে আসৱক্খযো.

১২৩. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সোপাকো থেৰো ইমা গাথাযো অভাসিত্থাতি.

সোপাকত্থেৰস্সাপদানং নৱমং.