১০. সুমঙ্গলত্থেৰঅপদানং

১২৪. ‘‘আহুতিং যিট্ঠুকামোহং, পটিযাদেত্ৱান ভোজনং;

ব্ৰাহ্মণে পটিমানেন্তো, ৱিসালে মাড়কে ঠিতো.

১২৫. ‘‘অথদ্দসাসিং সম্বুদ্ধং, পিযদস্সিং মহাযসং;

সব্বলোকৱিনেতাৰং, সযম্ভুং অগ্গপুগ্গলং.

১২৬. ‘‘ভগৱন্তং জুতিমন্তং, সাৱকেহি পুৰক্খতং;

আদিচ্চমিৱ ৰোচন্তং, ৰথিযং পটিপন্নকং.

১২৭. ‘‘অঞ্জলিং পগ্গহেত্ৱান, সকং চিত্তং পসাদযিং;

মনসাৱ নিমন্তেসিং, ‘আগচ্ছতু মহামুনি’.

১২৮. ‘‘মম সঙ্কপ্পমঞ্ঞায, সত্থা লোকে অনুত্তৰো;

খীণাসৱসহস্সেহি, মম দ্ৱাৰং উপাগমি.

১২৯. ‘‘নমো তে পুৰিসাজঞ্ঞ, নমো তে পুৰিসুত্তম;

পাসাদং অভিৰূহিত্ৱা, সীহাসনে নিসীদতং [নিসীদ ত্ৱং (সী.)].

১৩০. ‘‘দন্তো দন্তপৰিৱাৰো, তিণ্ণো তাৰযতং ৱৰো;

পাসাদং অভিৰূহিত্ৱা, নিসীদি পৱৰাসনে.

১৩১. ‘‘যং মে অত্থি সকে গেহে, আমিসং পচ্চুপট্ঠিতং;

তাহং বুদ্ধস্স পাদাসিং, পসন্নো সেহি পাণিভি.

১৩২. ‘‘পসন্নচিত্তো সুমনো, ৱেদজাতো কতঞ্জলী;

বুদ্ধসেট্ঠং নমস্সামি, অহো বুদ্ধস্সুড়াৰতা.

১৩৩. ‘‘অট্ঠন্নং পযিৰূপাসতং, ভুঞ্জং খীণাসৱা বহূ;

তুয্হেৱেসো আনুভাৱো, সৰণং তং উপেমহং.

১৩৪. ‘‘পিযদস্সী চ ভগৱা, লোকজেট্ঠো নৰাসভো;

ভিক্খুসঙ্ঘে নিসীদিত্ৱা, ইমা গাথা অভাসথ.

১৩৫. ‘‘‘যো সো সঙ্ঘং অভোজেসি, উজুভূতং সমাহিতং;

তথাগতঞ্চ সম্বুদ্ধং, সুণাথ মম ভাসতো.

১৩৬. ‘‘‘সত্তৱীসতিক্খত্তুং সো, দেৱৰজ্জং কৰিস্সতি;

সককম্মাভিৰদ্ধো সো, দেৱলোকে ৰমিস্সতি.

১৩৭. ‘‘‘দস অট্ঠ চক্খত্তুং [দসঞ্চট্ঠক্খত্থুং (সী.), দস চট্ঠক্খত্তুং (স্যা.)] সো, চক্কৱত্তী ভৱিস্সতি;

পথব্যা ৰজ্জং পঞ্চসতং, ৱসুধং আৱসিস্সতি’.

১৩৮. ‘‘অৰঞ্ঞৱনমোগ্গয্হ, কাননং ব্যগ্ঘসেৱিতং;

পধানং পদহিত্ৱান, কিলেসা ঝাপিতা মযা.

১৩৯. ‘‘অট্ঠাৰসে কপ্পসতে, যং দানমদদিং তদা;

দুগ্গতিং নাভিজানামি, ভত্তদানস্সিদং ফলং.

১৪০. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সুমঙ্গলো থেৰো ইমা গাথাযো অভাসিত্থাতি.

সুমঙ্গলত্থেৰস্সাপদানং দসমং.

তস্সুদ্দানং –

সীহাসনী একথম্ভী, নন্দো চ চূড়পন্থকো;

পিলিন্দৰাহুলো চেৱ, ৱঙ্গন্তো ৰট্ঠপালকো.

সোপাকো মঙ্গলো চেৱ, দসেৱ দুতিযে ৱগ্গে;

সতঞ্চ অট্ঠতিংস চ, গাথা চেত্থ পকাসিতা.

সীহাসনিযৱগ্গো দুতিযো.