৫. পিলিন্দৱচ্ছত্থেৰঅপদানং

৫৫. ‘‘নিব্বুতে লোকনাথম্হি, সুমেধে অগ্গপুগ্গলে;

পসন্নচিত্তো সুমনো, থূপপূজং অকাসহং.

৫৬. ‘‘যে চ খীণাসৱা তত্থ, ছড়ভিঞ্ঞা মহিদ্ধিকা;

তেহং তত্থ সমানেত্ৱা, সঙ্ঘভত্তং অকাসহং.

৫৭. ‘‘সুমেধস্স ভগৱতো, উপট্ঠাকো তদা অহু;

সুমেধো নাম নামেন, অনুমোদিত্থ সো তদা.

৫৮. ‘‘তেন চিত্তপ্পসাদেন, ৱিমানং উপপজ্জহং;

ছড়াসীতিসহস্সানি, অচ্ছৰাযো ৰমিংসু মে.

৫৯. ‘‘মমেৱ অনুৱত্তন্তি, সব্বকামেহি তা সদা;

অঞ্ঞে দেৱে অভিভোমি, পুঞ্ঞকম্মস্সিদং ফলং.

৬০. ‘‘পঞ্চৱীসতিকপ্পম্হি, ৱৰুণো নাম খত্তিযো;

ৱিসুদ্ধভোজনো [সুসুদ্ধভোজনো (সী.)] আসিং, চক্কৱত্তী অহং তদা.

৬১. ‘‘ন তে বীজং পৱপন্তি, নপি নীযন্তি নঙ্গলা;

অকট্ঠপাকিমং সালিং, পৰিভুঞ্জন্তি মানুসা.

৬২. ‘‘তত্থ ৰজ্জং কৰিত্ৱান, দেৱত্তং পুন গচ্ছহং;

তদাপি এদিসা ময্হং, নিব্বত্তা ভোগসম্পদা.

৬৩. ‘‘ন মং মিত্তা অমিত্তা ৱা, হিংসন্তি সব্বপাণিনো;

সব্বেসম্পি পিযো হোমি, পুঞ্ঞকম্মস্সিদং ফলং.

৬৪. ‘‘তিংসকপ্পসহস্সম্হি, যং দানমদদিং তদা;

দুগ্গতিং নাভিজানামি, গন্ধালেপস্সিদং ফলং.

৬৫. ‘‘ইমস্মিং ভদ্দকে কপ্পে, একো আসিং জনাধিপো;

মহানুভাৱো ৰাজাহং [ৰাজীসি (স্যা. ক.)], চক্কৱত্তী মহব্বলো.

৬৬. ‘‘সোহং পঞ্চসু সীলেসু, ঠপেত্ৱা জনতং বহুং;

পাপেত্ৱা সুগতিংযেৱ, দেৱতানং পিযো অহুং.

৬৭. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা পিলিন্দৱচ্ছো [পিলিন্দিৱচ্ছো (সী.)] থেৰো ইমা গাথাযো অভাসিত্থাতি.

পিলিন্দৱচ্ছত্থেৰস্সাপদানং পঞ্চমং.