৬. ৰাহুলত্থেৰঅপদানং

৬৮. ‘‘পদুমুত্তৰস্স ভগৱতো, লোকজেট্ঠস্স তাদিনো;

সত্তভূমম্হি পাসাদে, আদাসং সন্থৰিং অহং.

৬৯. ‘‘খীণাসৱসহস্সেহি, পৰিকিণ্ণো মহামুনি;

উপাগমি গন্ধকুটিং, দ্ৱিপদিন্দো [দিপদিন্দো (সী. স্যা.)] নৰাসভো.

৭০. ‘‘ৱিৰোচেন্তো [ৱিৰোচযং (স্যা.)] গন্ধকুটিং, দেৱদেৱো নৰাসভো;

ভিক্খুসঙ্ঘে ঠিতো সত্থা, ইমা গাথা অভাসথ.

৭১. ‘‘‘যেনাযং জোতিতা সেয্যা, আদাসোৱ সুসন্থতো;

তমহং কিত্তযিস্সামি, সুণাথ মম ভাসতো.

৭২. ‘‘‘সোণ্ণমযা ৰূপিমযা, অথো ৱেড়ুৰিযামযা;

নিব্বত্তিস্সন্তি পাসাদা, যে কেচি মনসো পিযা.

৭৩. ‘‘‘চতুসট্ঠিক্খত্তুং দেৱিন্দো, দেৱৰজ্জং কৰিস্সতি;

সহস্সক্খত্তুং চক্কৱত্তী, ভৱিস্সতি অনন্তৰা.

৭৪. ‘‘‘একৱীসতিকপ্পম্হি, ৱিমলো নাম খত্তিযো;

চাতুৰন্তো ৱিজিতাৱী, চক্কৱত্তী ভৱিস্সতি.

৭৫. ‘‘‘নগৰং ৰেণুৱতী নাম, ইট্ঠকাহি সুমাপিতং;

আযামতো তীণি সতং, চতুৰস্সসমাযুতং.

৭৬. ‘‘‘সুদস্সনো নাম পাসাদো, ৱিস্সকম্মেন মাপিতো [ৱিসুকম্মেন§মাপিতো (ক.), ৱিস্সকম্মেন নিম্মিতো (সী.)];

কূটাগাৰৱৰূপেতো, সত্তৰতনভূসিতো.

৭৭. ‘‘‘দসসদ্দাৱিৱিত্তং তং [অৱিৱিত্তং (সী.)], ৱিজ্জাধৰসমাকুলং;

সুদস্সনংৱ নগৰং, দেৱতানং ভৱিস্সতি.

৭৮. ‘‘‘পভা নিগ্গচ্ছতে তস্স, উগ্গচ্ছন্তেৱ সূৰিযে;

ৱিৰোচেস্সতি তং নিচ্চং, সমন্তা অট্ঠযোজনং.

৭৯. ‘‘‘কপ্পসতসহস্সম্হি, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৮০. ‘‘‘তুসিতা সো চৱিত্ৱান, সুক্কমূলেন চোদিতো;

গোতমস্স ভগৱতো, অত্ৰজো সো ভৱিস্সতি.

৮১. ‘‘‘সচে ৱসেয্য [সচা’ৱসেয্য (?)] অগাৰং, চক্কৱত্তী ভৱেয্য সো;

অট্ঠানমেতং যং তাদী, অগাৰে ৰতিমজ্ঝগা.

৮২. ‘‘‘নিক্খমিত্ৱা অগাৰম্হা, পব্বজিস্সতি সুব্বতো;

ৰাহুলো নাম নামেন, অৰহা সো ভৱিস্সতি’.

৮৩. ‘‘কিকীৱ অণ্ডং ৰক্খেয্য, চামৰী ৱিয ৱালধিং;

নিপকো সীলসম্পন্নো, মমং ৰক্খি মহামুনি [এৱং ৰক্খিং মহামুনি (সী. ক.), মমং দক্খি মহামুনি (স্যা.)].

৮৪. ‘‘তস্সাহং ধম্মমঞ্ঞায, ৱিহাসিং সাসনে ৰতো;

সব্বাসৱে পৰিঞ্ঞায, ৱিহৰামি অনাসৱো.

৮৫. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা ৰাহুলো থেৰো ইমা গাথাযো অভাসিত্থাতি.

ৰাহুলত্থেৰস্সাপদানং ছট্ঠং.