৪. চূড়পন্থকত্থেৰঅপদানং

৩৫. ‘‘পদুমুত্তৰো নাম জিনো, আহুতীনং পটিগ্গহো;

গণম্হা ৱূপকট্ঠো সো, হিমৱন্তে ৱসী তদা.

৩৬. ‘‘অহম্পি হিমৱন্তম্হি, ৱসামি অস্সমে তদা;

অচিৰাগতং মহাৱীৰং, উপেসিং লোকনাযকং.

৩৭. ‘‘পুপ্ফচ্ছত্তং গহেত্ৱান, উপগচ্ছিং নৰাসভং;

সমাধিং সমাপজ্জন্তং, অন্তৰাযমকাসহং.

৩৮. ‘‘উভো হত্থেহি পগ্গয্হ, পুপ্ফচ্ছত্তং অদাসহং;

পটিগ্গহেসি ভগৱা, পদুমুত্তৰো মহামুনি.

৩৯. ‘‘সব্বে দেৱা অত্তমনা, হিমৱন্তং উপেন্তি তে;

সাধুকাৰং পৱত্তেসুং, অনুমোদিস্সতি চক্খুমা.

৪০. ‘‘ইদং ৱত্ৱান তে দেৱা, উপগচ্ছুং নৰুত্তমং;

আকাসে ধাৰযন্তস্স [ধাৰযন্তং মে (ক), ধাৰযতো মে (?)], পদুমচ্ছত্তমুত্তমং.

৪১. ‘‘সতপত্তছত্তং পগ্গয্হ, অদাসি তাপসো মম;

‘তমহং কিত্তযিস্সামি, সুণাথ মম ভাসতো.

৪২. ‘‘‘পঞ্চৱীসতিকপ্পানি, দেৱৰজ্জং কৰিস্সতি;

চতুত্তিংসতিক্খত্তুঞ্চ, চক্কৱত্তী ভৱিস্সতি.

৪৩. ‘‘‘যং যং যোনিং সংসৰতি, দেৱত্তং অথ মানুসং;

অব্ভোকাসে পতিট্ঠন্তং, পদুমং ধাৰযিস্সতি’.

৪৪. ‘‘কপ্পসতসহস্সম্হি, ওক্কাককুলসম্ভৱো;

গোতমো নাম গোত্তেন [নামেন (সী. ক.)], সত্থা লোকে ভৱিস্সতি.

৪৫. ‘‘‘পকাসিতে পাৱচনে, মনুস্সত্তং লভিস্সতি;

মনোমযম্হি কাযম্হি, উত্তমো সো ভৱিস্সতি.

৪৬. ‘‘‘দ্ৱে ভাতৰো ভৱিস্সন্তি, উভোপি পন্থকৱ্হযা;

অনুভোত্ৱা উত্তমত্থং, জোতযিস্সন্তি সাসনং’.

৪৭. ‘‘সোহং অট্ঠাৰসৱস্সো [সো অট্ঠাৰসৱস্সোহং (স্যা.)], পব্বজিং অনগাৰিযং;

ৱিসেসাহং ন ৱিন্দামি, সক্যপুত্তস্স সাসনে.

৪৮. ‘‘দন্ধা ময্হং গতী আসি, পৰিভূতো পুৰে অহুং [অহং (স্যা.)];

ভাতা চ মং পণামেসি, গচ্ছ দানি সকং ঘৰং.

৪৯. ‘‘সোহং পণামিতো সন্তো, সঙ্ঘাৰামস্স কোট্ঠকে;

দুম্মনো তত্থ অট্ঠাসিং, সামঞ্ঞস্মিং অপেক্খৱা.

৫০. ‘‘ভগৱা তত্থ [অথেত্থ সত্থা (সী. স্যা.)] আগচ্ছি, সীসং ময্হং পৰামসি;

বাহায মং গহেত্ৱান, সঙ্ঘাৰামং পৱেসযি.

৫১. ‘‘অনুকম্পায মে সত্থা, অদাসি পাদপুঞ্ছনিং;

এৱং সুদ্ধং অধিট্ঠেহি, একমন্তমধিট্ঠহং.

৫২. ‘‘হত্থেহি তমহং গয্হ, সৰিং কোকনদং অহং;

তত্থ চিত্তং ৱিমুচ্চি মে, অৰহত্তং অপাপুণিং.

৫৩. ‘‘মনোমযেসু কাযেসু, সব্বত্থ পাৰমিং গতো;

সব্বাসৱে পৰিঞ্ঞায, ৱিহৰামি অনাসৱো.

৫৪. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা চূড়পন্থকো [চুল্লপন্থকো (সী. স্যা.)] থেৰো ইমা গাথাযো অভাসিত্থাতি.

চূড়পন্থকত্থেৰস্সাপদানং চতুত্থং.