৩. নন্দত্থেৰঅপদানং

২৭. ‘‘পদুমুত্তৰস্স ভগৱতো, লোকজেট্ঠস্স তাদিনো;

ৱত্থং খোমং মযা দিন্নং, সযম্ভুস্স মহেসিনো.

২৮. ‘‘তং মে বুদ্ধো ৱিযাকাসি, জলজুত্তৰনামকো;

‘ইমিনা ৱত্থদানেন, হেমৱণ্ণো ভৱিস্সসি.

২৯. ‘‘‘দ্ৱে সম্পত্তী অনুভোত্ৱা, কুসলমূলেহি চোদিতো;

গোতমস্স ভগৱতো, কনিট্ঠো ত্ৱং ভৱিস্সসি.

৩০. ‘‘‘ৰাগৰত্তো সুখসীলো, কামেসু গেধমাযুতো;

বুদ্ধেন চোদিতো সন্তো, তদা [ততো (স্যা.)] ত্ৱং পব্বজিস্সসি.

৩১. ‘‘‘পব্বজিত্ৱান ত্ৱং তত্থ, কুসলমূলেন চোদিতো;

সব্বাসৱে পৰিঞ্ঞায, নিব্বাযিস্সসিনাসৱো’.

৩২. ‘‘সত্ত [সত (স্যা.)] কপ্পসহস্সম্হি, চতুৰো চেড়নামকা;

সট্ঠি কপ্পসহস্সম্হি, উপচেলা চতুজ্জনা.

৩৩. ‘‘পঞ্চ কপ্পসহস্সম্হি, চেড়াৱ চতুৰো জনা;

সত্তৰতনসম্পন্না, চতুদীপম্হি ইস্সৰা.

৩৪. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা নন্দো থেৰো ইমা গাথাযো অভাসিত্থাতি.

নন্দত্থেৰস্সাপদানং ততিযং.