২. অজিনদাযকত্থেৰঅপদানং

৬. ‘‘একত্তিংসে ইতো কপ্পে, গণসত্থাৰকো অহং;

অদ্দসং ৱিৰজং বুদ্ধং, আহুতীনং পটিগ্গহং.

৭. ‘‘চম্মখণ্ডং মযা দিন্নং, সিখিনো লোকবন্ধুনো;

তেন কম্মেন দ্ৱিপদিন্দ, লোকজেট্ঠ নৰাসভ.

৮. ‘‘সম্পত্তিং অনুভোত্ৱান, কিলেসে ঝাপযিং অহং;

ধাৰেমি অন্তিমং দেহং, সম্মাসম্বুদ্ধসাসনে.

৯. ‘‘একত্তিংসে ইতো কপ্পে, অজিনং যং অদাসহং;

দুগ্গতিং নাভিজানামি, অজিনস্স ইদং ফলং.

১০. ‘‘ইতো পঞ্চমকে কপ্পে, ৰাজা আসিং সুদাযকো;

সত্তৰতনসম্পন্নো, চক্কৱত্তী মহব্বলো.

১১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অজিনদাযকো থেৰো ইমা গাথাযো অভাসিত্থাতি.

অজিনদাযকত্থেৰস্সাপদানং দুতিযং.