১৫. ছত্তৱগ্গো

১. অতিছত্তিযত্থেৰঅপদানং

১. ‘‘পৰিনিব্বুতে ভগৱতি, অত্থদস্সীনৰুত্তমে;

ছত্তাতিছত্তং [ছত্তাধিছত্তং (সী.)] কাৰেত্ৱা, থূপম্হি অভিৰোপযিং.

২. ‘‘কালেন কালমাগন্ত্ৱা, নমস্সিং লোকনাযকং [সত্থু চেতিযং (সী.)];

পুপ্ফচ্ছদনং কত্ৱান, ছত্তম্হি অভিৰোপযিং.

৩. ‘‘সত্তৰসে কপ্পসতে, দেৱৰজ্জমকাৰযিং;

মনুস্সত্তং ন গচ্ছামি, থূপপূজাযিদং ফলং.

৪. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা অতিছত্তিযো [অধিছত্তিযো (সী. স্যা.)] থেৰো ইমা গাথাযো অভাসিত্থাতি.

অতিছত্তিযত্থেৰস্সাপদানং পঠমং.

২. থম্ভাৰোপকত্থেৰঅপদানং

৫. ‘‘নিব্বুতে লোকনাথম্হি, ধম্মদস্সীনৰাসভে;

আৰোপেসিং ধজত্থম্ভং, বুদ্ধসেট্ঠস্স চেতিযে.

৬. ‘‘নিস্সেণিং মাপযিত্ৱান, থূপসেট্ঠং সমাৰুহিং;

জাতিপুপ্ফং গহেত্ৱান, থূপম্হি অভিৰোপযিং.

৭. ‘‘অহো বুদ্ধো অহো ধম্মো, অহো নো সত্থু সম্পদা;

দুগ্গতিং নাভিজানামি, থূপপূজাযিদং ফলং.

৮. ‘‘চতুন্নৱুতিতো কপ্পে, থূপসীখসনামকা;

সোড়সাসিংসু ৰাজানো, চক্কৱত্তী মহব্বলা.

৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা থম্ভাৰোপকো থেৰো ইমা গাথাযো অভাসিত্থাতি.

থম্ভাৰোপকত্থেৰস্সাপদানং দুতিযং.

৩. ৱেদিকাৰকত্থেৰঅপদানং

১০. ‘‘নিব্বুতে লোকনাথম্হি, পিযদস্সীনৰুত্তমে;

পসন্নচিত্তো সুমনো, মুত্তাৱেদিমকাসহং.

১১. ‘‘মণীহি পৰিৱাৰেত্ৱা, অকাসিং ৱেদিমুত্তমং;

ৱেদিকায মহং কত্ৱা, তত্থ কালঙ্কতো অহং.

১২. ‘‘যং যং যোনুপপজ্জামি, দেৱত্তং অথ মানুসং;

মণী ধাৰেন্তি আকাসে, পুঞ্ঞকম্মস্সিদং ফলং.

১৩. ‘‘সোড়সিতো কপ্পসতে, মণিপ্পভাসনামকা;

ছত্তিংসাসিংসু [বাত্তিংসাসিংসু (সী. স্যা.)] ৰাজানো, চক্কৱত্তী মহব্বলা.

১৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৱেদিকাৰকো থেৰো ইমা গাথাযো অভাসিত্থাতি.

ৱেদিকাৰকত্থেৰস্সাপদানং ততিযং.

৪. সপৰিৱাৰিযত্থেৰঅপদানং

১৫. ‘‘পদুমুত্তৰো নাম জিনো, লোকজেট্ঠো নৰাসভো;

জলিত্ৱা অগ্গিক্খন্ধোৱ, সম্বুদ্ধো পৰিনিব্বুতো.

১৬. ‘‘নিব্বুতে চ মহাৱীৰে, থূপো ৱিত্থাৰিকো অহু;

দূৰতোৱ [অহোৰত্তং (সী.), থূপদত্তং (স্যা.)] উপট্ঠেন্তি, ধাতুগেহৱৰুত্তমে.

১৭. ‘‘পসন্নচিত্তো সুমনো, অকং চন্দনৱেদিকং;

দিস্সতি থূপখন্ধো চ [দীযতি ধূমক্খন্ধো চ (সী.), দীযতি ধূপগন্ধো চ (স্যা.)], থূপানুচ্ছৱিকো তদা.

১৮. ‘‘ভৱে নিব্বত্তমানম্হি, দেৱত্তে অথ মানুসে;

ওমত্তং মে ন পস্সামি, পুব্বকম্মস্সিদং ফলং.

১৯. ‘‘পঞ্চদসকপ্পসতে, ইতো অট্ঠ জনা অহুং;

সব্বে সমত্তনামা তে, চক্কৱত্তী মহব্বলা.

২০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সপৰিৱাৰিযো থেৰো ইমা গাথাযো অভাসিত্থাতি.

সপৰিৱাৰিযত্থেৰস্সাপদানং চতুত্থং.

৫. উমাপুপ্ফিযত্থেৰঅপদানং

২১. ‘‘নিব্বুতে লোকমহিতে [লোকনাথম্হি (সী.)], আহুতীনং পটিগ্গহে;

সিদ্ধত্থম্হি ভগৱতি, মহাথূপমহো অহু.

২২. ‘‘মহে পৱত্তমানম্হি, সিদ্ধত্থস্স মহেসিনো;

উমাপুপ্ফং [উম্মাপুপ্ফং (সব্বত্থ)] গহেত্ৱান, থূপম্হি অভিৰোপযিং.

২৩. ‘‘চতুন্নৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, থূপপূজাযিদং [পুপ্ফপূজাযিদং (স্যা.), বুদ্ধপূজাযিদং (ক.)] ফলং.

২৪. ‘‘ইতো চ নৱমে কপ্পে, সোমদেৱসনামকা;

পঞ্চাসীতিসু ৰাজানো, চক্কৱত্তী মহব্বলা.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উমাপুপ্ফিযো থেৰো ইমা গাথাযো অভাসিত্থাতি.

উমাপুপ্ফিযত্থেৰস্সাপদানং পঞ্চমং.

৬. অনুলেপদাযকত্থেৰঅপদানং

২৬. ‘‘অনোমদস্সীমুনিনো, বোধিৱেদিমকাসহং;

সুধায পিণ্ডং দত্ৱান, পাণিকম্মং অকাসহং.

২৭. ‘‘দিস্ৱা তং সুকতং কম্মং, অনোমদস্সী নৰুত্তমো;

ভিক্খুসঙ্ঘে ঠিতো সত্থা, ইমং গাথং অভাসথ.

২৮. ‘‘‘ইমিনা সুধকম্মেন, চেতনাপণিধীহি চ;

সম্পত্তিং অনুভোত্ৱান, দুক্খস্সন্তং কৰিস্সতি’.

২৯. ‘‘পসন্নমুখৱণ্ণোম্হি, একগ্গো সুসমাহিতো;

ধাৰেমি অন্তিমং দেহং, সম্মাসম্বুদ্ধসাসনে.

৩০. ‘‘ইতো কপ্পসতে আসিং, পৰিপুণ্ণে অনূনকে [পৰিপুণ্ণো অনূনকো (স্যা.)];

ৰাজা সব্বঘনো নাম, চক্কৱত্তী মহব্বলো.

৩১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অনুলেপদাযকো থেৰো ইমা গাথাযো অভাসিত্থাতি.

অনুলেপদাযকত্থেৰস্সাপদানং ছট্ঠং.

৭. মগ্গদাযকত্থেৰঅপদানং

৩২. ‘‘উত্তৰিত্ৱান নদিকং, ৱনং গচ্ছতি চক্খুমা;

তমদ্দসাসিং সম্বুদ্ধং, সিদ্ধত্থং ৱৰলক্খণং.

৩৩. ‘‘কুদাল [কুদ্দাল (সী. স্যা.)] পিটকমাদায, সমং কত্ৱান তং পথং;

সত্থাৰং অভিৱাদেত্ৱা, সকং চিত্তং পসাদযিং.

৩৪. ‘‘চতুন্নৱুতিতো কপ্পে, যং কম্মমকৰিং তদা;

দুগ্গতিং নাভিজানামি, মগ্গদানস্সিদং ফলং.

৩৫. ‘‘সত্তপঞ্ঞাসকপ্পম্হি, একো আসিং জনাধিপো;

নামেন সুপ্পবুদ্ধোতি, নাযকো সো নৰিস্সৰো.

৩৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মগ্গদাযকো থেৰো ইমা গাথাযো অভাসিত্থাতি.

মগ্গদাযকত্থেৰস্সাপদানং সত্তমং.

৮. ফলকদাযকত্থেৰঅপদানং

৩৭. ‘‘যানকাৰো পুৰে আসিং, দাৰুকম্মে সুসিক্খিতো;

চন্দনং ফলকং কত্ৱা, অদাসিং লোকবন্ধুনো.

৩৮. ‘‘পভাসতি ইদং ব্যম্হং, সুৱণ্ণস্স সুনিম্মিতং;

হত্থিযানং অস্সযানং, দিব্বযানং উপট্ঠিতং.

৩৯. ‘‘পাসাদা সিৱিকা চেৱ, নিব্বত্তন্তি যদিচ্ছকং;

অক্খুব্ভং [অক্খোভং (সী.)] ৰতনং ময্হং, ফলকস্স ইদং ফলং.

৪০. ‘‘একনৱুতিতো কপ্পে, ফলকং যমহং দদিং;

দুগ্গতিং নাভিজানামি, ফলকস্স ইদং ফলং.

৪১. ‘‘সত্তপঞ্ঞাসকপ্পম্হি, চতুৰো নিম্মিতাৱ্হযা;

সত্তৰতনসম্পন্না, চক্কৱত্তী মহব্বলা.

৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ফলকদাযকো থেৰো ইমা গাথাযো অভাসিত্থাতি.

ফলকদাযকত্থেৰস্সাপদানং অট্ঠমং.

৯. ৱটংসকিযত্থেৰঅপদানং

৪৩. ‘‘সুমেধো নাম নামেন, সযম্ভূ অপৰাজিতো;

ৱিৱেকমনুব্ৰূহন্তো, অজ্ঝোগহি মহাৱনং.

৪৪. ‘‘সড়লং পুপ্ফিতং দিস্ৱা, গন্থিত্ৱান [বন্ধিত্ৱান (সী.)] ৱটংসকং;

বুদ্ধস্স অভিৰোপেসিং, সম্মুখা লোকনাযকং.

৪৫. ‘‘তিংসকপ্পসহস্সম্হি, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

৪৬. ‘‘ঊনৱীসে কপ্পসতে, সোড়সাসুং সুনিম্মিতা;

সত্তৰতনসম্পন্না, চক্কৱত্তী মহব্বলা.

৪৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৱটংসকিযো থেৰো ইমা গাথাযো অভাসিত্থাতি.

ৱটংসকিযত্থেৰস্সাপদানং নৱমং.

১০. পল্লঙ্কদাযকত্থেৰঅপদানং

৪৮. ‘‘সুমেধস্স ভগৱতো, লোকজেট্ঠস্স তাদিনো;

পল্লঙ্কো হি মযা দিন্নো, সউত্তৰসপচ্ছদো.

৪৯. ‘‘সত্তৰতনসম্পন্নো, পল্লঙ্কো আসি সো তদা;

মম সঙ্কপ্পমঞ্ঞায, নিব্বত্ততি সদা মম.

৫০. ‘‘তিংসকপ্পসহস্সম্হি, পল্লঙ্কমদদিং তদা;

দুগ্গতিং নাভিজানামি, পল্লঙ্কস্স ইদং ফলং.

৫১. ‘‘ৱীসকপ্পসহস্সম্হি, সুৱণ্ণাভা তযো জনা;

সত্তৰতনসম্পন্না, চক্কৱত্তী মহব্বলা.

৫২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পল্লঙ্কদাযকো থেৰো ইমা গাথাযো অভাসিত্থাতি.

পল্লঙ্কদাযকত্থেৰস্সাপদানং দসমং.

ছত্তৱগ্গো পন্নৰসমো.