৫. ৰহোসঞ্ঞকত্থেৰঅপদানং

৩৪. ‘‘হিমৱন্তস্সাৱিদূৰে, ৱসভো নাম পব্বতো;

তস্মিং পব্বতপাদম্হি, অস্সমো আসি মাপিতো.

৩৫. ‘‘তীণি সিস্সসহস্সানি, ৱাচেসিং ব্ৰাহ্মণো [ব্ৰাহ্মণে (সী.)] তদা;

সংহৰিত্ৱান [সংসাৱিত্ৱান (স্যা.)] তে সিস্সে, একমন্তং উপাৱিসিং.

৩৬. ‘‘একমন্তং নিসীদিত্ৱা, ব্ৰাহ্মণো মন্তপাৰগূ;

বুদ্ধৱেদং গৱেসন্তো [পৱেসন্তো (ক.)], ঞাণে চিত্তং পসাদযিং.

৩৭. ‘‘তত্থ চিত্তং পসাদেত্ৱা, নিসীদিং পণ্ণসন্থৰে;

পল্লঙ্কং আভুজিত্ৱান, তত্থ কালঙ্কতো অহং.

৩৮. ‘‘একত্তিংসে ইতো কপ্পে, যং সঞ্ঞমলভিং তদা;

দুগ্গতিং নাভিজানামি, ঞাণসঞ্ঞাযিদং ফলং.

৩৯. ‘‘সত্তৱীসতিকপ্পম্হি, ৰাজা সিৰিধৰো অহু;

সত্তৰতনসম্পন্নো, চক্কৱত্তী মহব্বলো.

৪০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰহোসঞ্ঞকো থেৰো ইমা গাথাযো অভাসিত্থাতি.

ৰহোসঞ্ঞকত্থেৰস্সাপদানং পঞ্চমং.