৩. চন্দনপূজনকত্থেৰঅপদানং

১৭. ‘‘চন্দভাগানদীতীৰে, অহোসিং কিন্নৰো তদা;

পুপ্ফভক্খো চহং আসিং, পুপ্ফানিৱসনো তথা [পুপ্ফানং ৱসনো অহং (স্যা.)].

১৮. ‘‘অত্থদস্সী তু ভগৱা, লোকজেট্ঠো নৰাসভো;

ৱিপিনগ্গেন নিয্যাসি, হংসৰাজাৱ অম্বৰে.

১৯. ‘‘নমো তে পুৰিসাজঞ্ঞ, চিত্তং তে সুৱিসোধিতং;

পসন্নমুখৱণ্ণোসি, ৱিপ্পসন্নমুখিন্দ্ৰিযো.

২০. ‘‘ওৰোহিত্ৱান আকাসা, ভূৰিপঞ্ঞো সুমেধসো;

সঙ্ঘাটিং পত্থৰিত্ৱান, পল্লঙ্কেন উপাৱিসি.

২১. ‘‘ৱিলীনং চন্দনাদায, অগমাসিং জিনন্তিকং;

পসন্নচিত্তো সুমনো, বুদ্ধস্স অভিৰোপযিং.

২২. ‘‘অভিৱাদেত্ৱান সম্বুদ্ধং, লোকজেট্ঠং নৰাসভং;

পামোজ্জং জনযিত্ৱান, পক্কামিং উত্তৰামুখো.

২৩. ‘‘অট্ঠাৰসে কপ্পসতে, চন্দনং যং অপূজযিং;

দুগ্গতিং নাভিজানামি, বুদ্ধপূজাযিদং ফলং.

২৪. ‘‘চতুদ্দসে কপ্পসতে, ইতো আসিংসু তে তযো;

ৰোহণী নাম [ৰোহিতা নাম (সী.), ৰোহিণী নাম (স্যা.)] নামেন, চক্কৱত্তী মহব্বলা.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা চন্দনপূজনকো থেৰো ইমা গাথাযো অভাসিত্থাতি;

চন্দনপূজনকত্থেৰস্সাপদানং ততিযং.

অট্ঠমভাণৱাৰং.