৯. গণ্ঠিপুপ্ফিযত্থেৰঅপদানং

৯১. ‘‘সুৱণ্ণৱণ্ণো সম্বুদ্ধো, ৱিপস্সী দক্খিণাৰহো;

পুৰক্খতো সাৱকেহি, আৰামা অভিনিক্খমি.

৯২. ‘‘দিস্ৱানহং বুদ্ধসেট্ঠং, সব্বঞ্ঞুং তমনাসকং;

পসন্নচিত্তো সুমনো, গণ্ঠিপুপ্ফং [গতমগ্গং (স্যা. ক.)] অপূজযিং.

৯৩. ‘‘তেন চিত্তপ্পসাদেন, দ্ৱিপদিন্দস্স তাদিনো;

হট্ঠো হট্ঠেন চিত্তেন, পুন ৱন্দিং তথাগতং.

৯৪. ‘‘একনৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

৯৫. ‘‘একতালীসিতো কপ্পে, চৰণো নাম খত্তিযো;

সত্তৰতনসম্পন্নো, চক্কৱত্তী মহব্বলো.

৯৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা গণ্ঠিপুপ্ফিযো [গন্ধপুপ্ফিযো (স্যা. ক.)] থেৰো ইমা গাথাযো অভাসিত্থাতি.

গণ্ঠিপুপ্ফিযত্থেৰস্সাপদানং নৱমং.