২. পুপ্ফথূপিযত্থেৰঅপদানং

১০. ‘‘হিমৱন্তস্সাৱিদূৰে, কুক্কুৰো নাম [কুক্কুটো নাম (সী.)] পব্বতো;

ৱেমজ্ঝে তস্স ৱসতি, ব্ৰাহ্মণো মন্তপাৰগূ.

১১. ‘‘পঞ্চ সিস্সসহস্সানি, পৰিৱাৰেন্তি মং সদা;

পুব্বুট্ঠাযী চ তে আসুং, মন্তেসু চ ৱিসাৰদা.

১২. ‘‘বুদ্ধো লোকে সমুপ্পন্নো, তং ৱিজানাথ নো ভৱং;

অসীতিব্যঞ্জনানস্স, বাত্তিংসৱৰলক্খণা.

১৩. ‘‘ব্যামপ্পভো জিনৱৰো, আদিচ্চোৱ ৱিৰোচতি;

সিস্সানং ৱচনং সুত্ৱা, ব্ৰাহ্মণো মন্তপাৰগূ.

১৪. ‘‘অস্সমা অভিনিক্খম্ম, দিসং পুচ্ছতি সিস্সকে [ব্ৰাহ্মণো (স্যা.)];

যম্হি দেসে মহাৱীৰো, ৱসতি লোকনাযকো.

১৫. ‘‘তাহং দিসং নমস্সিস্সং, জিনং অপ্পটিপুগ্গলং;

উদগ্গচিত্তো সুমনো, পূজেসিং তং তথাগতং.

১৬. ‘‘এথ সিস্সা গমিস্সাম, দক্খিস্সাম তথাগতং;

ৱন্দিত্ৱা সত্থুনো পাদে, সোস্সাম জিনসাসনং.

১৭. ‘‘একাহং অভিনিক্খম্ম, ব্যাধিং পটিলভিং অহং;

ব্যাধিনা পীড়িতো সন্তো, সালং ৱাসযিতুং গমিং.

১৮. ‘‘সব্বে সিস্সে সমানেত্ৱা, অপুচ্ছিং তে তথাগতং;

কীদিসং লোকনাথস্স, গুণং পৰমবুদ্ধিনো.

১৯. ‘‘তে মে পুট্ঠা ৱিযাকংসু, যথা দস্সাৱিনো তথা;

সক্কচ্চং বুদ্ধসেট্ঠং তং, দেসেসুং [দস্সেসুং (সী. স্যা.)] মম সম্মুখা.

২০. ‘‘তেসাহং ৱচনং সুত্ৱা, সকং চিত্তং পসাদযিং;

পুপ্ফেহি থূপং কত্ৱান, তত্থ কালঙ্কতো অহং.

২১. ‘‘তে মে সৰীৰং ঝাপেত্ৱা, অগমুং বুদ্ধসন্তিকং;

অঞ্জলিং পগ্গহেত্ৱান, সত্থাৰমভিৱাদযুং.

২২. ‘‘পুপ্ফেহি থূপং কত্ৱান, সুগতস্স মহেসিনো;

কপ্পানং সতসহস্সং, দুগ্গতিং নুপপজ্জহং.

২৩. ‘‘চত্তালীসসহস্সম্হি, কপ্পে সোড়স খত্তিযা;

নামেনগ্গিসমা নাম, চক্কৱত্তী মহব্বলা.

২৪. ‘‘ৱীসকপ্পসহস্সম্হি, ৰাজানো চক্কৱত্তিনো;

ঘতাসনসনামাৱ, অট্ঠত্তিংস মহীপতী.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুপ্ফথূপিযো থেৰো ইমা গাথাযো অভাসিত্থাতি.

পুপ্ফথূপিযত্থেৰস্সাপদানং দুতিযং.