৮. মগ্গসঞ্ঞকত্থেৰঅপদানং

৬৬. ‘‘পদুমুত্তৰবুদ্ধস্স, সাৱকা ৱনচাৰিনো;

ৱিপ্পনট্ঠা ব্ৰহাৰঞ্ঞে, অন্ধাৱ অনুসুয্যৰে [অনুসুযৰে (সী.)].

৬৭. ‘‘অনুস্সৰিত্ৱা সম্বুদ্ধং, পদুমুত্তৰনাযকং;

তস্স তে মুনিনো পুত্তা, ৱিপ্পনট্ঠা মহাৱনে.

৬৮. ‘‘ভৱনা ওৰুহিত্ৱান, অগমিং ভিক্খুসন্তিকং;

তেসং মগ্গঞ্চ আচিক্খিং, ভোজনঞ্চ অদাসহং.

৬৯. ‘‘তেন কম্মেন দ্ৱিপদিন্দ, লোকজেট্ঠ নৰাসভ;

জাতিযা সত্তৱস্সোহং, অৰহত্তমপাপুণিং.

৭০. ‘‘সচক্খূ নাম নামেন, দ্ৱাদস চক্কৱত্তিনো;

সত্তৰতনসম্পন্না, পঞ্চকপ্পসতে ইতো.

৭১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মগ্গসঞ্ঞকো থেৰো ইমা গাথাযো অভাসিত্থাতি.

মগ্গসঞ্ঞকত্থেৰস্সাপদানং অট্ঠমং.