৬. চিতকপূজকত্থেৰঅপদানং

৪৯. ‘‘ৱসামি ৰাজাযতনে, সামচ্চো সপৰিজ্জনো;

পৰিনিব্বুতে ভগৱতি, সিখিনো লোকবন্ধুনো.

৫০. ‘‘পসন্নচিত্তো সুমনো, চিতকং অগমাসহং;

তূৰিযং তত্থ ৱাদেত্ৱা, গন্ধমালং সমোকিৰিং.

৫১. ‘‘চিতম্হি পূজং কত্ৱান, ৱন্দিত্ৱা চিতকং অহং;

পসন্নচিত্তো সুমনো, সকং ভৱনুপাগমিং.

৫২. ‘‘ভৱনে উপৱিট্ঠোহং, চিতপূজং অনুস্সৰিং;

তেন কম্মেন দ্ৱিপদিন্দ, লোকজেট্ঠ নৰাসভ.

৫৩. ‘‘অনুভোত্ৱান সম্পত্তিং, দেৱেসু মানুসেসু চ;

পত্তোম্হি অচলং ঠানং, হিত্ৱা জযপৰাজযং.

৫৪. ‘‘একত্তিংসে ইতো কপ্পে, যং পুপ্ফমভিৰোপযিং;

দুগ্গতিং নাভিজানামি, চিতপূজাযিদং ফলং.

৫৫. ‘‘একূনতিংসকপ্পম্হি, ইতো সোড়স ৰাজানো;

উগ্গতা নাম নামেন, চক্কৱত্তী মহব্বলা.

৫৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা চিতকপূজকো থেৰো ইমা গাথাযো অভাসিত্থাতি.

চিতকপূজকত্থেৰস্সাপদানং ছট্ঠং.