৫. গন্ধমালিযত্থেৰঅপদানং

২৪. ‘‘সিদ্ধত্থস্স ভগৱতো, গন্ধথূপং অকাসহং;

সুমনেহি পটিচ্ছন্নং, বুদ্ধানুচ্ছৱিকং কতং.

২৫. ‘‘কঞ্চনগ্ঘিযসঙ্কাসং, বুদ্ধং লোকগ্গনাযকং;

ইন্দীৱৰংৱ জলিতং, আদিত্তংৱ হুতাসনং.

২৬. ‘‘ব্যগ্ঘূসভংৱ পৱৰং, অভিজাতংৱ কেসৰিং;

নিসিন্নং সমণানগ্গং, ভিক্খুসঙ্ঘপুৰক্খতং.

২৭. ‘‘ৱন্দিত্ৱা সত্থুনো পাদে, পক্কামিং উত্তৰামুখো;

চতুন্নৱুতিতো কপ্পে, গন্ধমালং যতো অদং.

২৮. ‘‘বুদ্ধে কতস্স কাৰস্স, ফলেনাহং ৱিসেসতো;

দুগ্গতিং নাভিজানামি, বুদ্ধপূজাযিদং ফলং.

২৯. ‘‘চত্তাৰীসম্হি একূনে, কপ্পে আসিংসু সোড়স;

দেৱগন্ধসনামা তে, ৰাজানো চক্কৱত্তিনো.

৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা গন্ধমালিযো থেৰো ইমা গাথাযো অভাসিত্থাতি.

গন্ধমালিযত্থেৰস্সাপদানং পঞ্চমং.