১০. বুদ্ধুপট্ঠাকত্থেৰঅপদানং

৫৬. ‘‘ৱিপস্সিস্স ভগৱতো, অহোসিং সঙ্খধম্মকো;

নিচ্চুপট্ঠানযুত্তোম্হি, সুগতস্স মহেসিনো.

৫৭. ‘‘উপট্ঠানফলং পস্স, লোকনাথস্স তাদিনো;

সট্ঠিতূৰিযসহস্সানি, পৰিৱাৰেন্তি মং সদা.

৫৮. ‘‘একনৱুতিতো কপ্পে, উপট্ঠহিং মহাইসিং;

দুগ্গতিং নাভিজানামি, উপট্ঠানস্সিদং ফলং.

৫৯. ‘‘চতুৱীসে [চতুনৱুতে (স্যা.)] ইতো কপ্পে, মহানিগ্ঘোসনামকা;

সোড়সাসিংসু ৰাজানো, চক্কৱত্তী মহব্বলা.

৬০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বুদ্ধুপট্ঠাকো থেৰো ইমা গাথাযো অভাসিত্থাতি.

বুদ্ধুপট্ঠাকত্থেৰস্সাপদানং দসমং.

সুধাৱগ্গো দসমো.

তস্সুদ্দানং –

সুধা সুচিন্তি চেড়ঞ্চ, সূচী চ গন্ধমালিযো;

তিপুপ্ফিযো মধুসেনা, ৱেয্যাৱচ্চো চুপট্ঠকো;

সমসট্ঠি চ গাথাযো, অস্মিং ৱগ্গে পকিত্তিতা.

অথ ৱগ্গুদ্দানং –

বুদ্ধৱগ্গো হি পঠমো, সীহাসনি সুভূতি চ;

কুণ্ডধানো উপালি চ, বীজনিসকচিন্তি চ.

নাগসমালো তিমিৰো, সুধাৱগ্গেন তে দস;

চতুদ্দসসতা গাথা, পঞ্চপঞ্ঞাসমেৱ চ.

বুদ্ধৱগ্গদসকং.