৮. মহাসীহনাদসুত্তং

অচেলকস্সপৱত্থু

৩৮১. এৱং মে সুতং – একং সমযং ভগৱা উৰুঞ্ঞাযং [উজুঞ্ঞাযং (সী. স্যা. কং. পী.)] ৱিহৰতি কণ্ণকত্থলে মিগদাযে. অথ খো অচেলো কস্সপো যেন ভগৱা তেনুপসঙ্কমি; উপসঙ্কমিত্ৱা ভগৱতা সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং অট্ঠাসি. একমন্তং ঠিতো খো অচেলো কস্সপো ভগৱন্তং এতদৱোচ – ‘‘সুতং মেতং, ভো গোতম – ‘সমণো গোতমো সব্বং তপং গৰহতি, সব্বং তপস্সিং লূখাজীৱিং একংসেন উপক্কোসতি উপৱদতী’তি. যে তে, ভো গোতম, এৱমাহংসু – ‘সমণো গোতমো সব্বং তপং গৰহতি, সব্বং তপস্সিং লূখাজীৱিং একংসেন উপক্কোসতি উপৱদতী’তি, কচ্চি তে ভোতো গোতমস্স ৱুত্তৱাদিনো, ন চ ভৱন্তং গোতমং অভূতেন অব্ভাচিক্খন্তি, ধম্মস্স চানুধম্মং ব্যাকৰোন্তি, ন চ কোচি সহধম্মিকো ৱাদানুৱাদো গাৰয্হং ঠানং আগচ্ছতি? অনব্ভক্খাতুকামা হি মযং ভৱন্তং গোতম’’ন্তি.

৩৮২. ‘‘যে তে, কস্সপ, এৱমাহংসু – ‘সমণো গোতমো সব্বং তপং গৰহতি, সব্বং তপস্সিং লূখাজীৱিং একংসেন উপক্কোসতি উপৱদতী’তি, ন মে তে ৱুত্তৱাদিনো, অব্ভাচিক্খন্তি চ পন মং তে অসতা অভূতেন. ইধাহং, কস্সপ, একচ্চং তপস্সিং লূখাজীৱিং পস্সামি দিব্বেন চক্খুনা ৱিসুদ্ধেন অতিক্কন্তমানুসকেন কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপন্নং. ইধ পনাহং, কস্সপ, একচ্চং তপস্সিং লূখাজীৱিং পস্সামি দিব্বেন চক্খুনা ৱিসুদ্ধেন অতিক্কন্তমানুসকেন কাযস্স ভেদা পৰং মৰণা সুগতিং সগ্গং লোকং উপপন্নং.

৩৮৩. ‘‘ইধাহং, কস্সপ, একচ্চং তপস্সিং অপ্পদুক্খৱিহাৰিং পস্সামি দিব্বেন চক্খুনা ৱিসুদ্ধেন অতিক্কন্তমানুসকেন কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপন্নং. ইধ পনাহং, কস্সপ, একচ্চং তপস্সিং অপ্পদুক্খৱিহাৰিং পস্সামি দিব্বেন চক্খুনা ৱিসুদ্ধেন অতিক্কন্তমানুসকেন কাযস্স ভেদা পৰং মৰণা সুগতিং সগ্গং লোকং উপপন্নং. যোহং, কস্সপ, ইমেসং তপস্সীনং এৱং আগতিঞ্চ গতিঞ্চ চুতিঞ্চ উপপত্তিঞ্চ যথাভূতং পজানামি, সোহং কিং সব্বং তপং গৰহিস্সামি, সব্বং ৱা তপস্সিং লূখাজীৱিং একংসেন উপক্কোসিস্সামি উপৱদিস্সামি?

৩৮৪. ‘‘সন্তি, কস্সপ, একে সমণব্ৰাহ্মণা পণ্ডিতা নিপুণা কতপৰপ্পৱাদা ৱালৱেধিৰূপা. তে ভিন্দন্তা মঞ্ঞে চৰন্তি পঞ্ঞাগতেন দিট্ঠিগতানি. তেহিপি মে সদ্ধিং একচ্চেসু ঠানেসু সমেতি, একচ্চেসু ঠানেসু ন সমেতি. যং তে একচ্চং ৱদন্তি ‘সাধূ’তি, মযম্পি তং একচ্চং ৱদেম ‘সাধূ’তি. যং তে একচ্চং ৱদন্তি ‘ন সাধূ’তি, মযম্পি তং একচ্চং ৱদেম ‘ন সাধূ’তি. যং তে একচ্চং ৱদন্তি ‘সাধূ’তি, মযং তং একচ্চং ৱদেম ‘ন সাধূ’তি. যং তে একচ্চং ৱদন্তি ‘ন সাধূ’তি, মযং তং একচ্চং ৱদেম ‘সাধূ’তি.

‘‘যং মযং একচ্চং ৱদেম ‘সাধূ’তি, পৰেপি তং একচ্চং ৱদন্তি ‘সাধূ’তি. যং মযং একচ্চং ৱদেম ‘ন সাধূ’তি, পৰেপি তং একচ্চং ৱদন্তি ‘ন সাধূ’তি. যং মযং একচ্চং ৱদেম ‘ন সাধূ’তি, পৰে তং একচ্চং ৱদন্তি ‘সাধূ’তি. যং মযং একচ্চং ৱদেম ‘সাধূ’তি, পৰে তং একচ্চং ৱদন্তি ‘ন সাধূ’তি.

সমনুযুঞ্জাপনকথা

৩৮৫. ‘‘ত্যাহং উপসঙ্কমিত্ৱা এৱং ৱদামি – যেসু নো, আৱুসো, ঠানেসু ন সমেতি, তিট্ঠন্তু তানি ঠানানি. যেসু ঠানেসু সমেতি, তত্থ ৱিঞ্ঞূ সমনুযুঞ্জন্তং সমনুগাহন্তং সমনুভাসন্তং সত্থাৰা ৱা সত্থাৰং সঙ্ঘেন ৱা সঙ্ঘং – ‘যে ইমেসং ভৱতং ধম্মা অকুসলা অকুসলসঙ্খাতা, সাৱজ্জা সাৱজ্জসঙ্খাতা, অসেৱিতব্বা অসেৱিতব্বসঙ্খাতা, ন অলমৰিযা ন অলমৰিযসঙ্খাতা, কণ্হা কণ্হসঙ্খাতা. কো ইমে ধম্মে অনৱসেসং পহায ৱত্ততি, সমণো ৱা গোতমো, পৰে ৱা পন ভোন্তো গণাচৰিযা’তি?

৩৮৬. ‘‘ঠানং খো পনেতং, কস্সপ, ৱিজ্জতি, যং ৱিঞ্ঞূ সমনুযুঞ্জন্তা সমনুগাহন্তা সমনুভাসন্তা এৱং ৱদেয্যুং – ‘যে ইমেসং ভৱতং ধম্মা অকুসলা অকুসলসঙ্খাতা, সাৱজ্জা সাৱজ্জসঙ্খাতা, অসেৱিতব্বা অসেৱিতব্বসঙ্খাতা, ন অলমৰিযা ন অলমৰিযসঙ্খাতা, কণ্হা কণ্হসঙ্খাতা. সমণো গোতমো ইমে ধম্মে অনৱসেসং পহায ৱত্ততি, যং ৱা পন ভোন্তো পৰে গণাচৰিযা’তি. ইতিহ, কস্সপ, ৱিঞ্ঞূ সমনুযুঞ্জন্তা সমনুগাহন্তা সমনুভাসন্তা অম্হেৱ তত্থ যেভুয্যেন পসংসেয্যুং.

৩৮৭. ‘‘অপৰম্পি নো, কস্সপ, ৱিঞ্ঞূ সমনুযুঞ্জন্তং সমনুগাহন্তং সমনুভাসন্তং সত্থাৰা ৱা সত্থাৰং সঙ্ঘেন ৱা সঙ্ঘং – ‘যে ইমেসং ভৱতং ধম্মা কুসলা কুসলসঙ্খাতা, অনৱজ্জা অনৱজ্জসঙ্খাতা, সেৱিতব্বা সেৱিতব্বসঙ্খাতা, অলমৰিযা অলমৰিযসঙ্খাতা, সুক্কা সুক্কসঙ্খাতা. কো ইমে ধম্মে অনৱসেসং সমাদায ৱত্ততি, সমণো ৱা গোতমো, পৰে ৱা পন ভোন্তো গণাচৰিযা’ তি?

৩৮৮. ‘‘ঠানং খো পনেতং, কস্সপ, ৱিজ্জতি, যং ৱিঞ্ঞূ সমনুযুঞ্জন্তা সমনুগাহন্তা সমনুভাসন্তা এৱং ৱদেয্যুং – ‘যে ইমেসং ভৱতং ধম্মা কুসলা কুসলসঙ্খাতা, অনৱজ্জা অনৱজ্জসঙ্খাতা, সেৱিতব্বা সেৱিতব্বসঙ্খাতা, অলমৰিযা অলমৰিযসঙ্খাতা, সুক্কা সুক্কসঙ্খাতা. সমণো গোতমো ইমে ধম্মে অনৱসেসং সমাদায ৱত্ততি, যং ৱা পন ভোন্তো পৰে গণাচৰিযা’তি. ইতিহ, কস্সপ, ৱিঞ্ঞূ সমনুযুঞ্জন্তা সমনুগাহন্তা সমনুভাসন্তা অম্হেৱ তত্থ যেভুয্যেন পসংসেয্যুং.

৩৮৯. ‘‘অপৰম্পি নো, কস্সপ, ৱিঞ্ঞূ সমনুযুঞ্জন্তং সমনুগাহন্তং সমনুভাসন্তং সত্থাৰা ৱা সত্থাৰং সঙ্ঘেন ৱা সঙ্ঘং – ‘যে ইমেসং ভৱতং ধম্মা অকুসলা অকুসলসঙ্খাতা, সাৱজ্জা সাৱজ্জসঙ্খাতা, অসেৱিতব্বা অসেৱিতব্বসঙ্খাতা, ন অলমৰিযা ন অলমৰিযসঙ্খাতা, কণ্হা কণ্হসঙ্খাতা. কো ইমে ধম্মে অনৱসেসং পহায ৱত্ততি, গোতমসাৱকসঙ্ঘো ৱা, পৰে ৱা পন ভোন্তো গণাচৰিযসাৱকসঙ্ঘা’তি?

৩৯০. ‘‘ঠানং খো পনেতং, কস্সপ, ৱিজ্জতি, যং ৱিঞ্ঞূ সমনুযুঞ্জন্তা সমনুগাহন্তা সমনুভাসন্তা এৱং ৱদেয্যুং – ‘যে ইমেসং ভৱতং ধম্মা অকুসলা অকুসলসঙ্খাতা, সাৱজ্জা সাৱজ্জসঙ্খাতা, অসেৱিতব্বা অসেৱিতব্বসঙ্খাতা, ন অলমৰিযা ন অলমৰিযসঙ্খাতা, কণ্হা কণ্হসঙ্খাতা. গোতমসাৱকসঙ্ঘো ইমে ধম্মে অনৱসেসং পহায ৱত্ততি, যং ৱা পন ভোন্তো পৰে গণাচৰিযসাৱকসঙ্ঘা’তি. ইতিহ, কস্সপ, ৱিঞ্ঞূ সমনুযুঞ্জন্তা সমনুগাহন্তা সমনুভাসন্তা অম্হেৱ তত্থ যেভুয্যেন পসংসেয্যুং.

৩৯১. ‘‘অপৰম্পি নো, কস্সপ, ৱিঞ্ঞূ সমনুযুঞ্জন্তং সমনুগাহন্তং সমনুভাসন্তং সত্থাৰা ৱা সত্থাৰং সঙ্ঘেন ৱা সঙ্ঘং. ‘যে ইমেসং ভৱতং ধম্মা কুসলা কুসলসঙ্খাতা, অনৱজ্জা অনৱজ্জসঙ্খাতা, সেৱিতব্বা সেৱিতব্বসঙ্খাতা, অলমৰিযা অলমৰিযসঙ্খাতা, সুক্কা সুক্কসঙ্খাতা. কো ইমে ধম্মে অনৱসেসং সমাদায ৱত্ততি, গোতমসাৱকসঙ্ঘো ৱা, পৰে ৱা পন ভোন্তো গণাচৰিযসাৱকসঙ্ঘা’তি?

৩৯২. ‘‘ঠানং খো পনেতং, কস্সপ, ৱিজ্জতি, যং ৱিঞ্ঞূ সমনুযুঞ্জন্তা সমনুগাহন্তা সমনুভাসন্তা এৱং ৱদেয্যুং – ‘যে ইমেসং ভৱতং ধম্মা কুসলা কুসলসঙ্খাতা, অনৱজ্জা অনৱজ্জসঙ্খাতা, সেৱিতব্বা সেৱিতব্বসঙ্খাতা, অলমৰিযা অলমৰিযসঙ্খাতা, সুক্কা সুক্কসঙ্খাতা. গোতমসাৱকসঙ্ঘো ইমে ধম্মে অনৱসেসং সমাদায ৱত্ততি, যং ৱা পন ভোন্তো পৰে গণাচৰিযসাৱকসঙ্ঘা’তি. ইতিহ, কস্সপ, ৱিঞ্ঞূ সমনুযুঞ্জন্তা সমনুগাহন্তা সমনুভাসন্তা অম্হেৱ তত্থ যেভুয্যেন পসংসেয্যুং.

অৰিযো অট্ঠঙ্গিকো মগ্গো

৩৯৩. ‘‘অত্থি, কস্সপ, মগ্গো অত্থি পটিপদা, যথাপটিপন্নো সামংযেৱ ঞস্সতি সামং দক্খতি [দক্খিতি (সী.)] – ‘সমণোৱ গোতমো কালৱাদী ভূতৱাদী অত্থৱাদী ধম্মৱাদী ৱিনযৱাদী’তি. কতমো চ, কস্সপ, মগ্গো, কতমা চ পটিপদা, যথাপটিপন্নো সামংযেৱ ঞস্সতি সামং দক্খতি – ‘সমণোৱ গোতমো কালৱাদী ভূতৱাদী অত্থৱাদী ধম্মৱাদী ৱিনযৱাদী’তি? অযমেৱ অৰিযো অট্ঠঙ্গিকো মগ্গো. সেয্যথিদং – সম্মাদিট্ঠি সম্মাসঙ্কপ্পো সম্মাৱাচা সম্মাকম্মন্তো সম্মাআজীৱো সম্মাৱাযামো সম্মাসতি সম্মাসমাধি. অযং খো, কস্সপ, মগ্গো, অযং পটিপদা, যথাপটিপন্নো সামংযেৱ ঞস্সতি সামং দক্খতি ‘সমণোৱ গোতমো কালৱাদী ভূতৱাদী অত্থৱাদী ধম্মৱাদী ৱিনযৱাদী’’’তি.

তপোপক্কমকথা

৩৯৪. এৱং ৱুত্তে, অচেলো কস্সপো ভগৱন্তং এতদৱোচ – ‘‘ইমেপি খো, আৱুসো গোতম, তপোপক্কমা এতেসং সমণব্ৰাহ্মণানং সামঞ্ঞসঙ্খাতা চ ব্ৰহ্মঞ্ঞসঙ্খাতা চ. অচেলকো হোতি, মুত্তাচাৰো, হত্থাপলেখনো, ন এহিভদ্দন্তিকো, ন তিট্ঠভদ্দন্তিকো, নাভিহটং, ন উদ্দিস্সকতং, ন নিমন্তনং সাদিযতি. সো ন কুম্ভিমুখা পটিগ্গণ্হাতি, ন কড়োপিমুখা পটিগ্গণ্হাতি, ন এড়কমন্তৰং, ন দণ্ডমন্তৰং, ন মুসলমন্তৰং, ন দ্ৱিন্নং ভুঞ্জমানানং, ন গব্ভিনিযা, ন পাযমানায, ন পুৰিসন্তৰগতায, ন সঙ্কিত্তীসু, ন যত্থ সা উপট্ঠিতো হোতি, ন যত্থ মক্খিকা সণ্ডসণ্ডচাৰিনী, ন মচ্ছং, ন মংসং, ন সুৰং, ন মেৰযং, ন থুসোদকং পিৱতি. সো একাগাৰিকো ৱা হোতি একালোপিকো, দ্ৱাগাৰিকো ৱা হোতি দ্ৱালোপিকো…পে… সত্তাগাৰিকো ৱা হোতি সত্তালোপিকো; একিস্সাপি দত্তিযা যাপেতি, দ্ৱীহিপি দত্তীহি যাপেতি… সত্তহিপি দত্তীহি যাপেতি; একাহিকম্পি আহাৰং আহাৰেতি, দ্ৱীহিকম্পি আহাৰং আহাৰেতি… সত্তাহিকম্পি আহাৰং আহাৰেতি. ইতি এৱৰূপং অদ্ধমাসিকম্পি পৰিযাযভত্তভোজনানুযোগমনুযুত্তো ৱিহৰতি.

৩৯৫. ‘‘ইমেপি খো, আৱুসো গোতম, তপোপক্কমা এতেসং সমণব্ৰাহ্মণানং সামঞ্ঞসঙ্খাতা চ ব্ৰহ্মঞ্ঞসঙ্খাতা চ. সাকভক্খো ৱা হোতি, সামাকভক্খো ৱা হোতি, নীৱাৰভক্খো ৱা হোতি, দদ্দুলভক্খো ৱা হোতি, হটভক্খো ৱা হোতি, কণভক্খো ৱা হোতি, আচামভক্খো ৱা হোতি, পিঞ্ঞাকভক্খো ৱা হোতি, তিণভক্খো ৱা হোতি, গোমযভক্খো ৱা হোতি, ৱনমূলফলাহাৰো যাপেতি পৱত্তফলভোজী.

৩৯৬. ‘‘ইমেপি খো, আৱুসো গোতম, তপোপক্কমা এতেসং সমণব্ৰাহ্মণানং সামঞ্ঞসঙ্খাতা চ ব্ৰহ্মঞ্ঞসঙ্খাতা চ. সাণানিপি ধাৰেতি, মসাণানিপি ধাৰেতি, ছৱদুস্সানিপি ধাৰেতি, পংসুকূলানিপি ধাৰেতি, তিৰীটানিপি ধাৰেতি, অজিনম্পি ধাৰেতি, অজিনক্খিপম্পি ধাৰেতি, কুসচীৰম্পি ধাৰেতি, ৱাকচীৰম্পি ধাৰেতি, ফলকচীৰম্পি ধাৰেতি, কেসকম্বলম্পি ধাৰেতি, ৱাড়কম্বলম্পি ধাৰেতি, উলূকপক্খিকম্পি ধাৰেতি, কেসমস্সুলোচকোপি হোতি কেসমস্সুলোচনানুযোগমনুযুত্তো, উব্ভট্ঠকোপি [উব্ভট্ঠিকোপি (ক.)] হোতি আসনপটিক্খিত্তো, উক্কুটিকোপি হোতি উক্কুটিকপ্পধানমনুযুত্তো, কণ্টকাপস্সযিকোপি হোতি কণ্টকাপস্সযে সেয্যং কপ্পেতি, ফলকসেয্যম্পি কপ্পেতি, থণ্ডিলসেয্যম্পি কপ্পেতি, একপস্সযিকোপি হোতি ৰজোজল্লধৰো, অব্ভোকাসিকোপি হোতি যথাসন্থতিকো, ৱেকটিকোপি হোতি ৱিকটভোজনানুযোগমনুযুত্তো, অপানকোপি হোতি অপানকত্তমনুযুত্তো, সাযততিযকম্পি উদকোৰোহনানুযোগমনুযুত্তো ৱিহৰতী’’তি.

তপোপক্কমনিৰত্থকথা

৩৯৭. ‘‘অচেলকো চেপি, কস্সপ, হোতি, মুত্তাচাৰো, হত্থাপলেখনো…পে… ইতি এৱৰূপং অদ্ধমাসিকম্পি পৰিযাযভত্তভোজনানুযোগমনুযুত্তো ৱিহৰতি. তস্স চাযং সীলসম্পদা চিত্তসম্পদা পঞ্ঞাসম্পদা অভাৱিতা হোতি অসচ্ছিকতা. অথ খো সো আৰকাৱ সামঞ্ঞা আৰকাৱ ব্ৰহ্মঞ্ঞা. যতো খো, কস্সপ, ভিক্খু অৱেৰং অব্যাপজ্জং মেত্তচিত্তং ভাৱেতি, আসৱানঞ্চ খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. অযং ৱুচ্চতি, কস্সপ, ভিক্খু সমণো ইতিপি ব্ৰাহ্মণো ইতিপি.

‘‘সাকভক্খো চেপি, কস্সপ, হোতি, সামাকভক্খো…পে… ৱনমূলফলাহাৰো যাপেতি পৱত্তফলভোজী. তস্স চাযং সীলসম্পদা চিত্তসম্পদা পঞ্ঞাসম্পদা অভাৱিতা হোতি অসচ্ছিকতা. অথ খো সো আৰকাৱ সামঞ্ঞা আৰকাৱ ব্ৰহ্মঞ্ঞা. যতো খো, কস্সপ, ভিক্খু অৱেৰং অব্যাপজ্জং মেত্তচিত্তং ভাৱেতি, আসৱানঞ্চ খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. অযং ৱুচ্চতি, কস্সপ, ভিক্খু সমণো ইতিপি ব্ৰাহ্মণো ইতিপি.

‘‘সাণানি চেপি, কস্সপ, ধাৰেতি, মসাণানিপি ধাৰেতি…পে… সাযততিযকম্পি উদকোৰোহনানুযোগমনুযুত্তো ৱিহৰতি. তস্স চাযং সীলসম্পদা চিত্তসম্পদা পঞ্ঞাসম্পদা অভাৱিতা হোতি অসচ্ছিকতা. অথ খো সো আৰকাৱ সামঞ্ঞা আৰকাৱ ব্ৰহ্মঞ্ঞা. যতো খো, কস্সপ, ভিক্খু অৱেৰং অব্যাপজ্জং মেত্তচিত্তং ভাৱেতি, আসৱানঞ্চ খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. অযং ৱুচ্চতি, কস্সপ, ভিক্খু সমণো ইতিপি ব্ৰাহ্মণো ইতিপী’’তি.

৩৯৮. এৱং ৱুত্তে, অচেলো কস্সপো ভগৱন্তং এতদৱোচ – ‘‘দুক্কৰং, ভো গোতম, সামঞ্ঞং দুক্কৰং ব্ৰহ্মঞ্ঞ’’ন্তি. ‘‘পকতি খো এসা, কস্সপ, লোকস্মিং ‘দুক্কৰং সামঞ্ঞং দুক্কৰং ব্ৰহ্মঞ্ঞ’ন্তি. অচেলকো চেপি, কস্সপ, হোতি, মুত্তাচাৰো, হত্থাপলেখনো…পে… ইতি এৱৰূপং অদ্ধমাসিকম্পি পৰিযাযভত্তভোজনানুযোগমনুযুত্তো ৱিহৰতি. ইমায চ, কস্সপ, মত্তায ইমিনা তপোপক্কমেন সামঞ্ঞং ৱা অভৱিস্স ব্ৰহ্মঞ্ঞং ৱা দুক্কৰং সুদুক্কৰং, নেতং অভৱিস্স কল্লং ৱচনায – ‘দুক্কৰং সামঞ্ঞং দুক্কৰং ব্ৰহ্মঞ্ঞ’ন্তি.

‘‘সক্কা চ পনেতং অভৱিস্স কাতুং গহপতিনা ৱা গহপতিপুত্তেন ৱা অন্তমসো কুম্ভদাসিযাপি – ‘হন্দাহং অচেলকো হোমি, মুত্তাচাৰো, হত্থাপলেখনো…পে… ইতি এৱৰূপং অদ্ধমাসিকম্পি পৰিযাযভত্তভোজনানুযোগমনুযুত্তো ৱিহৰামী’তি.

‘‘যস্মা চ খো, কস্সপ, অঞ্ঞত্ৰেৱ ইমায মত্তায অঞ্ঞত্ৰ ইমিনা তপোপক্কমেন সামঞ্ঞং ৱা হোতি ব্ৰহ্মঞ্ঞং ৱা দুক্কৰং সুদুক্কৰং, তস্মা এতং কল্লং ৱচনায – ‘দুক্কৰং সামঞ্ঞং দুক্কৰং ব্ৰহ্মঞ্ঞ’ন্তি. যতো খো, কস্সপ, ভিক্খু অৱেৰং অব্যাপজ্জং মেত্তচিত্তং ভাৱেতি, আসৱানঞ্চ খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. অযং ৱুচ্চতি, কস্সপ, ভিক্খু সমণো ইতিপি ব্ৰাহ্মণো ইতিপি.

‘‘সাকভক্খো চেপি, কস্সপ, হোতি, সামাকভক্খো…পে… ৱনমূলফলাহাৰো যাপেতি পৱত্তফলভোজী. ইমায চ, কস্সপ, মত্তায ইমিনা তপোপক্কমেন সামঞ্ঞং ৱা অভৱিস্স ব্ৰহ্মঞ্ঞং ৱা দুক্কৰং সুদুক্কৰং, নেতং অভৱিস্স কল্লং ৱচনায – ‘দুক্কৰং সামঞ্ঞং দুক্কৰং ব্ৰহ্মঞ্ঞ’ন্তি.

‘‘সক্কা চ পনেতং অভৱিস্স কাতুং গহপতিনা ৱা গহপতিপুত্তেন ৱা অন্তমসো কুম্ভদাসিযাপি – ‘হন্দাহং সাকভক্খো ৱা হোমি, সামাকভক্খো ৱা…পে… ৱনমূলফলাহাৰো যাপেমি পৱত্তফলভোজী’তি.

‘‘সাণানি চেপি, কস্সপ, ধাৰেতি, মসাণানিপি ধাৰেতি…পে… সাযততিযকম্পি উদকোৰোহনানুযোগমনুযুত্তো ৱিহৰতি. ইমায চ, কস্সপ, মত্তায ইমিনা তপোপক্কমেন সামঞ্ঞং ৱা অভৱিস্স ব্ৰহ্মঞ্ঞং ৱা দুক্কৰং সুদুক্কৰং, নেতং অভৱিস্স কল্লং ৱচনায – ‘দুক্কৰং সামঞ্ঞং দুক্কৰং ব্ৰহ্মঞ্ঞ’ন্তি.

‘‘সক্কা চ পনেতং অভৱিস্স কাতুং গহপতিনা ৱা গহপতিপুত্তেন ৱা অন্তমসো কুম্ভদাসিযাপি – ‘হন্দাহং সাণানিপি ধাৰেমি, মসাণানিপি ধাৰেমি…পে… সাযততিযকম্পি উদকোৰোহনানুযোগমনুযুত্তো ৱিহৰামী’তি.

৩৯৯. এৱং ৱুত্তে, অচেলো কস্সপো ভগৱন্তং এতদৱোচ – ‘‘দুজ্জানো, ভো গোতম, সমণো, দুজ্জানো ব্ৰাহ্মণো’’তি. ‘‘পকতি খো এসা, কস্সপ, লোকস্মিং ‘দুজ্জানো সমণো দুজ্জানো ব্ৰাহ্মণো’তি. অচেলকো চেপি, কস্সপ, হোতি, মুত্তাচাৰো, হত্থাপলেখনো…পে… ইতি এৱৰূপং অদ্ধমাসিকম্পি পৰিযাযভত্তভোজনানুযোগমনুযুত্তো ৱিহৰতি. ইমায চ, কস্সপ, মত্তায ইমিনা তপোপক্কমেন সমণো ৱা অভৱিস্স ব্ৰাহ্মণো ৱা দুজ্জানো সুদুজ্জানো, নেতং অভৱিস্স কল্লং ৱচনায – ‘দুজ্জানো সমণো দুজ্জানো ব্ৰাহ্মণো’তি.

‘‘সক্কা চ পনেসো অভৱিস্স ঞাতুং গহপতিনা ৱা গহপতিপুত্তেন ৱা অন্তমসো কুম্ভদাসিযাপি – ‘অযং অচেলকো হোতি, মুত্তাচাৰো, হত্থাপলেখনো…পে… ইতি এৱৰূপং অদ্ধমাসিকম্পি পৰিযাযভত্তভোজনানুযোগমনুযুত্তো ৱিহৰতী’তি.

‘‘যস্মা চ খো, কস্সপ, অঞ্ঞত্ৰেৱ ইমায মত্তায অঞ্ঞত্ৰ ইমিনা তপোপক্কমেন সমণো ৱা হোতি ব্ৰাহ্মণো ৱা দুজ্জানো সুদুজ্জানো, তস্মা এতং কল্লং ৱচনায – ‘দুজ্জানো সমণো দুজ্জানো ব্ৰাহ্মণো’তি. যতো খো [যতো চ খো (ক.)], কস্সপ, ভিক্খু অৱেৰং অব্যাপজ্জং মেত্তচিত্তং ভাৱেতি, আসৱানঞ্চ খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. অযং ৱুচ্চতি, কস্সপ, ভিক্খু সমণো ইতিপি ব্ৰাহ্মণো ইতিপি.

‘‘সাকভক্খো চেপি, কস্সপ, হোতি সামাকভক্খো…পে… ৱনমূলফলাহাৰো যাপেতি পৱত্তফলভোজী. ইমায চ, কস্সপ, মত্তায ইমিনা তপোপক্কমেন সমণো ৱা অভৱিস্স ব্ৰাহ্মণো ৱা দুজ্জানো সুদুজ্জানো, নেতং অভৱিস্স কল্লং ৱচনায – ‘দুজ্জানো সমণো দুজ্জানো ব্ৰাহ্মণো’তি.

‘‘সক্কা চ পনেসো অভৱিস্স ঞাতুং গহপতিনা ৱা গহপতিপুত্তেন ৱা অন্তমসো কুম্ভদাসিযাপি – ‘অযং সাকভক্খো ৱা হোতি সামাকভক্খো…পে… ৱনমূলফলাহাৰো যাপেতি পৱত্তফলভোজী’তি.

‘‘যস্মা চ খো, কস্সপ, অঞ্ঞত্ৰেৱ ইমায মত্তায অঞ্ঞত্ৰ ইমিনা তপোপক্কমেন সমণো ৱা হোতি ব্ৰাহ্মণো ৱা দুজ্জানো সুদুজ্জানো, তস্মা এতং কল্লং ৱচনায – ‘দুজ্জানো সমণো দুজ্জানো ব্ৰাহ্মণো’তি. যতো খো, কস্সপ, ভিক্খু অৱেৰং অব্যাপজ্জং মেত্তচিত্তং ভাৱেতি, আসৱানঞ্চ খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. অযং ৱুচ্চতি, কস্সপ, ভিক্খু সমণো ইতিপি ব্ৰাহ্মণো ইতিপি.

‘‘সাণানি চেপি, কস্সপ, ধাৰেতি, মসাণানিপি ধাৰেতি…পে… সাযততিযকম্পি উদকোৰোহনানুযোগমনুযুত্তো ৱিহৰতি. ইমায চ, কস্সপ, মত্তায ইমিনা তপোপক্কমেন সমণো ৱা অভৱিস্স ব্ৰাহ্মণো ৱা দুজ্জানো সুদুজ্জানো, নেতং অভৱিস্স কল্লং ৱচনায – ‘দুজ্জানো সমণো দুজ্জানো ব্ৰাহ্মণো’তি.

‘‘সক্কা চ পনেসো অভৱিস্স ঞাতুং গহপতিনা ৱা গহপতিপুত্তেন ৱা অন্তমসো কুম্ভদাসিযাপি – ‘অযং সাণানিপি ধাৰেতি, মসাণানিপি ধাৰেতি…পে… সাযততিযকম্পি উদকোৰোহনানুযোগমনুযুত্তো ৱিহৰতী’তি.

‘‘যস্মা চ খো, কস্সপ, অঞ্ঞত্ৰেৱ ইমায মত্তায অঞ্ঞত্ৰ ইমিনা তপোপক্কমেন সমণো ৱা হোতি ব্ৰাহ্মণো ৱা দুজ্জানো সুদুজ্জানো, তস্মা এতং কল্লং ৱচনায – ‘দুজ্জানো সমণো দুজ্জানো ব্ৰাহ্মণো’তি. যতো খো, কস্সপ, ভিক্খু অৱেৰং অব্যাপজ্জং মেত্তচিত্তং ভাৱেতি, আসৱানঞ্চ খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. অযং ৱুচ্চতি, কস্সপ, ভিক্খু সমণো ইতিপি ব্ৰাহ্মণো ইতিপী’’তি.

সীলসমাধিপঞ্ঞাসম্পদা

৪০০. এৱং ৱুত্তে, অচেলো কস্সপো ভগৱন্তং এতদৱোচ – ‘‘কতমা পন সা, ভো গোতম, সীলসম্পদা, কতমা চিত্তসম্পদা, কতমা পঞ্ঞাসম্পদা’’তি? ‘‘ইধ, কস্সপ, তথাগতো লোকে উপ্পজ্জতি অৰহং, সম্মাসম্বুদ্ধো…পে… (যথা ১৯০-১৯৩ অনুচ্ছেদেসু, এৱং ৱিত্থাৰেতব্বং) ভযদস্সাৱী সমাদায সিক্খতি সিক্খাপদেসু, কাযকম্মৱচীকম্মেন সমন্নাগতো কুসলেন পৰিসুদ্ধাজীৱো সীলসম্পন্নো ইন্দ্ৰিযেসু গুত্তদ্ৱাৰো সতিসম্পজঞ্ঞেন সমন্নাগতো সন্তুট্ঠো.

৪০১. ‘‘কথঞ্চ, কস্সপ, ভিক্খু সীলসম্পন্নো হোতি? ইধ, কস্সপ, ভিক্খু পাণাতিপাতং পহায পাণাতিপাতা পটিৱিৰতো হোতি নিহিতদণ্ডো নিহিতসত্থো লজ্জী দযাপন্নো, সব্বপাণভূতহিতানুকম্পী ৱিহৰতি. ইদম্পিস্স হোতি সীলসম্পদায …পে… (যথা ১৯৪ যাৱ ২১০ অনুচ্ছেদেসু)

‘‘যথা ৱা পনেকে ভোন্তো সমণব্ৰাহ্মণা সদ্ধাদেয্যানি ভোজনানি ভুঞ্জিত্ৱা তে এৱৰূপায তিৰচ্ছানৱিজ্জায মিচ্ছাজীৱেন জীৱিতং কপ্পেন্তি. সেয্যথিদং – সন্তিকম্মং পণিধিকম্মং…পে… (যথা ২১১ অনুচ্ছেদে) ওসধীনং পতিমোক্খো ইতি ৱা ইতি, এৱৰূপায তিৰচ্ছানৱিজ্জায মিচ্ছাজীৱা পটিৱিৰতো হোতি. ইদম্পিস্স হোতি সীলসম্পদায.

‘‘স খো সো [অযং খো (ক.)], কস্সপ, ভিক্খু এৱং সীলসম্পন্নো ন কুতোচি ভযং সমনুপস্সতি, যদিদং সীলসংৱৰতো. সেয্যথাপি, কস্সপ, ৰাজা খত্তিযো মুদ্ধাৱসিত্তো নিহতপচ্চামিত্তো ন কুতোচি ভযং সমনুপস্সতি, যদিদং পচ্চত্থিকতো. এৱমেৱ খো, কস্সপ, ভিক্খু এৱং সীলসম্পন্নো ন কুতোচি ভযং সমনুপস্সতি, যদিদং সীলসংৱৰতো. সো ইমিনা অৰিযেন সীলক্খন্ধেন সমন্নাগতো অজ্ঝত্তং অনৱজ্জসুখং পটিসংৱেদেতি. এৱং খো, কস্সপ, ভিক্খু সীলসম্পন্নো হোতি. অযং খো, কস্সপ, সীলসম্পদা…পে… পঠমং ঝানং উপসম্পজ্জ ৱিহৰতি. ইদম্পিস্স হোতি চিত্তসম্পদায…পে… দুতিযং ঝানং…পে… ততিযং ঝানং…পে… চতুত্থং ঝানং উপসম্পজ্জ ৱিহৰতি. ইদম্পিস্স হোতি চিত্তসম্পদায. অযং খো, কস্সপ, চিত্তসম্পদা.

‘‘সো এৱং সমাহিতে চিত্তে…পে… ঞাণদস্সনায চিত্তং অভিনীহৰতি অভিনিন্নামেতি…পে… ইদম্পিস্স হোতি পঞ্ঞাসম্পদায…পে… নাপৰং ইত্থত্তাযাতি পজানাতি…পে… ইদম্পিস্স হোতি পঞ্ঞাসম্পদায. অযং খো, কস্সপ, পঞ্ঞাসম্পদা.

‘‘ইমায চ, কস্সপ, সীলসম্পদায চিত্তসম্পদায পঞ্ঞাসম্পদায অঞ্ঞা সীলসম্পদা চিত্তসম্পদা পঞ্ঞাসম্পদা উত্তৰিতৰা ৱা পণীততৰা ৱা নত্থি.

সীহনাদকথা

৪০২. ‘‘সন্তি, কস্সপ, একে সমণব্ৰাহ্মণা সীলৱাদা. তে অনেকপৰিযাযেন সীলস্স ৱণ্ণং ভাসন্তি. যাৱতা, কস্সপ, অৰিযং পৰমং সীলং, নাহং তত্থ অত্তনো সমসমং সমনুপস্সামি, কুতো ভিয্যো! অথ খো অহমেৱ তত্থ ভিয্যো, যদিদং অধিসীলং.

‘‘সন্তি, কস্সপ, একে সমণব্ৰাহ্মণা তপোজিগুচ্ছাৱাদা. তে অনেকপৰিযাযেন তপোজিগুচ্ছায ৱণ্ণং ভাসন্তি. যাৱতা, কস্সপ, অৰিযা পৰমা তপোজিগুচ্ছা, নাহং তত্থ অত্তনো সমসমং সমনুপস্সামি, কুতো ভিয্যো! অথ খো অহমেৱ তত্থ ভিয্যো, যদিদং অধিজেগুচ্ছং.

‘‘সন্তি, কস্সপ, একে সমণব্ৰাহ্মণা পঞ্ঞাৱাদা. তে অনেকপৰিযাযেন পঞ্ঞায ৱণ্ণং ভাসন্তি. যাৱতা, কস্সপ, অৰিযা পৰমা পঞ্ঞা, নাহং তত্থ অত্তনো সমসমং সমনুপস্সামি, কুতো ভিয্যো! অথ খো অহমেৱ তত্থ ভিয্যো, যদিদং অধিপঞ্ঞং.

‘‘সন্তি, কস্সপ, একে সমণব্ৰাহ্মণা ৱিমুত্তিৱাদা. তে অনেকপৰিযাযেন ৱিমুত্তিযা ৱণ্ণং ভাসন্তি. যাৱতা, কস্সপ, অৰিযা পৰমা ৱিমুত্তি, নাহং তত্থ অত্তনো সমসমং সমনুপস্সামি, কুতো ভিয্যো! অথ খো অহমেৱ তত্থ ভিয্যো, যদিদং অধিৱিমুত্তি.

৪০৩. ‘‘ঠানং খো পনেতং, কস্সপ, ৱিজ্জতি, যং অঞ্ঞতিত্থিযা পৰিব্বাজকা এৱং ৱদেয্যুং – ‘সীহনাদং খো সমণো গোতমো নদতি, তঞ্চ খো সুঞ্ঞাগাৰে নদতি, নো পৰিসাসূ’তি. তে – ‘মা হেৱ’ন্তিস্সু ৱচনীযা. ‘সীহনাদঞ্চ সমণো গোতমো নদতি, পৰিসাসু চ নদতী’তি এৱমস্সু, কস্সপ, ৱচনীযা.

‘‘ঠানং খো পনেতং, কস্সপ, ৱিজ্জতি, যং অঞ্ঞতিত্থিযা পৰিব্বাজকা এৱং ৱদেয্যুং – ‘সীহনাদঞ্চ সমণো গোতমো নদতি, পৰিসাসু চ নদতি, নো চ খো ৱিসাৰদো নদতী’তি. তে – ‘মা হেৱ’ন্তিস্সু ৱচনীযা. ‘সীহনাদঞ্চ সমণো গোতমো নদতি, পৰিসাসু চ নদতি, ৱিসাৰদো চ নদতী’’তি এৱমস্সু, কস্সপ, ৱচনীযা.

‘‘ঠানং খো পনেতং, কস্সপ, ৱিজ্জতি, যং অঞ্ঞতিত্থিযা পৰিব্বাজকা এৱং ৱদেয্যুং – ‘সীহনাদঞ্চ সমণো গোতমো নদতি, পৰিসাসু চ নদতি, ৱিসাৰদো চ নদতি, নো চ খো নং পঞ্হং পুচ্ছন্তি…পে… পঞ্হঞ্চ নং পুচ্ছন্তি; নো চ খো নেসং পঞ্হং পুট্ঠো ব্যাকৰোতি…পে… পঞ্হঞ্চ নেসং পুট্ঠো ব্যাকৰোতি; নো চ খো পঞ্হস্স ৱেয্যাকৰণেন চিত্তং আৰাধেতি…পে… পঞ্হস্স চ ৱেয্যাকৰণেন চিত্তং আৰাধেতি; নো চ খো সোতব্বং মঞ্ঞন্তি…পে… সোতব্বঞ্চস্স মঞ্ঞন্তি; নো চ খো সুত্ৱা পসীদন্তি…পে… সুত্ৱা চস্স পসীদন্তি; নো চ খো পসন্নাকাৰং কৰোন্তি…পে… পসন্নাকাৰঞ্চ কৰোন্তি; নো চ খো তথত্তায পটিপজ্জন্তি…পে… তথত্তায চ পটিপজ্জন্তি; নো চ খো পটিপন্না আৰাধেন্তী’তি. তে – ‘মা হেৱ’ন্তিস্সু ৱচনীযা. ‘সীহনাদঞ্চ সমণো গোতমো নদতি, পৰিসাসু চ নদতি, ৱিসাৰদো চ নদতি, পঞ্হঞ্চ নং পুচ্ছন্তি, পঞ্হঞ্চ নেসং পুট্ঠো ব্যাকৰোতি, পঞ্হস্স চ ৱেয্যাকৰণেন চিত্তং আৰাধেতি, সোতব্বঞ্চস্স মঞ্ঞন্তি, সুত্ৱা চস্স পসীদন্তি, পসন্নাকাৰঞ্চ কৰোন্তি, তথত্তায চ পটিপজ্জন্তি, পটিপন্না চ আৰাধেন্তী’তি এৱমস্সু, কস্সপ, ৱচনীযা.

তিত্থিযপৰিৱাসকথা

৪০৪. ‘‘একমিদাহং, কস্সপ, সমযং ৰাজগহে ৱিহৰামি গিজ্ঝকূটে পব্বতে. তত্ৰ মং অঞ্ঞতৰো তপব্ৰহ্মচাৰী নিগ্ৰোধো নাম অধিজেগুচ্ছে পঞ্হং অপুচ্ছি. তস্সাহং অধিজেগুচ্ছে পঞ্হং পুট্ঠো ব্যাকাসিং. ব্যাকতে চ পন মে অত্তমনো অহোসি পৰং ৱিয মত্তাযা’’তি. ‘‘কো হি, ভন্তে, ভগৱতো ধম্মং সুত্ৱা ন অত্তমনো অস্স পৰং ৱিয মত্তায? অহম্পি হি, ভন্তে, ভগৱতো ধম্মং সুত্ৱা অত্তমনো পৰং ৱিয মত্তায. অভিক্কন্তং, ভন্তে, অভিক্কন্তং, ভন্তে. সেয্যথাপি, ভন্তে, নিক্কুজ্জিতং ৱা উক্কুজ্জেয্য, পটিচ্ছন্নং ৱা ৱিৱৰেয্য, মূড়্হস্স ৱা মগ্গং আচিক্খেয্য, অন্ধকাৰে ৱা তেলপজ্জোতং ধাৰেয্য – ‘চক্খুমন্তো ৰূপানি দক্খন্তী’তি; এৱমেৱং ভগৱতা অনেকপৰিযাযেন ধম্মো পকাসিতো. এসাহং, ভন্তে, ভগৱন্তং সৰণং গচ্ছামি, ধম্মঞ্চ ভিক্খুসঙ্ঘঞ্চ. লভেয্যাহং, ভন্তে, ভগৱতো সন্তিকে পব্বজ্জং, লভেয্যং উপসম্পদ’’ন্তি.

৪০৫. ‘‘যো খো, কস্সপ, অঞ্ঞতিত্থিযপুব্বো ইমস্মিং ধম্মৱিনযে আকঙ্খতি পব্বজ্জং, আকঙ্খতি উপসম্পদং, সো চত্তাৰো মাসে পৰিৱসতি, চতুন্নং মাসানং অচ্চযেন আৰদ্ধচিত্তা ভিক্খূ পব্বাজেন্তি, উপসম্পাদেন্তি ভিক্খুভাৱায. অপি চ মেত্থ পুগ্গলৱেমত্ততা ৱিদিতা’’তি. ‘‘সচে, ভন্তে, অঞ্ঞতিত্থিযপুব্বা ইমস্মিং ধম্মৱিনযে আকঙ্খন্তি পব্বজ্জং, আকঙ্খন্তি উপসম্পদং, চত্তাৰো মাসে পৰিৱসন্তি, চতুন্নং মাসানং অচ্চযেন আৰদ্ধচিত্তা ভিক্খূ পব্বাজেন্তি, উপসম্পাদেন্তি ভিক্খুভাৱায. অহং চত্তাৰি ৱস্সানি পৰিৱসিস্সামি, চতুন্নং ৱস্সানং অচ্চযেন আৰদ্ধচিত্তা ভিক্খূ পব্বাজেন্তু, উপসম্পাদেন্তু ভিক্খুভাৱাযা’’তি.

অলত্থ খো অচেলো কস্সপো ভগৱতো সন্তিকে পব্বজ্জং, অলত্থ উপসম্পদং. অচিৰূপসম্পন্নো খো পনাযস্মা কস্সপো একো ৱূপকট্ঠো অপ্পমত্তো আতাপী পহিতত্তো ৱিহৰন্তো ন চিৰস্সেৱ – যস্সত্থায কুলপুত্তা সম্মদেৱ অগাৰস্মা অনগাৰিযং পব্বজন্তি, তদনুত্তৰং – ব্ৰহ্মচৰিযপৰিযোসানং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহাসি. ‘খীণা জাতি, ৱুসিতং ব্ৰহ্মচৰিযং, কতং কৰণীযং, নাপৰং ইত্থত্তাযা’তি – অব্ভঞ্ঞাসি. অঞ্ঞতৰো খো পনাযস্মা কস্সপো অৰহতং অহোসীতি.

মহাসীহনাদসুত্তং নিট্ঠিতং অট্ঠমং.