৬. আৰামৱগ্গো

১. পঠমসিক্খাপদৱণ্ণনা

১০২৫. আৰামৱগ্গস্স পঠমসিক্খাপদে – পৰিক্খেপং অতিক্কামেন্তিযা, উপচাৰং ওক্কমন্তিযাতি এত্থ পঠমপাদে দুক্কটং, দুতিযপাদে পাচিত্তিযং.

১০২৭. সীসানুলোকিকাতি পঠমং পৱিসন্তীনং ভিক্খুনীনং সীসং অনুলোকেন্তী পৱিসতি, অনাপত্তি. যত্থ ভিক্খুনিযোতি যত্থ ভিক্খুনিযো পঠমতৰং পৱিসিত্ৱা সজ্ঝাযচেতিযৱন্দনাদীনি কৰোন্তি, তত্থ তাসং সন্তিকং গচ্ছামীতি গন্তুং ৱট্টতি. আপদাসূতি কেনচি উপদ্দুতা হোতি, এৱৰূপাসু আপদাসু পৱিসিতুং ৱট্টতি. সেসং উত্তানমেৱ.

ধুৰনিক্খেপসমুট্ঠানং – কিৰিযাকিৰিযং, সঞ্ঞাৱিমোক্খং, সচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

পঠমসিক্খাপদং.

২. দুতিযসিক্খাপদৱণ্ণনা

১০২৮. দুতিযে – আযস্মা কপ্পিতকোতি অযং জটিলসহস্সব্ভন্তৰো থেৰো. সংহৰীতি সঙ্কামেসি. সংহটোতি সঙ্কামিতো. কাসাৱটোতি ন্হাপিতা কাসাৱং নিৱাসেত্ৱা কম্মং কৰোন্তি, তং সন্ধাযাহংসু. সেসং উত্তানমেৱ.

তিসমুট্ঠানং – কিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং, দুক্খৱেদনন্তি.

দুতিযসিক্খাপদং.

৩. ততিযসিক্খাপদৱণ্ণনা

১০৩৬. ততিযে – অনুসাসনিপুৰেক্খাৰাযাতি ইদানিপি ত্ৱং বালা অব্যত্তাতিআদিনা নযেন অনুসাসনিপক্খে ঠত্ৱা ৱদন্তিযা অনাপত্তি. সেসং উত্তানমেৱ. সমুট্ঠানাদীনি অনন্তৰসিক্খাপদসদিসানেৱাতি.

ততিযসিক্খাপদং.

৪. চতুত্থসিক্খাপদৱণ্ণনা

১০৩৭. চতুত্থে – সব্বং উত্তানমেৱ. চতুসমুট্ঠানং – কাযতো কাযৱাচতো কাযচিত্ততো কাযৱাচাচিত্ততো চ সমুট্ঠাতি. নিমন্তিতায অনাপুচ্ছা ভুঞ্জন্তিযা আপত্তিসম্ভৱতো সিযা কিৰিযাকিৰিযং, পৱাৰিতায কপ্পিযং কাৰেত্ৱাপি অকাৰেত্ৱাপি ভুঞ্জন্তিযা আপত্তিসম্ভৱতো সিযা কিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

চতুত্থসিক্খাপদং.

৫. পঞ্চমসিক্খাপদৱণ্ণনা

১০৪৩. পঞ্চমে – কুলে মচ্ছৰো কুলমচ্ছৰো, কুলমচ্ছৰো এতিস্সা অত্থীতি কুলমচ্ছৰিনী কুলং ৱা মচ্ছৰাযতীতি কুলমচ্ছৰিনী. কুলস্স অৱণ্ণন্তি তং কুলং অস্সদ্ধং অপ্পসন্নন্তি. ভিক্খুনীনং অৱণ্ণন্তি ভিক্খুনিযো দুস্সীলা পাপধম্মাতি.

১০৪৫. সন্তংযেৱ আদীনৱন্তি কুলস্স ৱা ভিক্খুনীনং ৱা সন্তং অগুণং. সেসং উত্তানমেৱ. তিসমুট্ঠানং – কিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং দুক্খৱেদনন্তি.

পঞ্চমসিক্খাপদং.

৬. ছট্ঠসিক্খাপদৱণ্ণনা

১০৪৮. ছট্ঠে – ওৱাদাযাতি গৰুধম্মত্থায. সংৱাসাযাতি উপোসথপৱাৰণাপুচ্ছনত্থায. অযমেত্থ সঙ্খেপো. ৱিত্থাৰো পন ভিক্খুনোৱাদকসিক্খাপদৱণ্ণনাযং ৱুত্তোযেৱ.

এড়কলোমসমুট্ঠানং – কিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, তিচিত্তং, তিৱেদনন্তি.

ছট্ঠসিক্খাপদং.

৭. সত্তমসিক্খাপদৱণ্ণনা

১০৫৩. সত্তমে – পৰিযেসিত্ৱা ন লভতীতি ভিক্খুনিং ন লভতি. সেসং উত্তানমেৱ. ইমস্সাপি ৱিত্থাৰো ভিক্খুনোৱাদকে ৱুত্তোযেৱ.

ধুৰনিক্খেপসমুট্ঠানং – অকিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং, দুক্খৱেদনন্তি.

সত্তমসিক্খাপদং.

৮. অট্ঠমসিক্খাপদৱণ্ণনা

১০৫৬. অট্ঠমে – এককম্মন্তিআদীহি উপোসথপৱাৰণাযেৱ ৱুত্তা. সেসং উত্তানমেৱ. ইমস্সাপি ৱিত্থাৰো ভিক্খুনোৱাদকে ৱুত্তোযেৱ.

পঠমপাৰাজিকসমুট্ঠানং – অকিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, অকুসলচিত্তং, দুক্খৱেদনন্তি.

অট্ঠমসিক্খাপদং.

৯. নৱমসিক্খাপদৱণ্ণনা

১০৫৮. নৱমে – সব্বং উত্তানমেৱ. ইমস্সাপি ৱিত্থাৰো ভিক্খুনোৱাদকে ৱুত্তোযেৱ.

নৱমসিক্খাপদং.

১০. দসমসিক্খাপদৱণ্ণনা

১০৬২. দসমে – পসাখেতি অধোকাযে. অধোকাযো হি যস্মা ততো ৰুক্খস্স সাখা ৱিয উভো ঊৰূ পভিজ্জিত্ৱা গতা, তস্মা পসাখোতি ৱুচ্চতি.

১০৬৫. ভিন্দাতিআদীসু সচে ‘‘ভিন্দ, ফালেহী’’তি সব্বানি আণাপেতি, সো চ তথেৱ কৰোতি, ছ আণত্তিদুক্কটানি ছ চ পাচিত্তিযানি আপজ্জতি. অথাপি এৱং আণাপেতি – ‘‘উপাসক, যংকিঞ্চি এত্থ কাতব্বং, তং সব্বং কৰোহী’’তি, সো চ সব্বানিপি ভেদনাদীনি কৰোতি; একৱাচায ছ দুক্কটানি ছ পাচিত্তিযানীতি দ্ৱাদস আপত্তিযো. সচে পন ভেদনাদীসুপি একংযেৱ ৱত্ৱা ‘‘ইদং কৰোহী’’তি আণাপেতি, সো চ সব্বানি কৰোতি, যং আণত্তং, তস্সেৱ কৰণে পাচিত্তিযং. সেসেসু অনাপত্তি. সেসং উত্তানমেৱ.

কথিনসমুট্ঠানং – কিৰিযাকিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

দসমসিক্খাপদং.

আৰামৱগ্গো ছট্ঠো.