৩. নিস্সগ্গিযকণ্ডং (ভিক্খুনীৱিভঙ্গৱণ্ণনা)

পঠমনিস্সগ্গিযপাচিত্তিযসিক্খাপদৱণ্ণনা

তিংস নিস্সগ্গিযা ধম্মা, ভিক্খুনীনং পকাসিতা;

যে তেসং দানি ভৱতি, অযং সংৱণ্ণনাক্কমো.

৭৩৩. আমত্তিকাপণন্তি অমত্তানি ৱুচ্চন্তি ভাজনানি; তানি যে ৱিক্কিণন্তি, তে ৱুচ্চন্তি আমত্তিকা; তেসং আপণো আমত্তিকাপণো; তং ৱা পসাৰেস্সন্তীতি অত্থো.

৭৩৪. পত্তসন্নিচযং কৰেয্যাতি পত্তসন্নিধিং কৰেয্য; একাহং অনধিট্ঠহিত্ৱা ৱা অৱিকপ্পেত্ৱা ৱা পত্তং ঠপেয্যাতি অত্থো. সেসং মহাৱিভঙ্গে ৱুত্তনযেনেৱ ৱেদিতব্বং. অযমেৱ হি ৱিসেসো – তত্থ দসাহং পৰিহাৰো, ইধ একাহম্পি নত্থি. সেসং তাদিসমেৱ.

ইদম্পি কথিনসমুট্ঠানং – কাযৱাচতো কাযৱাচাচিত্ততো চ সমুট্ঠাতি, অকিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

পঠমসিক্খাপদং.

দুতিযনিস্সগ্গিযপাচিত্তিযসিক্খাপদৱণ্ণনা

৭৩৮. দুতিযে – দুচ্চোড়াতি ৱিৰূপচোড়া; জিণ্ণচোড়াতি অত্থো. অপয্যাহীতি অপি অয্যাহি.

৭৪০. আদিস্স দিন্নন্তি সম্পত্তা ভাজেন্তূতি ৱত্ৱাপি ইদং গণস্স ইদং তুম্হাকং দম্মীতি ৱত্ৱা ৱা দাতুকম্যতায পাদমূলে ঠপেত্ৱা ৱা দিন্নম্পি আদিস্স দিন্নং নাম হোতি. এতং সব্বম্পি অকালচীৱৰং. অয্যায দম্মীতি এৱং পটিলদ্ধং পন যথাদানেযেৱ উপনেতব্বং. সেসং উত্তানমেৱ.

তিসমুট্ঠানং – কিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং, তিৱেদনন্তি.

দুতিযসিক্খাপদং.

ততিযনিস্সগ্গিযপাচিত্তিযসিক্খাপদৱণ্ণনা

৭৪৩-৫. ততিযে – হন্দাতি গণ্হ. সযং অচ্ছিন্দতীতি একং দত্ৱা একং অচ্ছিন্দন্তিযা একং নিস্সগ্গিযং, বহূসু বহূনি. সচে সংহৰিত্ৱা ঠপিতানি একতো অচ্ছিন্দতি, ৱত্থুগণনায আপত্তিযো. বন্ধিত্ৱা ঠপিতেসু পন একাৱ আপত্তি. সেসং উত্তানমেৱ.

তিসমুট্ঠানং – কিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং, দুক্খৱেদনন্তি.

ততিযসিক্খাপদং.

চতুত্থনিস্সগ্গিযপাচিত্তিযসিক্খাপদৱণ্ণনা

৭৪৮. চতুত্থে – কযেনাতি মূলেন. ন মে আৱুসো সপ্পিনা অত্থো; তেলেন মে অত্থোতি ইদং কিৰ সা আহটসপ্পিং দত্ৱা তেলম্পি আহৰিস্সতীতি মঞ্ঞমানা আহ. ৱিঞ্ঞাপেত্ৱাতি জানাপেত্ৱা; ইদং নাম আহৰাতি যাচিত্ৱা ৱা.

৭৫২. তঞ্ঞেৱ ৱিঞ্ঞাপেতীতি যং পঠমং ৱিঞ্ঞত্তং তং থোকং নপ্পহোতি, তস্মা পুন তঞ্ঞেৱ ৱিঞ্ঞাপেতীতি অত্থো. অঞ্ঞঞ্চ ৱিঞ্ঞাপেতীতি সচে পঠমং সপ্পিৱিঞ্ঞত্তং, যমকং পচিতব্বন্তি চ ৱেজ্জেন ৱুত্তত্তা তেলেন অত্থো হোতি, ততো তেলেনাপি মে অত্থোতি এৱং অঞ্ঞঞ্চ ৱিঞ্ঞাপেতি. আনিসংসং দস্সেত্ৱাতি সচে কহাপণস্স সপ্পি আভতং হোতি, ইমিনা মূলেন দিগুণং তেলং লব্ভতি, তেনাপি চ ইদং কিচ্চং নিপ্ফজ্জতি, তস্মা তেলং আহৰাতি এৱং আনিসংসং দস্সেত্ৱা ৱিঞ্ঞাপেতীতি. সেসং উত্তানমেৱ.

ছসমুট্ঠানং – কিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

চতুত্থসিক্খাপদং.

পঞ্চমনিস্সগ্গিযপাচিত্তিযসিক্খাপদৱণ্ণনা

৭৫৩. পঞ্চমে – ন মে সিক্খমানেতি ইদং কিৰ সা কুলধীতা ‘‘অযং অদ্ধা এৱং ৱুত্তা ইদং তেলং ঠপেত্ৱা সপ্পিম্পি মে অত্তনো কুলঘৰা আহৰিস্সতী’’তি মঞ্ঞমানা আহ. চেতাপেত্ৱাতি জানাপেত্ৱা ইচ্চেৱ অত্থো. সেসং সব্বত্থ চতুত্থসদিসমেৱাতি.

পঞ্চমসিক্খাপদং.

ছট্ঠনিস্সগ্গিযপাচিত্তিযসিক্খাপদৱণ্ণনা

৭৫৮. ছট্ঠে – ছন্দকন্তি ‘‘ইদং নাম ধম্মকিচ্চং কৰিস্সাম, যং সক্কোথ; তং দেথা’’তি এৱং পৰেসং ছন্দঞ্চ ৰুচিঞ্চ উপ্পাদেত্ৱা গহিতপৰিক্খাৰস্সেতং অধিৱচনং. অঞ্ঞদত্থিকেনাতি অঞ্ঞস্সত্থায দিন্নেন. অঞ্ঞুদ্দিসিকেনাতি অঞ্ঞং উদ্দিসিত্ৱা দিন্নেন. সঙ্ঘিকেনাতি সঙ্ঘস্স পৰিচ্চত্তেন.

৭৬২. সেসকং উপনেতীতি যদত্থায দিন্নো, তং চেতাপেত্ৱা অৱসেসং অঞ্ঞস্সত্থায উপনেতি. সামিকে অপলোকেত্ৱাতি ‘‘তুম্হেহি চীৱৰত্থায দিন্নো, অম্হাকঞ্চ চীৱৰং অত্থি, তেলাদীহি পন অত্থো’’তি এৱং আপুচ্ছিত্ৱা উপনেতি. আপদাসূতি তথাৰূপেসু উপদ্দৱেসু; ভিক্খুনিযো ৱিহাৰং ছড্ডেত্ৱা পক্কমন্তি, এৱৰূপাসু আপদাসু যং ৱা তং ৱা চেতাপেতুং ৱট্টতি. সেসং উত্তানমেৱ.

ছসমুট্ঠানং – কিৰিযাকিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

ছট্ঠসিক্খাপদং.

সত্তমনিস্সগ্গিযপাচিত্তিযসিক্খাপদৱণ্ণনা

৭৬৪. সত্তমে – সঞ্ঞাচিকেনাতি সযং যাচিতকেন. এতদেৱেত্থ নানাকৰণং. সেসং ছট্ঠসদিসমেৱাতি.

সত্তমসিক্খাপদং.

অট্ঠমনিস্সগ্গিযপাচিত্তিযসিক্খাপদৱণ্ণনা

৭৬৯. অট্ঠমে – মহাজনিকেনাতি গণস্স পৰিচ্চত্তেন. এতদেৱেত্থ নানাকৰণং.

অট্ঠমসিক্খাপদং.

নৱমনিস্সগ্গিযপাচিত্তিযসিক্খাপদৱণ্ণনা

৭৭৪. নৱমসিক্খাপদে – সঞ্ঞাচিকেনাতি ইদং পদং ইতো অধিকতৰং.

নৱমসিক্খাপদং.

দসমনিস্সগ্গিযপাচিত্তিযসিক্খাপদৱণ্ণনা

৭৭৮. দসমে – পৰিৱেণং উন্দ্ৰিযতীতি পৰিৱেণং ৱিনস্সতি; পৰিপততীতি অত্থো. ইদঞ্চ পদং পুগ্গলিকেন সঞ্ঞাচিকেনাতি ইদঞ্চ এত্তকমেৱ নানাকৰণং. সেসং পুব্বসদিসমেৱাতি.

দসমসিক্খাপদং.

একাদসমনিস্সগ্গিযপাচিত্তিযসিক্খাপদৱণ্ণনা

৭৮৪. একাদসমে – গৰুপাৱুৰণন্তি সীতকালে পাৱুৰণং. চতুক্কংসপৰমন্তি এত্থ কংসো নাম চতুক্কহাপণিকো হোতি; তস্মা পদভাজনে ‘‘সোড়সকহাপণগ্ঘনক’’ন্তি ৱুত্তং.

একাদসমসিক্খাপদং.

দ্ৱাদসমনিস্সগ্গিযপাচিত্তিযসিক্খাপদৱণ্ণনা

৭৮৯. দ্ৱাদসমে – লহুপাৱুৰণন্তি উণ্হকালে পাৱুৰণং. সেসং সিক্খাপদদ্ৱযেপি উত্তানমেৱ.

দ্ৱাদসমসিক্খাপদং.

উদ্দিট্ঠা খো অয্যাযো তিংস নিস্সগ্গিযা পাচিত্তিযা ধম্মাতি এত্থ মহাৱিভঙ্গে চীৱৰৱগ্গতো ধোৱনঞ্চ পটিগ্গহণঞ্চাতি দ্ৱে সিক্খাপদানি অপনেত্ৱা অকালচীৱৰং কালচীৱৰন্তি অধিট্ঠহিত্ৱা ভাজিতসিক্খাপদেন চ পৰিৱত্তেত্ৱা অচ্ছিন্নচীৱৰেন চ পঠমৱগ্গো পূৰেতব্বো. পুন এড়কলোমৱগ্গস্স আদিতো সত্ত সিক্খাপদানি অপনেত্ৱা সত্ত অঞ্ঞদত্থিকানি পক্খিপিত্ৱা দুতিযৱগ্গো পূৰেতব্বো. ততিযৱগ্গতো পঠমপত্তং ৱস্সিকসাটিকং আৰঞ্ঞকসিক্খাপদন্তি ইমানি তীণি অপনেত্ৱা পত্তসন্নিচযগৰুপাৱুৰণলহুপাৱুৰণসিক্খাপদেহি ততিযৱগ্গো পূৰেতব্বো. ইতি ভিক্খুনীনং দ্ৱাদস সিক্খাপদানি একতোপঞ্ঞত্তানি, অট্ঠাৰস উভতোপঞ্ঞত্তানীতি এৱং সব্বেপি পাতিমোক্খুদ্দেসমগ্গেন ‘‘উদ্দিট্ঠা খো অয্যাযো তিংস নিস্সগ্গিযা পাচিত্তিযা ধম্মা’’তি এৱমেত্থ অত্থো দট্ঠব্বো. সেসং ৱুত্তনযমেৱাতি.

সমন্তপাসাদিকায ৱিনযসংৱণ্ণনায ভিক্খুনীৱিভঙ্গে

তিংসকৱণ্ণনা নিট্ঠিতা.

নিস্সগ্গিযকণ্ডং নিট্ঠিতং.